ក្រសួងពាណិជ្ជកម្ម កំពុងជំរុញការរៀបចំសេចក្តីព្រាងគោលនយោបាយជាតិស្តីពីស្វាយចន្ទី។ ហុង មិនា
ភ្នំពេញៈ ក្រសួងពាណិជ្ជកម្មកំពុងជំរុញឱ្យក្រុមការងាររបស់ខ្លួនធ្វើការពិនិត្យ និងកែសម្រួលខ្លឹមសារមួយចំនួននៃសេចក្តីព្រាង គោលនយោបាយជាតិស្តីពីស្វាយចន្ទី ដើម្បីត្រៀមស្នើសុំការសម្រេចពីរដ្ឋាភិបាល សម្រាប់យកមកប្រើប្រាស់។
.jpg)
ក្នុងកិច្ចប្រជុំដើម្បីពិនិត្យ និងពិភាក្សាលើសេចក្តីព្រាងគោលនយោបាយជាតិស្តីពីស្វាយចន្ទី កាលពីថ្ងៃទី២០ ខែមករា លោក រាជ រ៉ា រដ្ឋលេខាធិការក្រសួងពាណិជ្ជកម្ម បានលើកឡើងអំពីគោលនយោបាយជាតិស្តីពីស្វាយចន្ទី ដែលកន្លងមកគោលនយោបាយនេះបានដាក់ឆ្លងកិច្ចប្រជុំជាច្រើនលើករួចមកហើយ ដូចជា កិច្ចប្រជុំកម្រិតអគ្គនាយកដ្ឋាន-អន្តរអគ្គនាយកដ្ឋាន កិច្ចប្រជុំក្រុមការងារបច្ចេកទេស និងកិច្ចប្រជុំក្រុមការងារចម្រុះរៀបចំគោលនយោបាយស្វាយចន្ទីកម្ពុជា។ បន្ថែមពីលើនេះ ក្រុមការងាររបស់ក្រសួង ក៏បានបញ្ចូលនូវធាតុចូលពីអន្តរក្រសួង-ស្ថាប័ន ដៃគូអភិវឌ្ឍន៍ និងវិស័យឯកជនពាក់ព័ន្ធដូចជា សមាគម អ្នកនាំចេញ អ្នកដាំដុះ ដើម្បីបំពេញបន្ថែមនូវរាល់ចំណុចខ្វះខាត។
លោកលើកឡើងថា ស្វាយចន្ទី គឺជាទំនិញមានសក្តានុពលដែលកម្ពុជាមានទាំងការដាំដុះ និងការផ្គត់ផ្គង់លើទីផ្សារក្នុងស្រុក និងនាំចេញ។ ដូច្នេះការរៀបចំឱ្យមាននយោបាយជាតិនឹងរួមចំណែកយ៉ាងច្រើនដល់ការសម្រេចបាននូវមហិច្ឆតាពេលអនាគតរបស់កម្ពុជាក្នុងការក្លាយជាប្រទេសផលិត និងនាំចេញ។
នាពេលកន្លងមក លោក រាជ រ៉ា ធ្លាប់និយាយថា៖«គោលបំណងនៃសេចក្តីព្រាងគោលនយោបាយជាតិគឺប្រែក្លាយកម្ពុជាទៅជាប្រទេសផលិត និងផ្គត់ផ្គង់ផលិតផលស្វាយចន្ទីដ៏សំខាន់មួយសម្រាប់បម្រើទីផ្សារក្នុងស្រុក តំបន់ និងពិភពលោក»។
ជាលទ្ធផល អង្គប្រជុំបានបើកកិច្ចពិភាក្សាពិនិត្យកែសម្រួល និងបន្ថែមខ្លឹមសារនៅលើចំណុចសំខាន់ និងទិន្នន័យមួយចំនួននៃគោលនយោបាយនេះ ដោយរក្សានូវអត្ថន័យដើម។
លោកបានថ្លែងថា៖«ខ្ញុំសូមផ្តល់អនុសាសន៍ឱ្យលេខាធិការដ្ឋានរៀបចំគោលនយោបាយជាតិស្តីពីស្វាយចន្ទី ត្រៀមរៀបចំនីតិវិធីបន្តដើម្បី ស្នើសុំដាក់ពិភាក្សានៅកិច្ចប្រជុំនៅទីស្តីការគណៈរដ្ឋមន្ត្រីក្នុងពេលឆាប់ៗខាងមុខនេះ»។
ទិន្នន័យក្រសួងកសិកម្ម រុក្ខាប្រមាញ់ និងនេសាទ បង្ហាញថា ក្នុងឆ្នាំ២០២០ កម្ពុជានាំចេញគ្រាប់ស្វាយចន្ទីចំនួន ៩៣៧ ៩៧៤,២៦តោន តោនកើនឡើង ៣២៨,៣៤ ភាគរយពីចំនួន ២១៨ ៩៨១តោនក្នុងឆ្នាំ២០២០។ គ្រាប់ស្វាយចន្ទីត្រូវបាននាំចេញភាគច្រើនទៅប្រទេស វៀតណាម ចិន ថៃ ឥណ្ឌា ជប៉ុន និងកូរ៉េ ជាដើម៕
