ភ្ញៀវទេសចរជាតិ និងអន្តរជាតិ ចូលទស្សនាប្រាសាទអង្គរវត្ត កាលពីសប្តាហ៍មុន។ ហ៊ឹន ពិសី
ចំនួនភ្ញៀវទេសចរបរទេសចូលទស្សនារមណីយដ្ឋានអង្គរត្រូវបានរំពឹងថានឹងកើនដល់ជិត ៣០ ម៉ឺននាក់ នៅក្នុងរយៈពេល ២ ខែចុងក្រោយឆ្នាំ ២០២៤ នេះ ខណៈចាប់តាំងពីដើមខែវិច្ឆិកា មកការលក់សំបុត្រឱ្យភ្ញៀវបរទេសចូលទស្សនារមណីយដ្ឋានអង្គរ បានហក់ឡើងក្នុងរង្វង់ ៥០ភាគរយបើធៀបនឹងខែតុលា។
នៅដើមខែធ្នូ ខាងមុខក្រសួងទេសចរណ៍ក៏គ្រោងនឹងរៀបចំព្រឹត្តិការណ៍«ពិព័រណ៍ទេសចរណ៍កម្ពុជា-ចិន (Cambodia-China Travel Fair)» នៅខេត្តសៀមរាបផងដែរ។
ការលក់សំបុត្រឱ្យភ្ញៀវបរទេសឡើងដល់ជិត ៤ ០០០ ក្នុង១ថ្ងៃ
អគ្គនាយកគ្រឹះស្ថានអង្គរ(Angkor enterprise) លោក លី សែ បានប្រាប់បណ្តាញផ្សព្វផ្សាយក្នុងស្រុក កាលពីថ្ងៃទី៨ ខែវិច្ឆិកា ថា ចំនួនភ្ញៀវទេសចរបរទេសដែលទិញសំបុត្រចូលទស្សនារមណីយដ្ឋានអង្គរបានកើនឡើងគួរឱ្យកត់សម្គាល់ចាប់តាំងពីដើមខែវិច្ឆិកាមក ដោយជាមធ្យមក្នុង ១ ថ្ងៃមានភ្ញៀវទេសចរបរទេសចន្លោះពី ៣ ៥០០ - ៣ ៨០០ នាក់បានទិញសំបុត្រទស្សនារមណីយដ្ឋានអង្គរ កើនឡើងពីចំនួន ២៥០០-២៦០០ នាក់ កាលពីអំឡុងខែតុលា។
លោកអះអាងថា បើតាមការរំពឹងទុក គឺក្នុងរយៈពេល ២ ខែដែលនៅសល់ក្នុងឆ្នាំ ២០២៤ នេះចំនួនភ្ញៀវទេសចរបរទេសមកទស្សនារមណីយដ្ឋានអង្គរ និងអាចស្ថិតក្នុងចន្លោះពី ១២-១៤ ម៉ឺននាក់ក្នុង ១ ខែ។
នេះជាសញ្ញាវិជ្ជមានដែលបង្ហាញថា វិស័យទេសចរណ៍នៅក្នុងខេត្តសៀមរាប ក៏ដូចជានៅទូទាំងប្រទេសកម្ពុជាបានផ្តើមបង្ហាញសញ្ញាវិជ្ជមានខ្លាំង។
លោកបញ្ជាក់ថា បើតាមទិន្នន័យដែលទទួលបានគឺចំនួននៃការលក់សំបុត្រនឹងកើនឡើងបន្ថែមទៀតនៅខែធ្នូ គឺអាចកើនដល់ជាង ៤ ពាន់នាក់ក្នុង ១ ថ្ងៃ ព្រោះគ្រាន់តែដើមខែវិច្ឆិកា បានខ្ទង់ ៣៥០០- ៣៨០០ នាក់ ខណៈរដូវវិស្សមកាលនៅតំបន់អ៊ឺរ៉ុប និងរដូវត្រជាក់នៅកម្ពុជាចូលមកដល់។
