Pepper Bay ដែលជាក្រុមហ៊ុនផលិតម្រេចកំពតសរីរាង្គ និងគ្រឿងទេសកាលពីថ្ងៃអង្គារបានសម្ពោធហាងតាំងបង្ហាញ Kampot Gardens របស់ខ្លួនក្នុងរាជធានីភ្នំពេញ។ ហាងតាំងបង្ហាញ (showroom) នេះមានទីតាំងស្ថិតនៅផ្ទះលេខ ១ ផ្លូវ ៣២៣ ខណ្ឌទួលគោកមានលក់គ្រឿងទេសគ្រប់មុខ ដែលដាំដុះនៅក្នុងស្រុកដោយក្រុមហ៊ុន Pepper Bay ដូចជា ម្រេចកំពតខ្មៅ ក្រហម ស ម្រេចខ្ចី និងគ្រឿងទេសជាច្រើនមុខទៀត។
ហាងតាំងបង្ហាញ Kampot Gardens ក៏មានដាក់ដាំបង្ហាញដើមម្រេច ២-៣ ដើម ហើយក៏មានក្រុមអ្នកឯកទេសគ្រឿងទេស ណែនាំអំពីប្រវត្តិគ្រឿងទេស និងម្រេចកំពតយ៉ាងស៊ីជម្រៅផងដែរ។ នាយិកាប្រតិបត្តិក្រុមហ៊ុន Pepper Bay លោកស្រី Séverine Gagneraud ថ្លែងថា៖« យើងខិតខំប្រឹងប្រែងយ៉ាងខ្លាំងក្នុងការបង្កើតផលិតផលថ្មី មិនត្រឹមតែផលិតផលម្រេចកំពតប៉ុណ្ណោះទេ ប៉ុន្តែក៏មានគ្រឿងទេសផ្សេងៗទៀតដែរ ដែលធានាបាននូវគុណភាពខ្ពស់បំផុត។
មេចុងភៅល្បីៗលើពិភពលោក ចូលចិត្តច្នៃប្រឌិតមុខម្ហូបប្លែកៗដោយខ្លួនឯង ដូច្នេះពួកគេកំពុងស្វែងរកផលិតផលពិសេសផ្សេងៗ»។ ហាងតាំងបង្ហាញនេះចាប់បើកពីថ្ងៃចន្ទដល់ថ្ងៃសុក្រចាប់ពីម៉ោង ៨: ៣០ ដល់ម៉ោង ៥:៣០ ហើយថ្ងៃសៅរ៍ បើកពីម៉ោង ៩:៣០ ដល់ម៉ោង ៤ រសៀល។ សម្រាប់ព័ត៌មានបន្ថែម សូមទាក់ទងទូរស័ព្ទ ០១២ ៧៦០ ៣២៣ អ៊ីមែល info@kampotgardens.com ឬហ្វេសប៊ុកផេចផ្លូវការរបស់ Pepper Bay៕ photos sUPPLIED
