កត្តា​អាកាសធាតុ​​ ជំរុញ​ឱ្យ​ការប្រមូលផល​ម្រេច​ ឆ្នាំនេះ ​កើន​ខ្ពស់ជាង​ឆ្នាំមុន

Content image - Phnom Penh Post
នៅ​កម្ពុជា ផ្ទៃដី​ដាំ​ម្រេច​អាចមាន​ជាង ៦​ ពាន់​ហិកតា ហើយ​ក្នុង​ ១ ​ហិកតា អាច​ផ្តល់​ផល​ជា​មធ្យម​ចន្លោះ​ពី ៣-៤ ​តោន​។ ភ្នំពេញ​ប៉ុស្តិ៍

ភ្នំពេញៈ ទិន្នផល​ម្រេច​កម្ពុជា​ក្នុង​ឆ្នាំ​ ២០២២ អាច​កើន​លើស​ឆ្នាំមុន​ប្រមាណ​ ១០​ ភាគរយ ខណៈ​ការប្រមូលផល​នៅពេលនេះ​សម្រេចបាន​ជាង ៩០ ​ភាគរយ​ហើយ​។ នេះ​បើតាម​អ្នក​នៅក្នុង​ផលិតកម្ម​ម្រេច​កម្ពុជា​។

ប្រធាន​សមាគម​លើកកម្ពស់​ម្រេច​កំពត ដែល​ជា​ផលិតផល​សម្គាល់​ភូមិសាស្ត្រ​ (GI) លោក ងួន ឡាយ បាន​ប្រាប់​ភ្នំពេញ​-​ប៉ុស្តិ៍ នា​ថ្ងៃទី​ ២៧ ខែមិថុនា ថា អាកាសធាតុ​ដែល​មាន​ភ្លៀង​ធ្លាក់​ច្រើន​កាលពី​អំឡុង​ខែ​កុម្ភៈ មីនា និង​មេសា បានធ្វើឱ្យ​ផល​ម្រេច​កំពត​ក្នុងឆ្នាំនេះ​អាច​កើនឡើង​ប្រមាណ​ ១០ ​ភាគរយ បើ​ធៀប​ឆ្នាំ​ ២០២១ ហើយ​ផល​ម្រេច​របស់​ចម្ការ​ខ្នាតតូច និង​មធ្យម​ក៏ត្រូវ​បាន​ក្រុម​ឈ្មួញ​ធ្វើ​កិច្ចសន្យា​បញ្ជា​ទិញ​អស់​ស្ទើរ ១០០ ​ភាគរយ​ផងដែរ​។ ការធ្លាក់ភ្លៀង​ច្រើន​មិន​ត្រឹមតែ​ធ្វើឱ្យ​ម្រេច​បាន​ផល​ច្រើន​ប៉ុណ្ណោះ​ទេ ប៉ុន្តែ​ក៏បាន​ជួយ​កាត់បន្ថយ​ការចំណាយ​យ៉ាងច្រើន​ទៅលើ​តម្លៃ​ប្រេង​បូមទឹក​ស្រោច​ដើម​ម្រេច​ផងដែរ​។

លោក​និយាយថា​៖ «​បើ​មើល​តាម​កិច្ចសន្យា​ដែល​ឈ្មួញ​បាន​បញ្ជា​ទិញ​ពី​កសិករ​ក្នុង​សមាគម ខ្ញុំ​គិតថា ការនាំចេញ​ម្រេច​កំពត​ក្នុង​ឆ្នាំ​ ២០២២ នឹងមាន​ចំនួន​ច្រើនជាង​ឆ្នាំ​ ២០២១ ដែល​ពេលនោះ​ម្រេច​កំពត​ត្រូវបាន​នាំចេញ​ប្រមាណ ១១៤​ តោន ក្នុងចំណោម​ផល​ដែល​ប្រមូលបាន​ក្នុង​រង្វង់ ១២៥ ​តោន​»​។

