ក្នុងការបន្តគាំទ្រដល់រដ្ឋាភិបាល និងធុរកិច្ចកម្ពុជាក្នុងការស្តារសេដ្ឋកិច្ចឡើងវិញពីការរីករាលដាលនៃជំងឺកូវីដ ១៩ ឥឡូវនេះធនាគារ ព្រីនស៍ បានចាប់ដៃគូជាមួយធនាគារសហគ្រាសធុនតូច និងមធ្យមកម្ពុជា ដើម្បីអនុវត្តគម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យម ជំហានទី ២ ដែលជាប្រភពហិរញ្ញប្បទានសម្រាប់សហគ្រាសធុនតូច និងមធ្យមនៅកម្ពុជា។
គម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យម គឺជាកម្មវិធីមួយដែលផ្តល់ការគាំទ្រដល់សហគ្រាសធុនតូច និងមធ្យម ដោយផ្តល់ជូននូវហិរញ្ញប្បទាន ជាមួយអត្រាការប្រាក់ឥណទានដ៏សមរម្យ និងលក្ខខណ្ឌឥណទានមានភាពងាយស្រួល។ នៅពាក់កណ្តាលខែតុលា ឆ្នាំ ២០២០ គម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យម (SCFS) ជំហានទី ១ បានអនុម័តដោយជោគជ័យផ្តល់ជូននូវឥណទានដែលមានតម្លៃស្មើនឹង ១០០ លានដុល្លារអាមេរិកជាមួយនឹងអត្រាការប្រាក់កំណត់ត្រឹម ៧% សម្រាប់ម្ចាស់អាជីវកម្មសហគ្រាសធុនតូច និងមធ្យមចំនួន ៧៥៣ នាក់។
លោក ហ៊ន់ សុរចនា ប្រធាននាយកប្រតិបត្តិនៃធនាគារ ព្រីនស៍ ម.ក បានមានប្រសាសន៍ថា៖ «សហគ្រាសធុនតូច និងមធ្យមក្នុងស្រុក បានរួមចំណែកយ៉ាងសំខាន់ក្នុងការអភិវឌ្ឍប្រកបដោយនិរន្តរភាព និងសមធម៌ នៃសេដ្ឋកិច្ចកម្ពុជា។ ទោះជាយ៉ាងណា ក្នុងរយៈពេល ២ ឆ្នាំនៃការឆ្លងកាត់បញ្ហាប្រឈមដែលបណ្តាលមកពីជំងឺរាតត្បាតកូវីដ ១៩ វិស័យសហគ្រាសធុនតូច និងមធ្យមបានជួបផលលំបាកក្នុងការពង្រីក និង/ឬ រក្សាប្រតិបត្តិការអាជីវកម្មរបស់ខ្លួន ដោយសារតែខ្វះការគាំទ្រផ្នែកហិរញ្ញវត្ថុ ភាពលំបាកក្នុងការស្នើសុំប្រាក់កម្ចី និងអត្រាការប្រាក់ខ្ពស់»។
«ដោយចក្ខុវិស័យរបស់យើង គឺផ្តល់ដំណោះស្រាយហិរញ្ញវត្ថុល្អបំផុត និងក្លាយជាស្ថាប័នហិរញ្ញវត្ថុដែលជាជម្រើសទីមួយរបស់អតិថិជន យើងមានភាពសោមនស្សរីករាយក្នុងការបន្តការគាំទ្ររបស់យើងចំពោះកម្មវិធីហិរញ្ញប្បទាននេះ ក្រោមកិច្ចសហប្រតិបត្តិការជាមួយធនាគារសហគ្រាសធុនតូច និងមធ្យមកម្ពុជា»។
លោក ហ៊ន់ សុរចនា បានបន្ថែមថា៖ «យើងសង្ឃឹមថា គម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យមជំហានទី ២ នេះ អាចជួយដល់ការស្តារសេដ្ឋកិច្ចរបស់ប្រទេសយើង និងជួយអតិថិជនអាជីវកម្មរបស់យើងឱ្យសម្រេចបាននូវគោលដៅអាជីវកម្មរបស់ពួកគេ»។
លោក លឹម អូន នាយកប្រតិបត្តិនៃធនាគារសហគ្រាសធុនតូច និងមធ្យមកម្ពុជា បានលើកឡើងថា៖ « ខ្ញុំជឿជាក់យ៉ាងមុតមាំថា មូលនិធិនេះនឹងត្រូវបានប្រើប្រាស់យ៉ាងឆាប់រហ័ស ដើម្បីជួយសម្រួលដល់សហគ្រាសធុនតូច និងមធ្យមដែលជួបការលំបាកផ្នែកហិរញ្ញវត្ថុ ដើម្បីបន្តអាជីវកម្មរបស់ខ្លួនឡើងវិញ និងរួមចំណែកដល់ការស្តារសេដ្ឋកិច្ចឡើងវិញផងដែរ។ ខ្ញុំសូមថ្លែងអំណរគុណ និងទទួលស្គាល់ដោយស្មោះចំពោះធនាគារ ព្រីនស៍ ម.ក និងស្ថាប័នហិរញ្ញវត្ថុទាំងអស់ សម្រាប់ការបន្តសហការគ្នានៅក្នុងគម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យមជំហានទី ២ នេះ»។
ក្រោមគម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យមជំហានទី ២ ម្ចាស់អាជីវកម្មសហគ្រាសធុនតូច និងមធ្យម ដែលស្នើសុំឥណទានសហគ្រាសធុនតូច និងមធ្យមនៅធនាគារ ព្រីនស៍ នឹងទទួលបានអត្រាការប្រាក់ពិសេសចាប់ពី ៦.៥% ក្នុងមួយឆ្នាំជាមួយនឹងទំហំឥណទានអតិបរមារហូតដល់ ៥០០,០០០ ដុល្លារអាមេរិក និងរយៈពេលឥណទានរហូតដល់ ៧ ឆ្នាំ។
ធនាគារ ព្រីនស៍ បានត្រៀមខ្លួនរួចជាស្រេចក្នុងការបម្រើអតិថិជនអាជីវកម្មថ្មី និងអតិថិជនអាជីវកម្មចាស់ជាមួយឥណទានសហគ្រាសធុនតូច និងមធ្យមនេះក្រោមគម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យមក៏ដូចជាផលិតផលឥណទានទូទៅផងដែរ។
លោកអ្នកអាចស្នើសុំឥណទាននៅ ៣២ សាខារបស់ធនាគារ ព្រីនស៍ ម.ក នៅទូទាំងប្រទេស ឬទំនាក់ទំនងទូរស័ព្ទលេខ ១៨០០២០៨៨៨៨ នៅថ្ងៃនេះ ដើម្បីប្រឹក្សាជាមួយអ្នកជំនាញផ្នែកឥណទានរបស់ធនាគារ ព្រីនស៍ ម.ក (ដោយឥតគិតថ្លៃ)៕
