ដោយមូលហេតុនៃជំងឺរាតត្បាតសកលកូវីដ១៩ នៅតែចោទជាបញ្ហាសម្រាប់សុខភាពសាធារណៈ និងកំពុងរីករាលដាលពាសពេញពិភពលោកនាពេលបច្ចុប្បន្ននេះ ក្រុមហ៊ុន ខលហ្គេត បានឧបត្ថម្ភសាប៊ូលាងសម្អាតដៃចំនួន ២៥ លានដុំទៅកាន់ពិភពលោក រួមទាំងប្រទេសកម្ពុជាបានទទួលសាប៊ូសរុបចំនួន ២៥ ម៉ឺនដុំ ក្រោមយុទ្ធនាការ #SafeHands Challenge របស់អង្គការសុខភាពពិភពលោក ដើម្បីលើកទឹកចិត្ត ប្រជាជនទាំងអស់ថែរក្សាការពារ សុវត្ថិភាពដៃរបស់ខ្លួន។ ដើម្បីចូលរួមទប់ស្កាត់ និងប្រឆាំងការឆ្លងនៃជំងឺកូវីដ១៩ ដែលមិនទាន់សាបរលាបនោះ អង្គការសុខភាពពិភពលោកបានចាប់ផ្តើមធ្វើយុទ្ធនាការ #SafeHands Challenge នៅលើបណ្តាញសង្គមទូទាំងពិភពលោក ដើម្បីលើកទឹកចិត្តប្រជាជនទាំងអស់ឱ្យយល់កាន់តែច្បាស់ពីការការពារ និងថែរក្សាដៃឱ្យមានសុវត្ថិភាព។ ដើម្បីឆ្លើយតប និងចូលរួមក្នុងយុទ្ធនាការរបស់អង្គសុខភាពពិភពលោក ក្រុមហ៊ុន ខលហ្គេត បានចូលរួម និងចែកចាយយុទ្ធនាការ #SafeHands Challenge ដោយបានផលិតសាប៊ូចំនួន ២៥ លានដុំដើម្បីគាំទ្រដល់កិច្ចខិតខំប្រឹងប្រែងរបស់អង្គការសុខភាពពិភពលោក ហើយសាប៊ូចំនួន ២៥ ម៉ឺនដុំ ត្រូវបានបរិច្ចាគដល់ប្រជាជនដែលកំពុងត្រូវការនៅកម្ពុជា ដើម្បីជួយបញ្ឈប់ការរីករាលដាលនៃជំងឺរាតត្បាតកូវីដ១៩ តាមរយៈមូលនិធិកុមាររបស់អង្គការសហប្រជាជាតិ (យូនីសេហ្វ)។ ក្នុងនោះសាប៊ូជាច្រើនដុំក្នុងចំណោម ២៥ ម៉ឺនដុំ បានចែកចាយរួចរាល់ពាសពេញប្រទេសកម្ពុជា តាមរយៈក្រសួងអភិវឌ្ឍន៍ជនបទ និងអាជ្ញាធរថ្នាក់ក្រោមជាតិទៅកាន់ ខេត្តចំនួន ៥ ដូចជា ខេត្តតាកែវ ខេត្តរតនគិរី ខេត្តកំពង់ស្ពឺ ខេត្តស្វាយរៀង ខេត្តព្រះវិហារ និងខេត្តក្រចេះក្នុងតំបន់ដាច់ស្រយាល៕ រូបថត សហការី