ទាក់ទង​នឹង​កម្លាំង​ពលកម្ម លោក ងួន ឡាយ បាន​បញ្ជាក់ថា ក្នុង​ចង្វាក់​ផលិតកម្ម​ម្រេច​ពេលបច្ចុប្បន្ន​ក៏​កំពុង​ប្រឈម​នឹង​កង្វះ​កម្លាំង​ពលកម្ម​ច្រើន​ដែរ ដោយ​មានតែ​មនុស្ស​ចាស់​នៅផ្ទះ​ប៉ុណ្ណោះ ដែល​នៅ​បន្ត​ធ្វើ​ការងារ​នេះ​។

យោងតាម​លោក ងួន ឡាយ ខ្នាតតូច សំដៅ​ដល់​ចម្ការ​ដែលមាន​ម្រេច ពី ១០០-១ ៥០០ ​គុម្ព និង​មធ្យម មាន​ម្រេច​ចន្លោះ​ពី ១ ៥០០-៣ ០០០ ​គុម្ព និង​លើសពី ៣ ០០០ ​គុម្ព ត្រូវបាន​ចាត់ទុកថា​ខ្នាត​ធំ​។ ជា​មធ្យម ១ ​ហិកតា គេ​អាច​ដាំ​ម្រេច​បាន​ប្រហែល ២ ៥០០ ​គុម្ព​។

ជាធម្មតា​ដំណាំ​ម្រេច​ត្រូវបាន​កសិករ​ប្រមូលផល​ចន្លោះ​ពី​ខែ​មករា ដល់​ចុងខែ​មិថុនា​នៃ​ឆ្នាំ​នីមួយៗ ប៉ុន្តែ​ការប្រមូល​ផល​នឹងត្រូវ​អូសបន្លាយ​ពី​ ២៥-៦០ ​ថ្ងៃ​បន្ថែម បើ​គេ​ចង់បាន​ម្រេច​ក្រហម ឬ​ម្រេចស​ច្រើន​។

សម្រាប់​ម្រេច​កំពត​ (GI) គឺ​ម្រេចខ្មៅ​មាន​តម្លៃ ១៥ ​ដុល្លារ​ក្នុង​ ១​ គីឡូក្រាម​, ម្រេច​ក្រហម ២៥ ​ដុល្លារ និង​ម្រេចស តម្លៃ ២៨ ​ដុល្លារ ដែល​តម្លៃ​នេះ​នៅ​ទ្រឹង ៦-៧ ​ឆ្នាំ​មកហើយ​។

ប្រធាន​សមាគម​លើកកម្ពស់​ម្រេច​កំពត​លើកឡើង​ទៀតថា​៖ «​ការនាំចេញ​ផលិតផល​ម្រេច​កំពត​ (GI) ត្រូវ​រំពឹងថា នឹងមាន​កំណើន​ខ្ពស់​បន្ថែម​ទៀត ខណៈ​ពីមុន ម្រេច​កំពត​មាន​តែ​ទីផ្សារ​នៅ​តំបន់​អឺរ៉ុប​ប៉ុណ្ណោះ ប៉ុន្តែ​ពេលនេះ​វា​ក៏​ត្រូវបាន​គេ​នាំចេញ​ទៅ​កាន់​ប្រទេស​នៅ​តំបន់​មជ្ឈិមបូព៌ា​ផងដែរ​»​។

