ភ្នំពេញៈ ក្រសួងពាណិជ្ជកម្មកម្ពុជាបានស្នើសុំការគាំទ្របន្ថែមពីប្រទេសសិង្ហបុរី លើកិច្ចសហប្រតិបត្តិការសេដ្ឋកិច្ចលើវិស័យឌីជីថល និងការលក់រាយក្នុងវិស័យ SMEs ខណៈអ្នកប្រើប្រាស់ឌីជីថល មានកំណើនយ៉ាងច្រើនក្នុងអំឡុងពេលវិបត្តិកូវីដ ១៩។
ក្នុងកិច្ចប្រជុំពិភាក្សាស្តីពីកាលានុវត្តភាពសម្រាប់កិច្ចសហប្រតិបត្តិការសេដ្ឋកិច្ចលើវិស័យឌីជីថលូបនីយកម្មជាមួយអនុរដ្ឋមន្ត្រីពាណិជ្ជកម្ម និងឧស្សាហកម្មសិង្ហបុរីតាមប្រព័ន្ធវីដេអូកាលពីថ្ងៃទី ២១ ខែមករា លោក សុខ សុភ័ក្ត្រ រដ្ឋលេខាធិការក្រសួងពាណិជ្ជកម្មលើកឡើងថា អ្នកប្រើប្រាស់អ៊ីនធឺណិតនៅកម្ពុជាបានកើនដល់ប្រមាណ ១២ លាននាក់ ខណៈសហគ្រាសធុនមីក្រូ តូច និងមធ្យម (MSMEs) ប្រមាណ ២/៣ បាននិងកំពុងអនុវត្តសកម្មភាពឌីជីថលក្នុងប្រតិបត្តិការ។
លោកបានបន្តថា ស្របនឹងកំណើនដ៏គួរឱ្យកត់សម្គាល់នេះ រាជរដ្ឋាភិបាលបានបង្កើតជាបទប្បញ្ញត្តិ និងយន្តការជាច្រើនសំដៅធានាការពារ និងលើកកម្ពស់និរន្តរភាពនៃសេដ្ឋកិច្ច និងសង្គមឌីជីថល ដែលក្នុងនោះមាន៖ ការដាក់ឱ្យប្រើប្រាស់ច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក ច្បាប់ស្តីពីកិច្ចការពារអ្នកប្រើប្រាស់ ច្បាប់ស្តីពីការទូទាត់ដែលមានកិច្ចធានា ច្បាប់ស្តីពីការប្រកួតប្រជែង យុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិក ព្រមទាំងក្របខ័ណ្ឌគោលនយោបាយសង្គម និងសេដ្ឋកិច្ចឌីជីថលកម្ពុជាឆ្នាំ ២០២១-២០៣៥ ជាដើម។
លោក សុភ័ក្ត្រ បញ្ជាក់ថា៖ «កម្ពុជាបានជួបប្រទះ ពិសេសកង្វះខាតនៃប្រព័ន្ធហេដ្ឋារចនាសម្ព័ន្ធរូបវន្តសម្រាប់គាំទ្រសេដ្ឋកិច្ចឌីជីថល កង្វះខាតធនធានមនុស្ស និងភាពនៅមានកម្រិតនៃបទប្បញ្ញត្តិចាំបាច់ ដែលត្រូវការការគាំទ្រពីដៃគូនានា រួមទាំងសិង្ហបុរី»។
ជាមួយគ្នានេះ លោក Alvin Tan អនុរដ្ឋមន្ត្រីពាណិជ្ជកម្ម និងឧស្សាហកម្មសិង្ហបុរី បានលើកឡើងថា កម្ពុជាបានសម្របខ្លួនអនុវត្តសកម្មភាពឌីជីថលបានយ៉ាងច្រើន និងឆាប់រហ័សធៀបនឹងប្រទេសក្នុងតំបន់។ សិង្ហបុរីនឹងបញ្ជូនអ្នកជំនាញការឱ្យមកផ្តល់ជាជំនាញបច្ចេកទេសផ្នែកឌីជីថលដល់ SMEs នៅកម្ពុជា។
លោកបន្តថា៖ «កម្ពុជាគួរពិចារណាគាំទ្រការសិក្សារួមគ្នាស្តីពីការធ្វើអត្តសញ្ញាណធុរកិច្ចរួមមួយសម្រាប់តំបន់អាស៊ាន ដើម្បីធានាសង្គតិភាពនៃការស្តុកទុកព័ត៌មានធុរកិច្ចក្នុងតំបន់នេះ និងគាំទ្រអន្តរប្រតិបត្តិការ (Interoperability) នៃការធ្វើធុរកិច្ចបែបឌីជីថលក្នុងតំបន់ផងដែរ»។
លោក Alvin Tan ក៏បានស្នើកម្ពុជាឱ្យជួយបន្ថែមការផ្សព្វផ្សាយពីអត្ថប្រយោជន៍នានាក្រោមច្បាប់វិនិយោគថ្មីដល់វិនិយោគិន និងធុរជនសិង្ហបុរីនៅកម្ពុជា និងបានគាំទ្រសំណើកម្ពុជាក្នុងការបង្កើតក្របខ័ណ្ឌឌីជីថលលើទីផ្សារបន្ថែមទៀត ពិសេសទីផ្សារអេឡិចត្រូនិក (E-Marketplaces) សំដៅពង្រឹងសកម្មភាពពាណិជ្ជកម្មតាមប្រព័ន្ធអេឡិចត្រូនិកនៅក្នុង និងរវាងប្រទេសទាំង ២។
ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា លោក តែ តាំងប៉ បានប្រាប់ភ្នំពេញប៉ុស្តិ៍ថា ការប្រើបច្ចេកវិទ្យាឌីជីថលរបស់ SMEs កម្ពុជានៅមានកម្រិតនៅឡើយ ដូចនេះពិតជាចាំបាច់ណាស់ដែលកម្ពុជាត្រូវការប្រទេសជឿនលឿនដូចសិង្ហបុរី ជួយបណ្តុះបណ្តាលបន្ថែម។
លោកបានបញ្ជាក់ថា៖ «ការប្រើប្រាស់បច្ចេកវិទ្យាឌីជីថល ពិតជាមានភាពចាំបាច់ណាស់នៅក្នុងបរិបទកូវីដ ១៩ នេះ ដែលតម្រូវឱ្យសមាគមបើកវគ្គបណ្តុះបណ្តាលជំនាញនេះ ដោយមិនគិតថ្លៃជាបន្តបន្ទាប់ ប៉ុន្តែអ្នកចូលរួមនៅមានកម្រិត ដូច្នេះម្ចាស់ SMEs គួរចំណាយពេលក្នុងសិក្សាជំនាញនេះបន្ថែម ដើម្បីដើរឱ្យទាន់សម័យកាលទំនើបរបស់សកលលោក»៕ LA