ទីក្រុងវៀងចន្ទន៍៖ អណ្តូងរ៉ែមាសក្រោមដី ដែលទើបនឹងរកឃើញថ្មីទើបតែបានចាប់ផ្តើមប្រតិបត្តិការនឹងជំរុញការផលិតរ៉ែយ៉ាងសំខាន់ ដោយក្រុមហ៊ុន Lane Xang Minerals Ltd (LXML) និងនាំមកនូវផលប្រយោជន៍សង្គម និងសេដ្ឋកិច្ចដល់ប្រទេសឡាវ។
LXML ជាក្រុមហ៊ុនផលិតរ៉ែឈានមុខគេមួយនៅក្នុងប្រទេសឡាវបានឱ្យដឹងនៅក្នុងសេចក្ដីប្រកាសព័ត៌មានមួយថាជាមួយនឹងធនធានចំនួន ៩,៥ លានតោន និងផលិតកម្មរ៉ែដែលត្រូវបានព្យាករថានឹងកើនឡើងពី ៤០០ ០០០ តោនក្នុងឆ្នាំ ២០២៣ ដល់ ១,២ លានតោនក្នុងមួយឆ្នាំ។ ការរកឃើញអណ្ដូងរ៉ែក្រោមដីជម្រៅ ជ្រៅនេះត្រូវបានរំពឹងថានឹងបន្តអាយុកាលអណ្តូងរ៉ែរបស់ទីក្រុង Sepon យ៉ាងហោចណាស់ ៧ ឆ្នាំទៀតដល់ឆ្នាំ ២០៣០។
លោក Thongphat Inthavong អនុរដ្ឋមន្ត្រីក្រសួងថាមពល និងរ៉ែ និងជាប្រធានគណៈកម្មាធិការគ្រប់គ្រងគម្រោង Sepon និងអ្នកពាក់ព័ន្ធផ្សេងទៀតរបស់រដ្ឋាភិបាលបានទៅពិនិត្យមើលអណ្តូងរ៉ែ Sepon របស់ក្រុមហ៊ុន LXML ក្នុងខេត្ត Savannakhet កាលពីថ្ងៃទី ១៦ ខែឧសភា ដើម្បីបើកនូវអ្វីដែលក្រុមហ៊ុនមួយនេះ អះអាងថាជាអណ្តូងរ៉ែក្រោមដីដ៏ទំនើបដំបូងគេនៅក្នុងប្រទេសឡាវ។
ការរកឃើញ និងការរំពឹងទុកការកើនឡើងក្នុងការផលិត នឹងរួមចំណែកដល់ការកាត់បន្ថយភាពក្រីក្រ និងការអភិវឌ្ឍប្រកបដោយចីរភាព នៅក្នុងសហគមន៍មូលដ្ឋាន។ នេះបើយោងតាមក្រុមហ៊ុន LXML ។
លោក Paul Harris អ្នកគ្រប់គ្រងទូទៅរបស់ក្រុមហ៊ុន LXML បានថ្លែងថា៖ «ការអភិវឌ្ឍថ្មីនេះនឹងប្រើប្រាស់ឧបករណ៍រុករករ៉ែ ក្រោមដីដ៏ទំនើប និងបច្ចេកទេសរុករករ៉ែកម្រិតខ្ពស់ ដើម្បីផ្ទេរចំណេះដឹង និងជំនាញដល់បុគ្គលិកជនជាតិឡាវ និងក្រុមហ៊ុនម៉ៅការបន្តអ្នកជំនាញការរុករករ៉ែឡាវ ដើម្បីកំណត់ស្តង់ដាថ្មីសម្រាប់ការជីកយករ៉ែក្រោមដី»។
ថ្លែងសុន្ទរកថាក្នុងពិធីបើកដំណើរការនេះលោក Saman Aneka នាយកគ្រប់គ្រងបានឱ្យដឹងថា មូលនិធិបរធនសហគមន៍របស់ក្រុមហ៊ុន LXML បានរួមចំណែកដល់ជីវភាពរស់នៅកាន់តែប្រសើរឡើងនៅក្នុងវិស័យសំខាន់ៗចំនួន ៣ គឺសន្តិសុខស្បៀងសុខាភិបាល និងការអប់រំសម្រាប់មនុស្សជំនាន់ក្រោយ។
លោកបានបន្ថែមថា ការជីកយករ៉ែក្រោមដីនេះជាប្រតិបត្តិការក្រោមដីដំបូងគេក្នុងប្រទេសឡាវដែលអនុលោមតាមលក្ខខណ្ឌតម្រូវការវាយតម្លៃផលប៉ះពាល់បរិស្ថាន និងសង្គម (ESIA)។ រហូតមកដល់ពេលនេះ ក្រុមហ៊ុន LXML បានផ្តល់ប្រាក់ចំនួន ១១ លានដុល្លារដល់មូលនិធិបរធនសហគមន៍ និង ៤៩ លានដុល្លារក្នុងការបង្កើតប្រាក់ចំណូលសម្រាប់ក្រុមធុរកិច្ចក្នុងស្រុក។
ក្រុមហ៊ុន LXML បាននាំយកអ្នកជំនាញអន្តរជាតិ និងឧបករណ៍ឯកទេសទៅប្រទេសឡាវសម្រាប់គម្រោងដ៏សំខាន់មួយនេះ។
យុទ្ធសាស្ត្រកំណើនបៃតងថ្នាក់ជាតិរបស់រដ្ឋាភិបាលឡាវទទួលស្គាល់ឧស្សាហកម្មរ៉ែជាវិស័យអាទិភាពមួយ ដោយសារតែការរួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ច ហើយអណ្ដូងរ៉ែ Sepon របស់ក្រុមហ៊ុន LXML ត្រូវបានផ្ដល់ចំណាត់ថ្នាក់ A+ ជាប្រចាំដោយក្រសួងថាមពល និងរ៉ែសម្រាប់ការរក្សាបាននូវស្តង់ដាអន្តរជាតិកម្រិតខ្ពស់៕Vientiane Time-ANN/LA