ភ្នំពេញៈកម្ពុជាជា​ប្រទេស​ដែល​មាន​ខឿន​សេដ្ឋកិច្ច​ជាតិពឹង​ផ្អែក​មួយ​ភាគ​ធំ​ទៅ​លើ​វិស័យ​កសិកម្ម​ ជា​ពិសេស​នៅក្នុង​អំឡុង​ពេល​វិបត្តិ​កូ​វីដ ១៩ ​នេះ វិស័យ​កសិកម្ម​ត្រូវបាន​គេ​ចាត់​ទុក​ថាជា​តួឯក​ដ៏​សំខាន់​មួយ​ក្នុងការ​ទ្រទ្រង់​ជីវភាព​របស់​ប្រជា​ពលរដ្ឋ​ និង​រង​ផល​ប៉ះពាល់​ពី​វិបត្តិ​នេះ​តិច​តួច​បំផុត។ នៅ​ក្នុង​ឆ្នាំ ២០២១ កន្លង​ទៅ វិស័យ​កសិកម្ម​បាន​រួម​ចំណែក​ប្រមាណ​ ២៤,៤ ភាគ​រយ នៃ​ផលិត​ផល​សរុប​ក្នុង​ស្រុក​ ។

នៅ​អំឡុង​ពេល​ដែល​ពិភព​លោក​កំពុង​ជួបប្រទះ​វិបត្តិ​មួយ​ចំនួន​ដូច​ជា ការរីក​រាល​នៃ​ជំងឺ​កូ​វីដ ១៩ នៅតែ​បន្ត ,វិបត្តិ​សង្គ្រាម​រវាង​រុ​ស្ស៊ី និង​អ៊ុយ​ក្រែ​ន​នៅតែ​បន្ត​អូស​បន្លាយ, ការ​កើន​ឡើង​នៃ​អតិផ​រណា ជា​ដើម បាន​ជំរុញ​ឱ្យ​សកល​លោក​ធ្លាក់​ទៅ​ក្នុង​វិបត្តិ​ស្បៀង​អាហារ និង​បាន​ផ្តល់​កាលានុ​វត្ត​ភាព​ដល់​កម្ពុ​ជា​ដែល​ជា​ប្រទេស​កសិកម្ម​បង្កើន​ការ​ផលិត​សម្រាប់​នាំ​ចេញ​។


ស្រូវ ​អង្ករ​ ដែល​ត្រូវ​បាន​រាជរដ្ឋា​ភិបាល​កម្ពុជា ប្រសិទ្ធ​នាម​ថា ជា​«មាស ​ស» ​បាន​បង្ហាញ​ពី​កំណើន​នៃ​ការនាំ​ចេញ​ជា​លំដាប់​ពី១​ឆ្នាំ​ទៅ​១ឆ្នាំ មិន​ថា​ស្ថិត​នៅ​ស្ថាន​ភាព​បែប​ណា​នោះទេ​ ដែល​នេះ​ធ្វើឱ្យ​កម្ពុជាកាន់​តែ​មាន​សង្ឃឹម​ខ្ពស់ ក្នុង​ការ​ក្លាយ​ជា​ប្រទេស​ដែល​នាំ​អង្ករ​ចេញ​ដ៏​ធំ​មួយ​នៅ​ក្នុង​តំបន់ សម្រាប់​ផ្គត់​ផ្គង់​ទីផ្សារ​ពិភព​លោក​។


យោង​តាម​របាយ​ការណ៍​ពី​ក្រសួង​កសិកម្ម ​រុក្ខា​ប្រមាញ់​និង​នេសាទ ​ នៅ​ក្នុង​ឆមាស​ទី១​ឆ្នាំ​២០២២​នេះ ការ​នាំចេញ​ស្រូវ​មាន​ចំនួន ​១ ៧៣៣ ១៥៧​ តោន ទៅកាន់​ប្រទេស​វៀត​ណាម គិត​ជា​ទឹកប្រាក់​មាន​ចំនួន​ ៤០១,៩៦ លាន​ដុល្លារ​សហរដ្ឋ​អាមេរិក ។ ទីផ្សារ​ស្រូវ​ស្ទើរ​ ១០០% គឺនាំ​ចេញ​ទៅ​ប្រទេស​វៀត​ណាម។ ស្រូវ​ដែល​មាន​វិញ្ញាបន​បត្រ​ភូត​គាម​អនាម័យ​ចំនួន ​១ ១៤២ ១៧៥ ​តោន មានការ​កើន​ឡើង ២,៣៨​ ភាគរយ បើ​ធៀប​នឹង​រយៈពេល​ដូចគ្នា​នៅ​ឆ្នាំ ២០២១​ ដែល​មាន​ចំនួន ១ ៦៩២ ៨១៣ ​តោន។


