ភ្នំពេញ៖ កម្ពុជា នឹងទាញផលប្រយោជន៍បានជាអតិបរមា ក្នុងការទាក់ទាញអ្នកវិនិយោគបន្ថែមទៀត នៅក្នុងអំឡុងពេលរៀបចំកិច្ចប្រជុំកំពូលធុរកិច្ច និងវិនិយោគអាស៊ាន ដែលគ្រោងនឹងប្រារព្ធឡើងនៅខែវិច្ឆកា ឆ្នាំ ២០២២ ខាងមុខនេះ ស្របពេលដែលកម្ពុជា ធ្វើជាម្ចាស់ផ្ទះ នៃកិច្ចប្រជុំកំពូលអាស៊ានលើកទី ៤។
សភាពាណិជ្ជកម្មកម្ពុជា កាលពីថ្ងៃទី ២៩ ខែមិថុនា ឆ្នាំ២០២២ បានសហការជាមួយក្រុមប្រឹក្សាពិគ្រោះយោបល់ធុរកិច្ចអាស៊ានរៀបចំកិច្ចប្រជុំលើកទី៩៣ ដើម្បីពិភាក្សាការងារមួយចំនួន និងរៀបចំពិធីប្រកាសជាផ្លូវការនូវការរៀបចំកិច្ចប្រជុំកំពូលធុរកិច្ច និងវិនិយោគអាស៊ានឆ្នាំ ២០២២ និងពានរង្វាន់ធុរកិច្ចអាស៊ានឆ្នាំ ២០២២។ កិច្ចប្រជុំកំពូលធុរកិច្ច និងវិនិយោគអាស៊ាន គឺជាព្រឹត្តិការណ៍ប្រចាំឆ្នាំដ៏ធំបំផុតរបស់អាស៊ាន ដែលតែងតែមានការចូលរួមពីថ្នាក់ដឹកនាំក្នុងតំបន់ និងពិភពលោក ដើម្បីពិភាក្សាទៅលើប្រធានបទដ៏មានសារៈសំខាន់ចំពោះសេដ្ឋកិច្ច និងការរីកចម្រើនតំបន់អាស៊ាន។
លោក លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍ថា កម្ពុជានឹងទទួលបានផលប្រយោជន៍ដ៏ច្រើនពីការរៀបចំកិច្ចប្រជុំកំពូលធុរកិច្ច និងវិនិយោគអាស៊ាន ដែលនេះសំខាន់ជាមុខមាត់ ជាកិត្តិយសរបស់ប្រទេសជាតិ ក៏ដូចជាធ្វើឱ្យកម្ពុជា កាន់តែមានភាពលេចធ្លោក្នុងតំបន់អាស៊ាន សកលលោក និងនៅលើឆាកអន្តរជាតិ។
លោកបានបញ្ជាក់ទៀតថា៖ «ក្នុងនាម ជាប្រធានកិច្ចប្រជុំ យើងនឹងប្រើឱកាសនេះ ដើម្បីផ្សព្វផ្សាយពីសក្ដានុពលសេដ្ឋកិច្ចរបស់យើងបន្ថែមទៀត ព្រោះថា យើងមិនមែនមានត្រឹមតែអាស៊ាននោះទេ យើងមានអាស៊ានបូក ៦ ដែលមាន អូស្ត្រាលី ចិន ជប៉ុន កូរ៉េ ឥណ្ឌា ញ៉ូហ្សែន ចូលរួមផងដែរ។ នេះគឺជាឱកាសរបស់យើង ក្នុងការបង្ហាញមុខមាត់ និងកាលានុវត្តភាព ក្នុងការវិនិយោគរបស់កម្ពុជា នៅក្នុងសហគមន៍សេដ្ឋកិច្ចអាស៊ានផងនិងនៅលើឆាកអន្តរជាតិ»។
លោកបានបន្ថែមថា ស្ថិតនៅក្នុងបរិបទកូវីដ១៩ នេះរៀបចំកិច្ចប្រជុំកំពូលធុរកិច្ច និងវិនិយោគអាស៊ាន ២០២២ នឹងត្រូវធ្វើឡើងតាមរយៈប្រព័ន្ធវីដេអូពីចម្ងាយផង និងធ្វើដោយផ្ទាល់ផង។ ស្របពេលជាមួយគ្នានោះដែរ នឹងមានការរៀបចំកម្មវិធីប្រគល់ពានរង្វាន់ធុរកិច្ចអាស៊ាន គឺជាពានរង្វាន់សម្រាប់ក្រុមហ៊ុនឆ្នើម ក្នុងអាស៊ានដែលចូលរួមចំណែកលើកកម្ពស់ជីវភាពប្រជាជន និងជំរុញកិត្យានុភាពអាស៊ាន។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ឱ្យដឹងដែរថា ក្នុងនាម ជាប្រធានអាស៊ានប្តូរវេន កម្ពុជាអាចនឹងប្រើឱកាសនេះ ក្នុងការបង្ហាញពីសក្តានុពលក្នុងវិនិយោគដល់ប្រទេសជាសមាជិកអាស៊ាន និងបណ្តាប្រទេសផ្សេងៗទៀត ដែលបានចូលរួមនៅក្នុងកិច្ចប្រជុំកំពូលនេះ។
លោកបានបញ្ជាក់ថា៖ «រាជរដ្ឋាភិបាលកម្ពុជា បានបង្កើតលក្ខខណ្ឌវិនិយោគថ្មីជាច្រើន ដែលមានលក្ខណៈអំណោយផលដល់អ្នកវិនិយោគ ដែលមានបំណងចង់វិនិយោគលើវិស័យសក្តានុពលមួយចំនួននៅកម្ពុជា។ FDI នេះ បានដើរតួនាទីយ៉ាងសំខាន់នៅក្នុងកិច្ចអភិវឌ្ឍសេដ្ឋកិច្ចកម្ពុជា ទាំងមុន និងអំឡុងពេលមានកូវីដ១៩»។
កិច្ចប្រជុំកំពូលធុរកិច្ច និងវិនិយោគអាស៊ាន នឹងមានការចូលរួមដោយប្រមុខរដ្ឋ ប្រមុខរដ្ឋាភិបាលអាស៊ាន រួមនឹងប្រទេសផ្សេងៗនៅទូទាំងពិភពលោក។ នាយកប្រតិបត្តិរបស់ក្រុមហ៊ុនធំៗ ក៏មានវត្តមាននៅក្នុងកិច្ចប្រជុំនេះផងដែរ ដើម្បីចែករំលែកបទពិសោធ និងពិភាក្សាលើប្រធានបទនានាពាក់ព័ន្ធនឹងអាស៊ាន៕