Content image - Phnom Penh Post

ក្រុមហ៊ុន​ធានារ៉ាប់រង​អាយុជីវិត សុវណ្ណាភូមិ ឡាយហ្វ៍ ភីអិលស៊ី កាលពី​ថ្ងៃទី​ ២៧ ខែមិថុនា បានផ្តល់​សំណង​ចំនួន​ ២ ​ម៉ឺន​ដុល្លារ​ដល់​បុគ្គលិក​របស់​កាសែត​ភ្នំពេញ​ប៉ុស្តិ៍​ម្នាក់ ដើម្បី​ជួយ​សម្រួល​ដល់​ការចំណាយ​លើ​ការព្យាបាល​ជំងឺ​ធ្ងន់ធ្ងរ​របស់គាត់​។

សំណង​នេះ​ត្រូវ​បាន​ចំណាយ​បន្ថែម​លើ​អត្ថប្រយោជន៍​នៃ​គម្រោង​មូលដ្ឋាន​នៃ​ផលិតផល​ធានារ៉ាប់រង​ដែល​អតិថិជន​បាន​ទិញ​រួចហើយ​។ ការផ្តល់​អត្ថប្រយោជន៍​បន្ថែម​នេះ​គឺ​បង្ហាញ​អំពី​ការការពារ​ហិរញ្ញវត្ថុ​ដល់​គ្រួសារ​កម្ពុជា​ក្នុងករណី​មាន​ជំងឺ​ធ្ងន់ធ្ងរ​នៅ​ទូទាំង​ប្រទេស​។

លោក Loke Kah Meng អគ្គនាយក​ប្រតិបត្តិ​ក្រុមហ៊ុន​ធានារ៉ាប់រង​អាយុជីវិត​ សុវណ្ណាភូមិ ឡាយហ្វ៍ បាន​មាន​ប្រសាសន៍​ថា​៖ «​ក្នុងនាម​ជា​ក្រុមហ៊ុន​សាជីវកម្ម​ និង​ស្ថាប័ន​ហិរញ្ញវត្ថុ​ដែលមាន​ការទទួល​ខុសត្រូវ​ស្របតាម​ពាក្យស្លោក «​នៅទីនេះ​ដើម្បី​អ្នក​នៅ​ទីនេះ​ ដើម្បី​កម្ពុជា​» គឺ​យើង​នៅទីនេះ​ដើម្បី​ការពារ​សុខុមាលភាព​ហិរញ្ញវត្ថុ​របស់​គ្រួសារ​កម្ពុជា​ទាំងអស់​តាមរយៈ​សេវា​ធានារ៉ាប់រង​អាយុជីវិត​។

«​ការផ្តល់​ថវិកា​នេះ​នឹង​ជួយ​ពួកគេ​ឱ្យ​រក្សា​ស្ថិរភាព​ហិរញ្ញវត្ថុ​ក្នុងករណី​មាន​គ្រោះថ្នាក់ និង​ជំងឺ​ចំពោះ​ពួកគេ​ដែល​កើតឡើង​ដោយ​មិន​បានដឹង​មុន​។ ពេលនេះ យើង​រីករាយ​ក្នុង​ការផ្តល់​សំណង​ចំនួន ២ ​ម៉ឺន​ដុល្លារ​ដល់​បុគ្គលិក​របស់​កាសែត​ភ្នំពេញ​ប៉ុស្តិ៍​ក្នុង​ពេលវេលា​ដែល​គាត់​កំពុង​ខ្វះខាត​»​។

ពិធី​ប្រគល់​មូលប្បទានបត្រ​ត្រូវបាន​ធ្វើឡើង​នៅ​ការិយាល័យ​របស់​កាសែត​ភ្នំពេញ​ប៉ុស្តិ៍​។

ចាងហ្វាង និង​ជា​អគ្គនាយក កាសែត​ភ្នំពេញ​ប៉ុស្តិ៍ លោក លី តៃសេង បាន​មានប្រសាសន៍​ថា ក្រុមហ៊ុន​បាន​ទិញ​ធានារ៉ាប់រង​សម្រាប់​បុគ្គលិក​ទាំងអស់​ដោយ​មាន​គោលបំណង​ ដើម្បី​ផ្តល់​ការការពារ និង​ជួយ​សម្រាល​បន្ទុក​ហិរញ្ញវត្ថុ​របស់​ពួកគេ​ក្នុង​ពេល​ដែល​មាន​អាសន្ន​។

លោក​បាន​បញ្ជាក់ថា​៖ «​ការផ្តល់​ធានារ៉ាប់រង​អាយុជីវិត និង​គ្រោះថ្នាក់​គឺជា​អត្ថប្រយោជន៍​មួយ​របស់​ក្រុមហ៊ុន​យើង​ដែល​បានផ្តល់​ជូន​ដល់​បុគ្គលិក​ទាំងអស់​។ យើង​ជឿជាក់ថា ធានារ៉ាប់រង​នេះ​នឹង​ជួយ​ការពារ​និយោជិត និង​ក្រុមគ្រួសារ​របស់​ពួកគេ​ពី​ការខាតបង់​ផ្នែក​ហិរញ្ញវត្ថុ​ដែល​បណ្តាល​មកពី​ជំងឺ​ ឬ​របួស​ផ្សេងៗ​»៕ photos Hean Rangsey