ចំណែក ការ​នាំ​ចេញ​អង្ករ​វិញ មាន​បរិមាណ​សរុប​ចំនួន ៣២៧ ២០០​តោន កើន​ឡើង ១៦,៦៧ ភាគ​រយ បើ​ធៀប​នឹង​បរិមាណ​នាំ​ចេញ​ក្នុង​ឆមាស​ទី១ ​ឆ្នាំ ២០២១ ។បរិមាណ​អង្ករ​បាន​នាំចេញ​ទៅកាន់​ទិសដៅ​សហ​ភាព​អឺរ៉ុប​ចំនួន២៣​ប្រទេស មាន​បរិមាណ​សរុប​ចំនួន​៩៨​៦២៤​តោន កើន​ឡើង៤៦,៩០​ភាគរយ, ទិសដៅ​ប្រទេស​ចិន​មាន​បរិ​មាណ​សរុប​ចំនួន ​១៦៨ ២៨០តោន កើន​ឡើង​១៧,៤៤​ភាគ​រយ,​ ទិសដៅ​អា​ស៊ាន​ចំនួន៤​ប្រទេស ​មាន​បរិមាណ​សរុប​ចំនួន ​២៨ ៦៨០ ​តោន កើន​ឡើង ​៥,៦៩​ ភាគ​រយ ​។


នៅ​ក្នុង​ឱកាស​សម្ពោធ​ម៉ាក​អង្ករ​សមូ​ហភាព SKO នៃ​ពូជស្រូវ​សែន​ក្រអូប​ ០១ និង​ម៉ាក​អង្ករ​ដំណើប​សមូហ​ភាព DSMK នៃ​ពូជ​ស្រូវ​ដំណើប​ស្បៃ​មង្គល កាល​ពី​ថ្ងៃទី២៣ មិថុនា លោក ងិន​ ឆាយ ប្រតិភូ​រាជរដ្ឋាភិ​បាល​ទទួល​បន្ទុក​ជា​អគ្គ​នាយកនៃ​អគ្គ​នាយក​ដ្ឋាន​កសិ​កម្មនៃ​ក្រសួង​កសិកម្ម​រុក្ខា​ប្រមាញ់ និង​នេសាទ ​បាន​ថ្លែង​ថា ទោះ​ជា​វិស័យ​ស្រូវ​អង្ករ​មាន​ការ​រីក​ចម្រើន​គួរឱ្យកត់​សម្គាល់​យ៉ាង​ណាក៏​ដោយ ក៏​ស្ថាន​ភាព​និង​និន្នា​ការ​នៃ​ការប្រែ​ប្រួល​ជាស​កល បាន​ជំរុញ​ឱ្យ​ជួប​ប្រទះ​បញ្ហា​ប្រឈម​មួយ​ចំនួន​ដែល​ត្រូវ​សហ​ការ​គ្នា​ដើម្បី​ដោះ​ស្រាយ​។


លោក​បាន​បញ្ជាក់​ថា​៖«កង្វះខាត​គ្រាប់​ពូជ​ស្រូវ​ដែលមាន​គុណ​ភាព​សម្រាប់​ដាំ​ដុះ ដោយ​សារ​ការ​វិនិយោគ​ពី​វិស័យ​ឯកជន​នៅក្នុង​ឧស្សាហ​កម្មពូជ​ដំណាំ​នេះ​នៅ​មាន​កម្រិត​តិច​តួចនិង​ប្រជា​កសិករ​ខ្វះ​ការយល់​ដឹង​នៃ​ការប្រើ​ប្រាស់​ពូជ​សុទ្ធ​ឱ្យបាន​ត្រឹម​ត្រូវ»។

