ក្រសួងសេដ្ឋកិច្ច និង ហិរញ្ញវត្ថុនៅថ្ងៃច័ន្ទនេះ បានដាក់ឱ្យដំណើរការគម្រោងសហហិរញ្ញប្បទានទ្រទ្រង់សហគ្រាសធុនតូច និង មធ្យម ជំហានទី២ ដែលនឹងផ្តល់ភាពងាយស្រួលក្នុងការផ្តល់ប្រាក់កម្ចីសម្រាប់អាជីវកម្មដែលរងផលប៉ះពាល់ពីការផ្ទុះឡើងនៃជំងឺកូវីដ១៩។
គម្រោងដែលផ្តួចផ្តើមដោយរដ្ឋាភិបាលនេះ គឺត្រូវបានអនុវត្តដោយមានការគាំទ្រពីស្ថាប័នហិរញ្ញវត្ថុដែលចូលរួមដោយគម្រោងនេះមានគោលបំណងផ្តល់ឥណទានមានការប្រាក់ទាប ដើម្បីជំរុញការអាភិវឌ្ឍសហគ្រាសធុនតូច និងមធ្យម ក្នុងវិស័យអាទិភាព ដូចជា ឧស្សាហកម្ម សេវាកម្ម និង ពាណិជ្ជកម្មជាដើម។
លោកបណ្ឌិត អ៊ិន ចាន់នី ប្រធានសមាគមធនាគារនៅកម្ពុជា បានថ្លែងនៅក្នុងពិធីចុះហត្ថលេខានោះថា៖ «គម្រោងសហហិរញ្ញប្បទានទ្រទ្រង់សហគ្រាសធុនតូចនិងមធ្យម ជំហានទី២ ដែលផ្តួចផ្តើមដោយរដ្ឋាភិបាល ជាពិសេស ក្រសួង សេដ្ឋកិច្ច និង ហិរញ្ញវត្ថុនេះ មិនត្រឹមតែគាំទ្រដល់កិច្ចខិតខំប្រឹងប្រែងរបស់រដ្ឋាភិបាលក្នុងការស្តារសេដ្ឋកិច្ចពីជំងឺរាតត្បាតប៉ុណ្ណោះទេ ប៉ុន្តែក៏រួមចំណែកគាំទ្រដល់វិស័យ SME ផងដែរ ដើម្បីផ្តល់លទ្ធភាពងាយស្រួលក្នុងការទទួលបានហិរញ្ញប្បទានដែលមានការប្រាក់ទាប ដើម្បីបង្កើនការធ្វើពិពិធកម្មសេដ្ឋកិច្ច និង ជួយសម្រាលបន្ទុកអតិថិជនក្នុងអំឡុងពេលស្ថានភាពលំបាកនៃការរីករាលដាលនៃជំងឺកូវីដ១៩»។
មូលនិធិក្រោមគម្រោងសហហិរញ្ញប្បទានជំហានទី ២ នេះ ពាក់ព័ន្ធនឹងទឹកប្រាក់ ១០០ លានដុល្លារអាមេរិក ដែលក្នុងនោះ ៥០ លានដុល្លារអាមេរិក នឹងត្រូវផ្តល់ហិរញ្ញប្បទានដោយធនាគារ SME Bank ដែលដឹកនាំដោយរដ្ឋាភិបាល ខណៈនៅសល់គឺបានមកពីស្ថាប័នហិរញ្ញវត្ថុដែលចូលរួម៕