លោក ម៉ាក់ នី ប្រធាន​សហព័ន្ធ​ម្រេច និង​គ្រឿងទេស​កម្ពុជា​បាន​ប្រាប់ថា ការប្រមូលផល​ម្រេច​នៅ​ទូទាំង​ប្រទេស​ពេលនេះ សម្រេចបាន​ជាង​ ៩០ ​ភាគរយ​ហើយ ខណៈ​ទិន្នផល​អាច​កើន​ប្រមាណ ១០​ ភាគរយ​បើ​ធៀប​ទៅនឹង​ឆ្នាំមុន​។ ចំណែក​តម្លៃ​ម្រេច​ពេលនេះ គឺ​ប្រហាក់ប្រហែល​ឆ្នាំមុន ប៉ុន្តែ​បើតាម​ការព្យាករ វា​អាច​កើនឡើង​បន្តិច​នៅ ២-៣ ​ខែ​ខាងមុខ​។ ភាពល្អប្រសើរ​នៃ​តម្លៃ និង​បរិមាណ​ការបញ្ជាទិញ គឺ​ដោយសារ​ស្ថានភាព​សេដ្ឋកិច្ច​ពិភពលោក​ចាប់ផ្តើម​ល្អ​បើ​ធៀប​នឹង​ឆ្នាំ​ ២០២១​។

លោក​ថ្លែងថា​៖ «​នៅពេល​ស្ថានភាព​សេដ្ឋកិច្ច​ល្អ ការធ្វើ​ដំណើរ​កម្សាន្ត​នឹង​កើនឡើង ហើយ​ពេលនោះ​តម្រូវ​ការប្រើប្រាស់ និង​បរិភោគ​ក៏​កើនឡើង​ទៅតាម​នោះដែរ​»​។

បើតាម​លោក ម៉ាក់ នី ទីផ្សារ​នាំចេញ​ម្រេច​កម្ពុជា​ធំជាងគេ គឺ​ប្រទេស​វៀតណាម ដែល​អាចមាន​ចន្លោះ ៧០-៨០ ​ភាគរយ និង​ទីផ្សារ​ប្រទេស​ថៃ​មាន​ប្រហែល ១៥ ​ភាគរយ ក្រៅពីនេះ​គឺ​ទីផ្សារ​នាំចេញ​ទៅកាន់​គោលដៅ​ផ្សេងៗ​ទៀត​។

នៅ​កម្ពុជា ផ្ទៃដី​ដាំ​ម្រេច​អាចមាន​ជាង ៦​ ពាន់​ហិកតា ហើយ​ក្នុង​ ១ ​ហិកតា អាច​ផ្តល់​ផល​ជា​មធ្យម​ចន្លោះ​ពី ៣-៤ ​តោន​។

របាយការណ៍​ក្រសួង​កសិកម្ម រុក្ខាប្រមាញ់ និង​នេសាទ​បាន​ឱ្យ​ដឹងថា​រយៈពេល ៥​ ខែ​ដើម​ឆ្នាំ ​២០២២ ការនាំចេញ​ម្រេច​សម្រេចបាន ៥ ៥៥៨,៥៨ ​តោន ថយចុះ ២៥,៥ ​ភាគរយ​។ ក្នុងនោះ​នាំចេញ​ទៅ​វៀតណាម ៥ ១៣១,៥១ ​តោន​, អាល្លឺម៉ង់ ៣៥៥,៧៨​ តោន​, កោះ​តៃវ៉ាន់ ២១ ​តោន​, ម៉ាឡេស៊ី ១៣,៦៤ ​តោន​, បារាំង ១០,៥១​ តោន​។ ចំណែក​ប្រទេស​ផ្សេងៗ​ទៀត​មានដូចជា បែលហ្ស៊ិក​, ជប៉ុន​, ឆេក​, ស៊ុយអ៊ែត​, កាណាដា​, អាមេរិក​, ឥណ្ឌា​, ចក្រភព​អង់គ្លេស​, កាហ្សាក់ស្ថាន​, កូរ៉េ និង​ប្រទេស​អូស្ត្រាលី​។

កាលពី​ឆ្នាំ​ ២០២១ កម្ពុជា​នាំចេញ​ម្រេច ២៨ ០៧៤ ​តោន កើនឡើង ៤៥២,៧២ ​ភាគរយ​បើ​ធៀប​នឹង​ឆ្នាំ​ ២០២០​។ នេះ​បើតាម​ក្រសួង​កសិកម្ម​៕

ព័ត៌មានថ្មីៗ