បើតាមលោក លី សែ ទន្ទឹមនឹងការកើនឡើងនៃចំនួនភ្ញៀវទេសចរបរទេសនេះ ស្ថានភាពនៃការទទួលស្វាគមន៍ និងបដិសណ្ឋារកិច្ចនៅកម្ពុជាក៏កាន់តែប្រសើរផងដែរ។
ភ្ញៀវបរទេសមានចំនួនច្រើនជារៀងរាល់ថ្ងៃ
អ្នកបោសសម្អាតនៅប្រាសាទអង្គរវត្ត(ផ្នែកកណ្តាល) លោកស្រី ចាន់ មុំ ដែលមានវ័យ ៤៥ ឆ្នាំ បានប្រាប់ភ្នំពេញប៉ុស្តិ៍កាលពីសប្តាហ៍មុនថា ចំនួនភ្ញៀវបរទេសបានកើនឡើងច្រើនក្នុងរយៈពេលប្រហែល ២-៣ សប្តាហ៍ចុងក្រោយនេះ ដោយភ្ញៀវទាំងនោះ គឺមានចម្រុះជាតិសាសន៍។
ជាក់ស្តែងនៅរៀងរាល់ព្រឹកព្រលឹម រហូតដល់ម៉ោងប្រហែលជាង ១០ គឺនៅមានភ្ញៀវបរទេសជាច្រើននៅឈរតម្រង់ជួរដើម្បីឡើងលើប្រាសាទកណ្តាល។
លោកស្រីបាននិយាយថា៖«ចំនួនភ្ញៀវដ៏ច្រើនបែបនេះគឺមិនដែលឃើញមានយូរហើយ។ ប្រសិនបើភ្ញៀវច្រើនបែបនេះ គឺវិស័យទេសចរណ៍នៅខេត្តសៀមរាបនឹងល្អឡើងវិញ»។
ទោះយ៉ាងណា លោកស្រី ចាន់ មុំ លើកឡើងថា ប្រសិនបើគ្មានការផ្សព្វផ្សាយព័ត៌មានមិនល្អពីកម្ពុជានៅក្រៅប្រទេស (ពិសេសប្រទេសជិតខាង) ហើយនិងមានជើងហោះហើរផ្ទាល់មកព្រលានយន្តហោះអន្តរជាតិខេត្តសៀមរាបច្រើនបន្ថែមទៀតនោះ លោកស្រីជឿថា នឹងមានភ្ញៀវទេសចរបរទេសច្រើនធ្វើដំណើរមកកម្ពុជា។
លោកស្រីលើកឡើងថា៖«ខ្ញុំធ្លាប់លឺព័ត៌មានថា មានភ្ញៀវបរទេសមួយចំនួនមានបំណងធ្វើដំណើរមកទស្សនាប្រាសាទបុរាណខ្មែរ បន្ទាប់ពីដើរកម្សាន្តនៅប្រទេសជិតខាង ប៉ុន្តែបន្ទាប់ពីមកដល់ប្រទេសជិតខាងហើយពួកគាត់មិនបានបន្តដំណើរមកកម្ពុជាឡើយ ដោយសារនៅទីនោះមានការផ្សព្វផ្សាយមិនល្អពីកម្ពុជា»។
ទិន្នន័យក្រសួងទេសចរណ៍ បង្ហាញថា រយៈពេល ៣ ត្រីមាសដំបូង ឆ្នាំ ២០២៤ កម្ពុជាទទួលបានទេសចរបរទេសចំនួន ៤,៨ លាននាក់ កើនឡើង ២២,២ ភាគរយបើធៀបនឹងរយៈពេលដូចគ្នាឆ្នាំ ២០២៣។
សំបុត្រដែលគ្រឹះស្ថានអង្គរលក់ឱ្យភ្ញៀវបរទេសសម្រាប់ការចូលទស្សនារមណីយដ្ឋានអង្គរ មានចំនួនសរុប ៦៩៩ ៨៥០ សន្លឹក កើនឡើង ២៩,៧ ភាគរយ និងទទួលបានចំណូលសរុប ៣២,៥លានដុល្លារ កើនឡើង ៣០,២ ភាគរយ។
