ទីក្រុងបាងកកៈ ប្រទេសថៃ និងអារ៉ាប៊ីសាអ៊ូឌីតបានព្រមព្រៀងគ្នាកាលពីថ្ងៃអង្គារថានឹងបង្កើតក្រុមប្រឹក្សាកិច្ចសហប្រតិបត្តិការ ដើម្បីពង្រឹងទំនាក់ទំនងទ្វេភាគីបន្ថែមទៀត។
ប្រទេសទាំង ២ ក៏បានយល់ព្រមក្នុងការលើកលែងលក្ខខណ្ឌតម្រូវទិដ្ឋាការសម្រាប់កិច្ចការការទូត និងកិច្ចការរដ្ឋាភិបាល ខណៈដែលប្រទេសអារ៉ាប៊ីសាអូឌីតនឹងពិចារណាជួយដល់ជនជាតិថៃចំនួន ៨០០ នាក់ដែលទិដ្ឋាការបានផុតកំណត់។
លោក Don Pramudwinai រដ្ឋមន្ត្រីក្រសួងការបរទេសបានបង្ហាញពីការអភិវឌ្ឍទាំងនេះ បន្ទាប់ពីកិច្ចជាមួយសមភាគីអារ៉ាប៊ីសាអ៊ូឌីតព្រះអង្គម្ចាស់ Faisal bin Farhan Al Saud នៅទីក្រុងរីយ៉ាដនៅថ្ងៃអង្គារ។
លោក Don បានថ្លែងថា៖ «ព្រះអង្គម្ចាស់ Faisal បានឱ្យដឹងថាព្រះអង្គនឹងទៅបំពេញទស្សនកិច្ចនៅប្រទេសថៃក្នុងខែមិថុនា ដើម្បីរៀបចំដំណើរទស្សនកិច្ចរបស់រាជទាយាទព្រះអង្គម្ចាស់ Mohammad bin Salman»។
ទន្ទឹមនឹងនោះលោកបានឱ្យដឹងថាប្រទេសថៃនឹងតែងតាំងឯកអគ្គរដ្ឋទូតរបស់ខ្លួនប្រចាំប្រទេសអារ៉ាប៊ីសាអូឌីត នៅក្នុងត្រីមាសទី ៣ ឆ្នាំនេះ។
លោកបានលើកឡើងថា៖ «ប្រទេសអារ៉ាប៊ីសាអ៊ូឌីតបានចាប់ផ្តើមជើងហោះហើរត្រង់ទៅកាន់ប្រទេសថៃរួចហើយហើយយើងជឿជាក់ថា ជនជាតិអារ៉ាប៊ីសាអ៊ូឌីតជាច្រើននឹងធ្វើដំណើរទៅកាន់ប្រទេសនេះ»។ លោកបន្តថា៖ «ទន្ទឹមនឹងនេះប្រទេសអារ៉ាប៊ីសាអ៊ូឌីតក៏ចង់ឱ្យប្រជាជនថៃមកទស្សនាប្រទេសនេះ»។
លោក Don បានបន្ថែមថា គោលបំណងដំណើរទស្សនកិច្ចនេះគឺដើម្បីភ្ជាប់ទំនាក់ទំនងក្រុមហ៊ុនមកពីប្រទេសទាំង ២ ដូច្នេះពួកគេអាចទទួលបានឱកាសច្រើនបំផុត។
លោកបានថ្លែងថា៖ «យើងដឹងថាយ៉ាងហោចណាស់ការងារចំនួន ៥០០ ពាន់កន្លែងនៅក្នុងវិស័យសំណង់ និងសេវាកម្មពាក់ព័ន្ធផ្សេងទៀតអាចរកបានក្នុងនោះប្រហែល ២០០ពាន់កន្លែងនឹងត្រូវបម្រុងទុកសម្រាប់ជនជាតិថៃ»៕The Nation-ann/LA