ដើម្បីពង្រឹងភាពជាដៃគូបន្ថែមជាមួយនឹងមន្ទីរពេទ្យកុមារអង្គរ និងដើម្បីជំរុញអោយមានការបរិច្ចាគបន្ថែមធនាគារ ស្ថាបនាពេលថ្មីៗនេះបានជម្រាបជូនអតិថិជនរបស់ខ្លួនដែលមានទឹកចិត្តសប្បុរសធម៌ អាចបរិច្ចាគថវិការរយៈកម្មវិធី SathapanaMobile។
ក្តីសង្ឃឹម និងការរំពឹងទុកលើកិច្ចសហប្រតិបត្តិការ ដើម្បីរៃអង្គាសថវិកាជួយដល់មន្ទីរពេទ្យ កុមារអង្គរ នឹងអាចចូលរួមចំណែកគាំទ្រ និងធ្វើឱ្យមាននិរន្តភាពលើប្រតិបត្តិការរបស់មន្ទីរពេទ្យក្នុងបេសសកម្មផ្តល់ជូនការព្យាបាលដល់កុមារកម្ពុជាគ្រប់រូបប្រកបដោយគុណភាពខ្ពស់ ដោយសេចក្តីមេត្តាករុណា និងដោយឥតគិតថ្លៃ។
លោក លឹម អូន ប្រធាននាយកប្រតិបត្តិនៃធនាគារស្ថាបនា បានមានប្រសាសន៍ថា៖ « ធនាគារស្ថាបនា ពិតជាមានមោទនភាព និងការសប្បាយរីករាយក្រៃលែង ដែលបានចូលរួមចំណែកគាំទ្រយ៉ាងពេញទំហឹងដល់មន្ទីរពេទ្យកុមារអង្គរ ដោយផ្តល់លទ្ធភាពដល់អតិថិជន បុគ្គលិក និងសាធារណជនទូទៅដែលមានទឹកចិត្តចូលរួមចំណែកក្នុងកិច្ចការមនុស្សធម៌ជាពិសេសជួយដល់មន្ទីរពេទ្យកុមារអង្គរដោយអាចធ្វើការបរិច្ចាគដោយភាពងាយស្រួល រហ័សទាន់ចិត្ត សុវត្ថិភាព តាមរយៈកម្មវិធីSathapana Mobile។
ចាប់តាំងពីការបើកបម្រើរសេវាពិនិត្យព្យាបាលនៅឆ្នាំ ១៩៩៩ មកទល់នឹងពេលបច្ចុប្បន្ន មន្ទីរពេទ្យកុមារអង្គរ បានផ្តល់ការព្យាបាលជូនកុមារកម្ពុជាប្រមាណជាង ២ លាន ៥ សែនករណីដល់កុមារកម្ពុជាទូទាំងប្រទេស ព្រមទាំងផ្តល់ការបណ្តុះបណ្តាលវេជ្ជសាស្រ្តដល់គិលានុបដ្ឋាយិកា និងវេជ្ជបណ្ឌិតរាប់រយនាក់ផងដែរ។
យុទ្ធនាការសប្បុរសធម៌ដ៏ធំ និងជាការផ្តួចផ្តើមថ្មីដែលមិនធ្លាប់មានពីមុនមករបស់ធនាគារ ស្ថាបនា ជាមួយមន្ទីរពេទ្យកុមារអង្គរ នឹងបង្កើនឱ្យមានការយល់ដឹងព្រមទាំងបង្ហាញពីបេសកកម្មរបស់មន្ទីរពេទ្យកុមារអង្គរក្នុងកិច្ចការមនុស្សធម៌នេះផងដែរ។ ស្របពេលជាមួយគ្នានេះ វារំលេចឱ្យឃើញពីតំរូវការជំនួយដែលត្រូវធ្វើការរៃអង្គាស ដើម្បីឧបត្ថម្ភគាំទ្រដល់មន្ទីរពេទ្យក្នុងការបន្តបេសកកម្មបម្រើសេវាពិនិត្យព្យាបាលជូនកុមារកម្ពុជាដែលកំពុងត្រូវការជាចាំបាច់។