លោក​បាន​បន្ថែម​ថា នៅមាន​បញ្ហា​ប្រឈម​មួយ​ចំនួនទៀត​ដូចជា ការ​កង្វះខាត​ប្រព័ន្ធ​ស្រោច​ស្រព,​កសិករ​ប្រើប្រាស់​ជី​មិន​ទាន់​បាន​ត្រឹម​ត្រូវ​តាម​ប្រភេទ​ដី,កសិករ​ប្រើ​ប្រាស់​ថ្នាំ​កសិ​កម្ម​មិន​ទាន់​ចំ​គោល​ដៅ​និង​ហួស​កម្រិត,​តម្លៃ​ជី ថ្នាំ​កសិកម្ម​ អគ្គិសនី​ និង​ការ​ដឹក​ជញ្ជូន​មាន​តម្លៃ​ខ្ពស់,ការផលិត​មិន​ទាន់​មាន​ភាព​ប្រមូល​ផ្តុំ​តាម​ប្រភេទ​ពូជ នាំឱ្យ​ពិបាក​ប្រមូល​ទិញ និង​ការ​លាយ​អង្ករ​ពូជ​ផ្សេងៗ តាម​ទីតាំង​លក់ដុំ​និង​រាយ រោង​ម៉ាស៊ីន​កិន​ស្រូវ ដែល​ធ្វើឱ្យ​ប៉ះពាល់​គុណ​ភាព​ពូជ​ស្រូវ​ប្រណីតរ​បស់​កម្ពុជាជា​ដើម។

នៅ​គ្រា​នោះដែរ លោក ប៉ាន សូរ​សក្តិ រដ្ឋមន្ត្រី​ក្រសួង​ពាណិជ្ជកម្ម បាន​មាន​ប្រសាសន៍​ថា ក្រសួង​ពាណិជ្ជ​កម្ម មិន​ត្រឹមតែ​គិត​គូរ​លើ​ការ​នាំ​ចេញ​ស្រូវ​អង្ករ​តែមួយ​ជ្រុង​ប៉ុ​ណ្ណោ​ទេ តែ​ក្រសួង​ក៏បាន​ខិតខំ​ជួយ​ដល់​កសិករ​ខ្នាត​តូច​ឱ្យ​រៀបចំ​ខ្លួន​កាន់តែ​ប្រសើរ​ឡើង ជា​ពិសេស​ការ​ជួយ​ជំរុញ​ទីផ្សារ​សម្រាប់​កសិករ​ខ្នាត​តូច។

លោក​បាន​លើក​ឡើង​ដូច្នេះ​ថា៖« ក្រៅពី​ការ​ចូល​រួម​ជំរុញ​លើ​ទីផ្សារ​ ក្រសួង​បាន​បង្កើន​កិច្ច​ខិតខំ​ប្រឹង​ប្រែង​ក្នុង​ការបើក​ច្រក​ទីផ្សារ​ស្រូវ​អង្ករ​ជាមួយ​បណ្តា​ប្រទេស​នានា​សំខាន់ៗ​ដូចជា​ ចិន សហ​គមន៍​អឺរ៉ុប និង​ប្រទេស​នានា​នៅ​ក្នុង​តំបន់​អាស៊ាន​ផង​ដែរ​»។

ថ្លែង​ឱ្យ​ដឹងកាលពី​អំឡុង​ពេល​សម្ពោធ​ម៉ាក​អង្ករ​សមូហ​ភាព SKOនោះដែរ ​លោក ​ហ៊ុន ឡាក់ ប្រធាន​ក្រុម​ប្រឹក្សាភិ​បាល​សហ​ព័ន្ធ​ស្រូវ​អង្ករ​កម្ពុជាបាន​លើក​ឡើង​ថា ប​ច្ចុ​ប្ប​នេះមាន​កសិករ​មួយ​ចំនួន​ប្រឈម​នឹង​ផល​លំបាក​នៃ​ការលក់​ស្រូវ​របស់​ខ្លួន​នៅ​ពេល​ប្រមូល​ផល​ម្តងៗ​ ដោយ​សារ​ការ​ដាំដុះ​មិនមាន​ប្រភព​ព័ត៌មាន​នៃ​តម្រូវការ​ទីផ្សារ​ច្បាស់​លាស់ ​ខណៈ​ដែល​អ្នក​នាំចេញ​ក៏​មិន​មាន​ព័ត៌មាន​ឱ្យបាន​ជាក់​លាក់​ពី​កសិករ​ផង​ដែរ​។