ប្រធានសមាគមមគ្គុទ្ទេសក៍ទេសចរអង្គរ លោក ខៀវ ធី បាននិយាយថា ចំនួនភ្ញៀវទេសចរបរទេសដែលដើរកម្សាន្តនៅតាមរមណីយដ្ឋានក្នុងខេត្តសៀមរាប ពិតជាកើនឡើងច្រើនក្នុងរយៈពេលប៉ុន្មានសប្តាហ៍កន្លងមកនេះ ដោយរូបលោកផ្ទាល់ក្នុងខែវិច្ឆិកានេះត្រូវបានភ្ញៀវកក់ជិតពេញ ១ខែតែម្តង ចំណែកមគ្គុទ្ទេសក៍ទេសចរផ្សេងទៀតក៏មានស្ថានភាពប្រហាក់ប្រហែលលោកដែរ។
ប្រសិនបើភ្ញៀវនៅតែមានចំនួនច្រើន ហើយបន្តអូសបន្លាយរហូតដល់ខែកុម្ភៈ ឬមីនា ឆ្នាំ ២០២៥ នោះជាការប្រសើរណាស់ ព្រោះស្ថានភាពពេលនេះគឺមិនដែលមានចាប់តាំងពីការលេចឡើងនៃវត្តមានជំងឺកូវីដ១៩ នាដើមឆ្នាំ ២០២០។
លោកបានលើកឡើងថា ការកើនឡើងសកម្មភាពទេសចរណ៍នេះ មិនត្រឹមតែបង្កើនចំណូលសម្រាប់ប្រទេសប៉ុណ្ណោះទេ ប៉ុន្តែក៏ជាការជួយចែករំលែកវប្បធម៌ និងប្រវត្តិសាស្ត្រដ៏សំបូរបែបរបស់ខ្មែរ និងបង្កើតឱកាសការងារ ព្រមទាំងប្រាក់ចំណូលសម្រាប់គ្រួសារ និងសេដ្ឋកិច្ចជាតិផងដែរ។
លោកនិយាយថា៖«ពេលនេះភ្ញៀវបរទេសមកសៀមរាបមានចំនួនច្រើន ហើយមានចម្រុះជាតិសាសន៍។ កំណើនភ្ញៀវនៅពេលនេះវាអាចបណ្តាលមកពីការចូលមកដល់នៃរដូវកាល High Season(រដូវកាលសម្បូរភ្ញៀវ) ស្របពេលរដ្ឋាភិបាល និងឯកជនកំពុងខិតខំធ្វើការផ្សព្វផ្សាយពីសក្តានុពលនៃវិស័យទេសចរណ៍កម្ពុជាលើឆាកអន្តរជាតិ»។
ជាទូទៅចាប់ពីដើមខែតុលា ដល់ខែមីនា នៃឆ្នាំនីមួយៗត្រូវបានចាត់ទុកជាអំឡុងពេលភ្ញៀវទេសចរបរទេស ពិសេសភ្ញៀវតំបន់អ៊ឺរ៉ុប និងអាមេរិក-កាណាដា ធ្វើដំណើរកម្សាន្តច្រើនបំផុត។ បច្ចុប្បន្នចំនួនជើងហោះហើរបរទេសដែលចុះចតនៅព្រលានយន្តហោះខេត្តសៀមរាប ក៏បង្ហាញពីកំណើនឡើងផងដែរ។
ពិព័រណ៍ទេសចរណ៍កម្ពុជា-ចិន នឹងប្រព្រឹត្តឡើង ៣ ថ្ងៃនៅខេត្តសៀមរាប
