ធនាគារជាតិនៃកម្ពុជា។ រូបថត ភ្នំពេញ ប៉ុស្តិ៍
ភ្នំពេញៈ ធនាគារជាតិនៃកម្ពុជា (NBC) បង្ហាញថា ប្រតិបត្តិការរបស់ធនាគារ និងស្ថាប័នហិរញ្ញវត្ថុនៅកម្ពុជា បានដំណើរការយ៉ាងរលូន និងដ៏រឹងមាំនៅក្នុងត្រីមាសទី១ ឆ្នាំនេះ ដោយសារតែការស្ទុះងើបឡើងវិញយ៉ាងឆាប់រហ័សនៃសកម្មភាពអាជីវកម្មចាប់តាំងពីរាជរដ្ឋាភិបាលប្រកាសបើកដំណើរការសេដ្ឋកិច្ចសង្គមពេញលេញឡើងវិញ កាលពីខែវិច្ឆិកា ឆ្នាំ២០២១។ ទោះយ៉ាងណា អ្នកនៅក្នុងឧស្សាហកម្មនេះបានព្រមានថា វានឹងធ្លាក់ចុះក្នុងត្រីមាសទី២ ដោយសារកត្តាខាងក្រៅ។
.jpg)
ធនាគារជាតិនៃកម្ពុជា (NBC) កាលពីថ្ងៃទី ៣០ ខែមិថុនា បានចេញផ្សាយរបាយការណ៍មួយដែលបង្ហាញថា កាលពីចុងត្រីមាសទី១ ឆ្នាំ ២០២២ ធនាគារ និងគ្រឹះស្ថានហិរញ្ញវត្ថុបានផ្តល់ប្រាក់កម្ចីដល់វិស័យឯកជនចំនួន ២០៥,៤ ពាន់ពាន់លានរៀល (៥០,៧ ពាន់លានដុល្លារ) កើន ២២,៤ ភាគរយ បើធៀបនឹងចុងត្រីមាសទី១ ឆ្នាំមុន ដើម្បីបំពេញតម្រូវការវិនិយោគ និងសកម្មភាពសេដ្ឋកិច្ច។
ការផ្ដល់ឥណទានដល់វិស័យឯកជនគ្របដណ្តប់លើវិស័យសំណង់ ១៣,៧ ពាន់លានដុល្លារ កើន ២៩,៣ ភាគរយ ធៀបនឹងឆ្នាំមុន។ ពាណិជ្ជកម្មលក់ដុំ និងរាយចំនួន ១២,៦ ពាន់លានដុល្លារ កើន ២៦,១ ភាគរយ, វិស័យសេវាកម្ម ៥ ពាន់លានដុល្លារ កើន ១១,៥ ភាគរយ, វិស័យកសិកម្ម ៤,៨ ពាន់លានដុល្លារ កើន ១១,៦ ភាគរយ, ឥណទានទៅលើអង្គភាពគ្រួសារ ចំនួន ២,៧ ពាន់លានដុល្លារ កើន ៣៧ ភាគរយ, ផ្នែកកម្មន្តសាល ១,៧ ពាន់លានដុល្លារ កើន ២៤,៨ ភាគរយ និងផ្នែកផ្សេងៗ ១០,២ ពាន់លានដុល្លារ កើន ១៦,៨ ភាគរយ។
លោក តូច ចៅចេក អគ្គនាយកធនាគារប្រៃសណីយ៍ បានប្រាប់ ភ្នំពេញ ប៉ុស្តិ៍ ក្នុងថ្ងៃទី ៣០ ខែមិថុនាថា ប្រតិបត្តិការទូទៅនៃឧស្សាហកម្មនេះដំណើរការល្អកាលពីត្រីមាសទី១ ដោយសារសកម្មភាពសេដ្ឋកិច្ចកំពុងមានភាពប្រសើរឡើង បន្ទាប់ពីរដ្ឋាភិបាលប្រកាសបើកដំណើរការសេដ្ឋកិច្ចសង្គមឡើងវិញ កាលពីខែវិច្ឆិកា ឆ្នាំមុន។
ទន្ទឹមនឹងនេះ លោកបានឱ្យដឹងថា ប្រាក់កម្ចីធនាគារលោកបានកើនឡើងជាបណ្តើរៗជាង ១០ ភាគរយដែលគិតត្រឹមត្រីមាសទី១ ឆ្នាំនេះ ទាបជាងក្នុងត្រីមាសទី១ ឆ្នាំ ២០២១ ជាមួយនឹងកំណើនដ៏រឹងមាំមានចំនួនជាង ២០ ភាគរយ។
លោកថ្លែងថា៖ «ខ្ញុំមើលឃើញថា ប្រតិបត្តិការរបស់ឧស្សាហកម្មទាំងមូលកំពុងដំណើរការល្អ ព្រោះមានតម្រូវការអាជីវកម្ម និងការវិនិយោគកាន់តែច្រើន។ ទោះជាយ៉ាងណាក្នុងពេលជាមួយគ្នានេះ ដោយសារតែបញ្ហាបច្ចុប្បន្ននៃសង្គ្រាមនៅប្រទេសអ៊ុយក្រែន ដែលជំរុញឱ្យមានការកើនឡើងអតិផរណា ការកើនឡើងតម្លៃប្រេងនឹងរារាំងរំហូរនៃការវិនិយោគផ្ទាល់ពីបរទេសសម្រាប់ត្រីមាសទី២ បញ្ហាទាំងនេះនឹងនាំឱ្យមានការថយចុះតម្រូវការប្រាក់កម្ចី»។
ធនាគារ ABA កាលពីថ្ងៃទី ១៧ ខែឧសភា បានរាយការណ៍ថា មានប្រាក់កម្ចីថ្មីចំនួន ១២ ៦២២ មានតម្លៃ ៥៩០,៣ លានដុល្លារ ក្នុងត្រីមាសនេះ ដោយបង្កើនផលបត្រប្រាក់កម្ចីសរុបរបស់ខ្លួនចំនួន ៨ ភាគរយ ដល់ ៥,៨ ពាន់លានដុល្លារ គិតត្រឹមថ្ងៃទី ៣១ ខែមីនា។
ទោះបីមានភាពមិនប្រាកដប្រជានៃសេដ្ឋកិច្ចពិភពលោក លោក ចៅចេក នៅតែមានសុទិដ្ឋិនិយមថា សកម្មភាពធុរកិច្ចរបស់កម្ពុជាមានភាពរឹងមាំគួរសម ហើយអត្រាអតិផរណានៅតែមានកម្រិតទាប។
លោកបន្តថា៖ «យើងនៅតែផ្តល់ប្រាក់កម្ចីដល់វិស័យដែលមានតម្រូវការ ប៉ុន្តែមានការប្រុងប្រយ័ត្នកាន់តែខ្លាំង»៕
