ក្រុមហ៊ុនខេមាគ្លូប៊ល កាលពីថ្ងៃសុក្របានប្រារព្ធពិធីសម្ពោធ និងដាក់ឱ្យដំណើរការជាផ្លូវការនូវ «មន្ទីរពហុព្យាបាលអន្តរជាតិខេមា ផ្លូវ ២០០៤» ដែលមានទីតាំងស្ថិតនៅច្រកចូលធំនៃបុរីអ័រគីដេឌឹរ៉ូយ៉ាល់ តាមបណ្តោយផ្លូវ ២០០៤ សង្កាត់អូរបែកក្អម រាជធានីភ្នំពេញ ក្រោមអធិបតីភាពរបស់ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន។
មន្ទីរពហុព្យាបាលអន្តរជាតិខេមា ផ្លូវ ២០០៤ ជាសាខាទី ៣ បន្ថែមទៅលើសាខា ២ ទៀតគឺ «មន្ទីរពហុព្យាបាលអន្តរជាតិខេមា ទួលគោក» និង«មន្ទីរពហុព្យាបាលអន្តរជាតិខេមា បឹងកេងកង»។ មន្ទីរពហុព្យាបាលអន្តរជាតិខេមា ផ្លូវ ២០០៤ ផ្តល់ជូនសេវាសំខាន់ៗដូចជា ផ្នែកព្យាបាលរបួស និងសង្គ្រោះបន្ទាន់ ផ្នែកពិនិត្យសុខភាព ពិគ្រោះ និងព្យាបាលជំងឺទូទៅ និងឯកទេសផ្នែកជំងឺកុមារ ផ្នែកវះកាត់ ផ្នែកជំងឺធ្ងន់ និងមណ្ឌលធ្វើរោគវិនិច្ឆ័យ។
លោកវេជ្ជបណ្ឌិត សោម លក្ខិណា សហស្ថាបនិក និងប្រធានក្រុមប្រឹក្សាភិបាលនៃមន្ទីរពហុព្យាបាលអន្តរជាតិខេមាថ្លែងថា មន្ទីរសម្រាកព្យាបាលទាំង ៣ នេះត្រូវបានបង្កើតឡើង ដើម្បីឆ្លើយតបនឹងការរីកចម្រើនរបស់ប្រទេសកម្ពុជា និងដើម្បីឆ្លើយតបនឹងតម្រូវការសេវាថែទាំសុខភាពឯកជនដែលមានគុណភាព និងស្តង់ដាខ្ពស់។
ដើម្បីអបអរការដាក់ដំណើរការជាផ្លូវការសាខាថ្មីនេះ មន្ទីរពេទ្យផ្តល់ការបញ្ចុះតម្លៃ ២០ ភាគរយលើរាល់ការពិគ្រោះ និងព្យាបាលនៅសាខាថ្មីនេះរហូតដល់ដំណាច់ឆ្នាំ ២០២២។ សម្រាប់ព័ត៌មានបន្ថែម សូមទាក់ទង ០៩៩ ៥៨៨ ៥៨៨៕ photos heng Chivoan