ពេល​នោះ លោក​បាន​អះ​អាង​ថា៖«ការរៀបចំ​ឱ្យមាន​ម៉ាក​អង្ករ​សមូហ​ភាព SKOនិង​អង្ករ​ដំណើប​សមូហ​ភាព DSMKនេះ​ឡើង ក្នុង​គោល​បំណង​ផ្តល់​ផល​ប្រយោជន៍​ឱ្យ​យើង​ក្នុង​រយៈ​ពេល​មធ្យម​និង​វែង ដែល​តម្រូវឱ្យ​យើង​ធ្វើការ​កាន់តែ​ច្រើន​ជាង​មុន ​និង​ជួយ​កាត់​បន្ថយ​នូវ​គម្លាត​ព័ត៌មាន​នៃ​តម្រូវ​ការ​ទីផ្សារ និង​ការ​ផលិត​រវាង​អ្នក​នាំ​ចេញ រោង​ម៉ាស៊ីន​កិន​ស្រូវ​និង​ប្រជា​កសិករ​»។

លោក ញែ​ម ចាន់ធូ ជា​កសិករ​រស់នៅ​ នៅ​ឃុំ​បឹង​ខ្នារ ស្រុក​បាកាន​ ខេត្តពោធិ៍​សាត់ ដែល​បាន​ផលិត និង​ដាំ​ដុះ​ស្រូវ​សែន​ក្រអូប​០១ SKO តាម​ការ​ណែនាំ​របស់​ម​ន្ត្រី​ជំនាញ​នៃ​កម្មវិធី​CAVACនិង​មន្ត្រី​កសិកម្ម បាន​ឱ្យដឹង​ថា កសិករ​នៅក្នុង​ឃុំ​របស់​លោក​បាន​ងាក​មកដាំ​ដុះ​ពូជស្រូវ​សែន​ក្រអូប ដោយ​សារ​ស្រូវ​ប្រភេទ​នេះ​មាន​ទីផ្សារ​ខ្ពស់ និង​ងាយ​ស្រួល​ក្នុងការ​ថែទាំ​ដែល​ទទួល​បាន​ទិន្នផល​ច្រើន​ជាង​ស្រូវ​ធម្មតា​នៅ​ពេល​ប្រមូល​ផល។

លោក​បាន​បញ្ជាក់​ថា៖« ពីមុន​កសិករ​យើង​ដាំ​ដុះ​ប្រភេទ​ស្រូវ​OM ដែលមាន​តម្លៃ​ក្រោម​១​ពាន់​រៀល ហើយ​ភាគច្រើន​លក់​ឱ្យ​ឈ្មួញ​វៀត​ណាម ដោយ​ពេល​ណា​គេ​ត្រូវការ​ច្រើន​លក់​បាន​ថ្លៃ និង​ពេល​គេ​ត្រូវការ​លក់​បាន​ថោក។ កសិករ​យើង​បាន​ងាក​មក​ដាំ​ពូជស្រូវ​សែន​ក្រអូប SKO វិញ​តាំងពី​ឆ្នាំ២០២០​មក ឥឡូវ​យើង​មិនចាំ​បាច់​បារម្ភ​រឿង​ទីផ្សារ​និង​តម្លៃ​នោះ ​ព្រោះ​យើង​លក់​បាន​ថ្លៃ​ជាង​ស្រូវ​OM»​។

ដោយ​ឡែក​លោក ឯម ផល្លា ជា​កសិករ​រស់នៅ​ឃុំ​សំរោង ស្រុក​ព្រៃ​ឈរ ខេត្ត​កំពង់​ចាម​វិញ បាន​ឱ្យដឹ​ង​ដែរ​ថា នៅ​ក្នុង​ឃុំ​របស់លោក​ កសិករ​និយម​ដាំ​ដុះ​ស្រូវ​ប្រភេទ​អ៊ី​អ៊ែរ (IR) ដោយ​សារតែ​​ស្រូវ​ប្រភេទ​នេះ ប្រើ​ប្រាស់​ពេល​ខ្លី(៩៥ថ្ងៃ) ដើម្បី​ប្រមូល​ផល ​និង​ទទួល​បាន​ទិន្នផល​ច្រើន ​ខណៈ​ដែល​កសិករ​នៅ​ឃុំ​សំរោង​ភាគ​ច្រើន មាន​ដីតូច។​ប៉ុន្តែ​តម្លៃ​វិញ ​មិនសូវ​បាន​ថ្លៃ​នោះទេ ពោល​គឺ​ចន្លោះ​៧៥០​រៀល ទៅ​៨០០​រៀលក្នុង​១​គីឡូ។

