លោក ញឹម កុសល ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ភីភី លីង ស៊ីឃ្យួរឹធី
.jpg)
នៅដើមខែវិច្ឆិកា ប្រេងឆៅបានធ្លាក់ចុះពីតម្លៃខ្ពស់ប្រចាំខែ ៩៣,៧០ ដុល្លារ (ក្នុង ១ បារ៉ែល) ដល់កម្រិតទាប ៧០ ដុល្លារ ដែលនៅតែបង្ហាញពីនិន្នាការធ្លាក់ចុះប្រចាំខែ។ ទោះយ៉ាងនេះក្តី អ្នកជំនាញវិភាគទីផ្សារបានបង្ហាញថា ប្រេងឆៅកំពុងជួញដូរក្នុងតម្លៃមធ្យម ៨០ ដុល្លារ នៅថ្ងៃអង្គារ និងបង្ហាញទិសដៅកើនឡើងក្នុងរយៈពេលខ្លី បើយោងតាមការវិភាគផ្នែកបច្ចេកទេស។
សារព័ត៌មាន Financial Times បានរាយការណ៍ថា តម្លៃប្រេងបានធ្លាក់ចុះយ៉ាងខ្លាំងក្នុងសប្តាហ៍នេះ ដោយសារការកើនឡើងនៃការព្រួយបារម្ភអំពីការធ្លាក់ចុះនៃតម្រូវការប្រេងឥន្ធនៈនៅក្នុងប្រទេសចិន ដែលលើសពីការភ័យខ្លាចថា ការផ្គត់ផ្គង់របស់រុស្ស៊ីអាចធ្លាក់ចុះនៅខែក្រោយ នៅពេលដែលការដាក់ទណ្ឌកម្មរបស់សហភាពអឺរ៉ុបកាន់តែតឹងរ៉ឹងលើការនាំចេញប្រេងឆៅរបស់ខ្លួនចូលជាធរមាន។
នៅថ្ងៃទី ៥ ខែតុលា អង្គការ OPEC និងសម្ព័ន្ធមិត្តដែលដឹកនាំដោយរុស្ស៊ីបានធ្វើកិច្ចព្រមព្រៀងកាត់បន្ថយទិន្នផលចំនួន ២ លានបារ៉ែលក្នុង ១ ថ្ងៃ។ អង្គការ OPEC+ នឹងពិភាក្សាអំពីការកើនឡើងផលិតកម្មរហូតដល់ ៥០០ ០០០ បារ៉ែលក្នុង ១ ថ្ងៃនៅកិច្ចប្រជុំបន្ទាប់របស់ខ្លួននៅថ្ងៃទី ៤ ខែធ្នូ។ ទោះយ៉ាងនេះក្តី ប្រេងឆៅបានកែការខាតបង់របស់ខ្លួនកាលពីថ្ងៃចន្ទ បន្ទាប់ពីអារ៉ាប៊ីសាអ៊ូឌីត បានបង្ហាញថា ប្រទេសរបស់ខ្លួនកំពុងជាប់គាំងជាមួយនឹងការកាត់បន្ថយទិន្នផល និងមិនពិភាក្សាអំពីការកើនឡើងទិន្នផលប្រេងជាមួយអង្គការ OPEC នោះទេ។
សម្រាប់ការវិភាគជួញដូរនៅសប្តាហ៍នេះ តាមបែបបច្ចេកទេស តម្លៃប្រេងអាចត្រូវបានជួញដូរចន្លោះពី ៧៥ ទៅ ៨៥ ដុល្លារ។ ក្នុងតម្លៃជាមធ្យម ៨០ ដុល្លារ វិនិយោគិនគួរតែទិញនៅតម្លៃ ៧៨,៥០ ដុល្លារ ដោយកំណត់មុខងារទាញយកប្រាក់ចំណេញនៅតម្លៃ ៨៥ ដុល្លារ និងមុខងារការពារហានិភ័យនៅតម្លៃ ៧៤ ដុល្លារ៕