ក្រសួងទេសចរណ៍ កាលពីថ្ងៃទី៨ ខែវិច្ឆិកា បានឱ្យដឹងថា ដើម្បីបន្តអនុវត្តយុទ្ធនាការ «ឆ្នាំនៃការផ្លាស់ប្តូរប្រជាជននិងប្រជាជនកម្ពុជា-ចិន ២០២៤» និងយុទ្ធនាការ«ឆ្នាំទស្សនា សៀមរាប ២០២៤» ក្រសួងទេសចរណ៍ សហការជាមួយស្ថានទូតចិនប្រចាំកម្ពុជា ក្រសួង-ស្ថាប័នពាក់ព័ន្ធ និងផ្នែកឯកជន នឹងរៀបចំ«ពិព័រណ៍ទេសចរណ៍កម្ពុជា-ចិន (Cambodia-China Travel Fair)» ចាប់ពីថ្ងៃទី៦ ដល់ថ្ងៃទី៨ ខែធ្នូ ឆ្នាំ ២០២៤ នៅខេត្តសៀមរាប។
ពិព័រណ៍ទេសចរណ៍កម្ពុជា-ចិន រំពឹងថា នឹងមានការចូលរួមពីប្រតិបត្តិករទេសចរណ៍ជាអ្នកទិញចិន(Chinese Buyers) ចំនួន ៥០ក្រុមហ៊ុន អ្នកលក់ចិន (Chinese Sellers) ចំនួន ៥០ ក្រុមហ៊ុន និងអ្នកលក់កម្ពុជា (Cambodian Sellers) ចំនួន ១០០ ក្រុមហ៊ុន និងអ្នកសារព័ត៌មានកម្ពុជា-ចិន (Media) ចំនួន ៥០ស្ថាប័ន ដោយនឹងមានកម្មវិធីសិក្ខាសាលាផ្សព្វផ្សាយទេសចរណ៍កម្ពុជា ការផ្គូរផ្គងអាជីវកម្ម (Business Matching) កម្មវិធី ទស្សនកិច្ចគោលដៅទេសចរណ៍មុន និងក្រោយពិព័រណ៍ (Pre-Tours and Post-Tours) និងកម្មវិធីផ្សេងៗជាច្រើនទៀត។
ស្ថិតិចំនួនភ្ញៀវទេសចរកន្លងមក
សូចនាករទេសចរណ៍ និងស្ថិតិទេសចរណ៍ផ្លូវការរបស់ក្រសួងទេសចរណ៍ប្រចាំឆ្នាំ ២០២៣ ដែលទើបចេញផ្សាយកាលពីចុងសប្តាហ៍មុនបង្ហាញថា កាលពីឆ្នាំ ២០២៣ កម្ពុជាទទួលបានភ្ញៀវទេសចរបរទេស(International Tourists or Inbound Tourism)ចំនួន ៥,៤៥ លាននាក់ កើនឡើង ១៣៩,៥ ភាគរយបើធៀបឆ្នាំ ២០២២ និងទេសចរជាតិ(Domestic Tourist) ១៨,៧៤ លាននាក់ កើនឡើង ៣៤,៥ ភាគរយ។
ឯកសារបានឱ្យដឹងទៀតថា ចំណូលទេសចរណ៍អន្តរជាតិ មានចំនួន ៣,០៨ ពាន់លានដុល្លារ កើនឡើង ១១៧,៩ ភាគរយ។
វិស័យទេសចរណ៍បានចូលរួមចំណែក(Tourism sector contributed to the gross domestic products)ក្នុងផលិតផលក្នុងស្រុកសរុប(GDP) ប្រមាណ ៧,៥ ភាគរយ។
ឆ្នាំ ២០១៩ ត្រូវបានចាត់ទុកជាឆ្នាំកំពូលនៃវិស័យទេសចរណ៍កម្ពុជា ដោយមានភ្ញៀវទេសចរបរទេសចំនួន ៦,៦១ លាននាក់ និងទទួលបានចំណូល ៤,៩២ លានដុល្លារ។ ទឹកប្រាក់នេះ គឺបានចូលរួមប្រមាណ ១២,១ ភាគរយនៃផលិតផលក្នុងស្រុកសរុប៕