លោក​បាន​បន្ថែម​ថា កន្លងទៅ​ ធ្លាប់មាន​មន្ត្រី​ជំនាញ​ចុះទៅ​ណែនាំ​ដល់​កសិករឱ្យ​ងាក​ទៅ​ដាំ​ដុះ​ស្រូវ​ដែល​មាន​ទីផ្សារដូចជា​ ស្រូវ​រំដួល​ឬ​ស្រូវ​សែន​ក្រអូប​នេះ​ដែរ ប៉ុន្តែ​កសិករ​ភាគ​ច្រើន​ហាក់​មិន​សូវ​យក​ចិត្ត​ទុក​ដាក់​នោះ​ទេ​។

លោក​បាន​បញ្ជាក់​ថា៖«យើង​ចង់​សាក​ផ្លាស់ប្តូរ​ពូជ​ស្រូវ​នេះ ដើម្បី​ដាំ​ដុះ​ដែរ​ ប្រសិន​បើ​ពូជ​សែន​ក្រអូប​នេះ ផ្តល់​ផល​ល្អ និង​បាន​ច្រើន ថែម​ទាំង​មាន​តម្លៃ​ខ្ពស់​លើ​ទីផ្សារ​ទៀត​នោះ។​ព្រោះថា កន្លង​មក​កសិករ​យើង​លក់​ស្រូវ​ អ៊ី​អ៊ែរ (IR)នេះ តម្លៃ​ថោក និង​ឡើង​ចុះទៅ​តាមតែ​មាត់​ឈ្មួញ​កណ្តាល»​។

លោក ​លន់ យ៉េ​ង អគ្គ​លេខាធិ​ការ​សហ​ព័ន្ធ​ស្រូវ​អង្ករ​កម្ពុជា បាន​ប្រាប់​ភ្នំពេញ​ប៉ុស្តិ៍​ថា រយៈកាល​ប៉ុន្មាន៣ឆ្នាំ​ចុង​ក្រោយ​នេះ គឺ​ការ​នាំ​ចេញ​អង្ករ​មាន​សភាព​ទ្រឹង ​ដោយ​សារ​កត្តាឧបសគ្គ​មួយ​ចំនួន ​ដូចជា ការយក​ពន្ធ​របស់​ហ​គម​ន៍​អឺរ៉ុប កាល​ពី​ខែកុម្ភៈ ឆ្នាំ​២០១៩ ​រហូត​ដល់​ខែមករា ឆ្នាំ​២០២២ ធ្វើឱ្យ​ចំណែក​ទីផ្សារ​នៅ​សហ​គមន៍​អឺរ៉ុប​បាន​ថយចុះ​អស់​ប្រមាណ​ជា​៣០ភាគរយ។

លោក​បាន​បន្ថែម​ថា ស្រប​ពេល​ជា​មួយ​គ្នានេះដែរ​ នៅ​ចុងឆ្នាំ​២០១៩ ​ជំងឺ​រាត​ត្បាត​កូ​វីដ១៩ បាន​ផ្ទុះឡើង​នៅ​ពេញ​ពិភព​លោក ធ្វើឱ្យ​ខ្សែ​ចង្វាក់​ផ្គត់​ផ្គង់ ជា​ពិសេស​ការដឹក​ជញ្ជូន​បាន​កើន​ឡើង ពី១ ០០០​ដុល្លារ នៅ​ឆ្នាំ​២០១៩​ កើន​ដល់ ​១៥ ០០០ដុល្លារ ក្នុង​ឆ្នាំ​២០២០ និង​២០២១ ក្នុង​អង្ករ​១​ទូ​កុង​តឺន័រ​ទំហំ​២០ហ្វីត។

លោក​បាន​អះ​អាង​ថា៖« មិន​ត្រឹមតែ​តម្លៃ​ឡើង​ថ្លែ​នោះទេ ​ការផ្គត់​ផ្គង់​ទូ​កុង​តឺន័​រ​ក៏​មិន​គ្រប់​គ្រាន់​ផ​ងដែរ ដែល​ក្នុងពេល​នោះ ការ​ផ្គត់​ផ្គង់​សម្រាប់​អង្ករ​មាន​ត្រឹមតែ​ប្រមាណ​ជា៤០ភាគរយ ​ប៉ុណ្ណោះ។ ជាក់​ស្តែង​ឆ្នាំ២០២០ និង​ឆ្នាំ២០២១​ យើង​ត្រូវការ​ទូ​កុង​តឺន័​រ​ជា​មធ្យម​ប្រមាណ​ជា ៤០០ ទៅ ​៥០០ទូ​កុងតឺន័​រ តែ​បរិមាណ​ផ្គត់​ផ្គង់​មាន​ត្រឹម​តែ ២០០ ទៅ២៥០ទូ តែប៉ុណ្ណោះ​ក្នុង​១​សប្តាហ៍»។

