ការបង្ហាញកិច្ចព្រមព្រៀងរវាង Aeon Mall(Cambodia) និង MICROMAX។ សហការី
ភ្នំពេញៈ ក្រុមហ៊ុន Aeon Mall (Cambodia) Co., Ltd និងក្រុមហ៊ុន MICROMAX Co., Ltd បានចុះកិច្ចព្រមព្រៀងភាពជាដៃគូសម្រាប់ការអភិវឌ្ឍហេដ្ឋារចនាសម្ព័ន្ធខ្សែកាបអុបទិកសម្រាប់ អ៊ីអនម៉ល ៣ ដែលជាគម្រោងវិនិយោគមានទឹកប្រាក់ជាង ២០០ លានដុល្លារ ហើយរំពឹងថា នឹងបើកដំណើរការក្នុងឆ្នាំ ២០២៣ ខាងមុខនេះ។
.jpg)
កិច្ចព្រមព្រៀងនេះបានធ្វើឡើងកាលពីថ្ងៃទី ២០ ខែមិថុនា ដោយមានការចុះហត្ថលេខារវាងលោក Tsuboya Masayuki នាយកគ្រប់គ្រងនៃក្រុមហ៊ុន Aeon Mall (Cambodia) Co., Ltd និងលោកស្រី លឹម នាងនាថ អគ្គនាយិកាក្រុមហ៊ុន MICROMAX Co., Ltd។
លោក Tsuboya Masayuki បានឱ្យដឹងថា Aeon Mall (Cambodia) Co.,Ltd និងក្រុមហ៊ុន MICROMAX មានប្រវត្តិសហការរយៈពេលយូរមកហើយលើសេវាកម្មហេដ្ឋារចនាសម្ព័ន្ធខ្សែកាបអុបទិក។ លោកបន្តថា កាលពីឆ្នាំ ២០១៧ ផ្សារទំនើប Aeon Mall Sen Sok City បានជ្រើសរើសក្រុមហ៊ុន MICROMAX ជាដៃគូសេវាកម្មខ្សែកាបអុបទិក ដែលតែងតែផ្តល់លើសពីសេវាកម្ម ពិសេសមានការរៀបចំក្រុមការងារប្រកបដោយភាពច្នៃប្រឌិត និងជួយសម្រួលដល់ក្រុមហ៊ុន Aeon។
លោកថ្លែងថា៖ «សម្ព័ន្ធភាពនេះឆ្លុះបញ្ចាំងអំពីទំនុកចិត្ត និងការប្តេជ្ញាចិត្តរបស់ក្រុមហ៊ុនចំពោះការទទួលខុសត្រូវខ្ពស់បំផុតរបស់ពួកគេ។ ដូច្នេះហើយ កាលពីឆ្នាំ ២០២០ យើងបានជ្រើសរើសសេវាកម្មខ្សែកាបអុបទិករបស់ MICROMAX សម្រាប់ Aeon Mall Phnom Penh ដើម្បីធានាបាននូវសេវាកម្មដ៏ល្អបំផុតដែលបម្រើអតិថិជនរបស់យើង ដូចដែលយើងជឿជាក់លើផលិតផល និងការប្តេជ្ញាចិត្តរបស់ពួកគេ»។
លោកស្រី លឹម នាងនាថ អគ្គនាយិកាក្រុមហ៊ុន MICROMAX Co., Ltd បានឱ្យដឹងថា ក្រុមហ៊ុនបានបង្កើតសមិទ្ធផលជាច្រើន និងបានបង្កើតភាពជាដៃគូប្លែកពីគេ។ ចំណុចសំខាន់មួយ គឺការរៀបចំបណ្តាញ និងហេដ្ឋារចនាសម្ព័ន្ធបច្ចេកវិទ្យានៅក្នុងសាខាទាំង ២ របស់ Aeon Mall ដែលជាក្រុមហ៊ុនអភិវឌ្ឍន៍ផ្សារទំនើបដ៏ធំបំផុតរបស់ប្រទេសជប៉ុន។
លោកស្រីបន្ថែមថា ទី១ គឺអ៊ីអនម៉លភ្នំពេញទី២ អ៊ីអនម៉ល សែនសុខ ស៊ីធី និងទី៣ អ៊ីអនម៉ល មានជ័យ ដែលសាងសង់លើផ្ទៃដីទំហំ ១៧ ហិកតា នៅតាមបណ្ដោយមហាវិថីសម្តេចតេជោ ហ៊ុន សែន និងគ្រោងបើកសម្ពោធជាផ្លូវការនាពេលដ៏ខ្លីខាងមុខនេះ។
លោកស្រីប្រាប់ថា៖ «ខ្ញុំមានសេចក្តីរីករាយជាខ្លាំង ដើម្បីប្រកាសជាផ្លូវការ និងជាសាធារណៈនូវគម្រោងប្រកបដោយជោគជ័យ ដែលយើងបានជួយលើអ៊ីអនម៉លកម្ពុជា ដែលបានបង្កើតសាខាចំនួន ៣ នៅក្នុងប្រទេស»។
គម្រោងសាងសង់ផ្សារទំនើបអ៊ីអន ៣ បានចាប់ផ្តើមដំណើរការក្នុងខែតុលា ឆ្នាំ ២០២០។ ផ្សារទំនើបកម្ពស់ ៥ ជាន់នេះ នឹងសាងសង់ប្រើពេល ២៧ ខែ។ ក្រុមហ៊ុន Hyundai Engineering បានឈ្នះការដេញថ្លៃសាងសង់អគារដែលមានតម្លៃ ២០០ ពាន់លានវ៉ុន (១៦៤ លានដុល្លារ) នេះ៕ LA