លោក​បាន​បន្ថែម​ថា តម្លៃ​ជី​កសិកម្ម ​ដែលជា​មូល​ដ្ឋាន​របស់​កសិករ ក៏​ចាប់ផ្តើម​ឡើង​ថ្លៃធ្វើឱ្យប៉ះ​ពាល់​ដល់​ថ្លៃ​ផលិត​កម្ម​របស់​កសិក​រ ស្រប​ពេល​ដែល​អង្ក​រល​ក់​មិនបាន​ថ្លៃ​ដោយ​សារ​ការដឹក​ជញ្ជូន និង​ការស្ទះ​នូវ​ស្តុក​អង្ករ​ចាស់​ជាច្រើន​របស់​ប្រទេស​នាំ​ចេញ​អង្ករ។

លោក​បាន​​បញ្ជាក់​ថា៖«ដើម​ឆ្នាំ​២០២២ ចាប់​ផ្តើម​មាន​សង្គ្រាម​រុស្សី-​អ៊ុយ​ក្រែ​ន ធ្វើឱ្យ​តម្លៃ​ប្រេង​ឥន្ធនៈ​កើន​ឡើង​បាន​ជះ​ឥទ្ធិ​ពល​ដល់​ការ​បង្ក​បង្កើន​ផល ​ជាពិសេស​ការ​ឡើង​ថ្លៃឈ្នួល​លើ​ការ​ភ្ជួរ​រាស់ ​ច្រូត​កាត់ របស់​ប្រជា​កសិករ​ ស្រ​បពេល​តម្លៃ​អង្ករ​នៅលើ​ទីផ្សារ​អន្តរ​ជាតិ មាន​ការ​ប្រែ​ប្រួល​តិច​តួច​បំផុត»​។

តែ​ទោះ​បីជា​ស្ថាន​ភាព​បែបនេះ​ក៏​វិស័យ​ស្រូវ​អង្ករ​នៅតែ​អាច​បន្ត​ទៅមុខដោយ​សារ​មាន​ការ​អន្តរាគមន៍​ទាន់​ពេល​វេលា​ពី​រាជ​រដ្ឋា​ភិបាល តាម​រយៈ​គោល​នយោ​បាយ​ឥណ​ទាន ដោយ​លក្ខ​ខណ្ឌ​សម្បទាន ​គោល​នយោបាយ​លើក​លែង​ពន្ធ​នានា សម្រាប់​អ្នក​ប្រកប​របរ​នៅ​ក្នុង​វិស័យ​ស្រូវ​អង្ករ​។

ការ​ប្រកាស​ពី​ម៉ាក​អង្ករ​សមូ​ហភាព​ SKO នៃ​ពូជ​ស្រូវ​សែន​ក្រអូប​០១ និង​ម៉ាក​អង្ក​រដំណើប​សមូហ​ភាព DSMK ត្រូវបាន​អ្នក​ពាក់​ព័ន្ធ​នៅក្នុង​វិស័យ​ស្រូវ​អង្ករ​ដូច​ជា ក្រសួង​កសិកម្ម ,ក្រសួង​ពាណិជ្ជ​កម្ម និង​សហ​ព័ន្ធ​ស្រូវ​អង្ករ​កម្ពុជា​រំពឹង​យ៉ាង​ម៉ុ​ត​មាំ​ថា នឹង​អាច​ជួយ​ឱ្យ​កាន់​តែមាន​ភាព​ច្បាស់​លាស់​សម្រាប់​ទីផ្សារ​អង្ករ​នៅ​កម្ពុជា ដែលជា​កត្តា​មួយ​សម្រាប់​ជួយ​តម្រង់​ទិស​ដល់​កសិករ​ក្នុង​កា​រដាំ​ដុះ ឱ្យ​ឆ្លើយ​តប​ទៅ​នឹង​តម្រូវការ​ទីផ្សារ​សម្រាប់​អ្នក​នាំ​ចេញ​ ក៏ដូចជា​ជំរុ​ញឱ្យមាន​ការផ្សព្វ​ផ្សាយ​និង​ទាក់​ទាញ​អ្នក​ទិញ​បន្ថែម​ទៀត នៅ​លើ​ទីផ្សារ​អន្តរ​ជាតិ​៕