អ្នកស្នេហាបាល់ទាត់រាប់ពាន់នាក់បានទៅកាន់ពហុកីឡដ្ឋានជាតិ មរតកតេជោ ក្នុងរាជធានីភ្នំពេញ ដើម្បីទស្សនាពានរង្វាន់បាល់ទាត់ពិភពលោក FIFA World Cup ដែលត្រូវបានដាក់តាំងបង្ហាញនៅកម្ពុជា ជាលើកដំបូងបំផុតមិនធ្លាប់មានពីមុន។ អ្នកគាំទ្រកីឡាបាល់ទាត់នៅកម្ពុជា ទទួលបានបទពិសោធន៍ដ៏អស្ទារ្យពីពានបាល់ទាត់ពិភពលោក FIFA World Cup Trophy Tour ដែលនាំជូនដោយក្រុមហ៊ុនភេសជ្ជៈ កូកា-កូឡា ជាពានរង្វាន់ដ៏មានតម្លៃបំផុតនៅក្នុងវិស័យបាល់ទាត់។
ក្នុងនាមជាដៃគូដ៏យូរអង្វែងរបស់ សហព័ន្ធបាល់ទាត់ពិភពលោក FIFA ក្រុមហ៊ុនភេសជ្ជៈកូកា-កូឡា មានសិទ្ធិផ្តាច់មុខក្នុងការរៀបចំព្រឹត្តិការណ៍ដំណើរគោចរជុំវិញពិភពលោកនៃពានរង្វាន់បាល់ទាត់ពិភពលោក FIFA World Cup Trophy Tour ដោយផ្តល់ឱ្យអ្នកគាំទ្ររាប់ពាន់នាក់នៅទូទាំងពិភពលោកនូវឱកាសដើម្បីមើលពានរង្វាន់បាល់ទាត់ដែលគ្រប់ប្រទេសប្រាថ្នាចង់បានបំផុតនៅលើពិភពលោកមុនការប្រកួត FIFA World Cup 2022 នៅប្រទេស កាតា។
ព្រឹត្តិការណ៍ដ៏អស្ទារ្យនេះបានចាប់ផ្តើមជាមួយនឹងការសម្តែងស្វាគមន៍ដ៏កក្រើកពីសំណាក់អ្នកវាយស្គរបុរាណខ្មែរ និងអ្នករាំរបាំអប្សរា ដែលបង្កើតបានបរិយាកាសដ៏សប្បាយរីករាយ ខណៈពានរង្វាន់បាល់ទាត់ពិភពលោកដើម ត្រូវបានដាក់បង្ហាញជាផ្លូវការសម្រាប់ប្រជាជនកម្ពុជា។
កីឡាករកម្ពុជា ធារី ចាន់ថាប៊ីន និងស៊ូ យ៉ាទី ក៏បានចូលរួមជាមួយអ្នកគាំទ្រកីឡាបាល់ទាត់នៅពហុកីឡដ្ឋាន មរតកតេជោ ផងដែរដើម្បីទស្សនាពានបាល់ទាត់ពិភពលោកដើមមួយនេះដែលធ្វើឡើងពីមាសសុទ្ធទម្ងន់ ៦,១៤២គីឡូក្រាម។
ទោះបីអ្នកមានសំណាងតែ ២០០០នាក់ មានសិទ្ធិផ្តាច់មុខថតរូបជាមួយពានដើមក៏ដោយ ក៏អ្នកគាំទ្រដទៃទៀតមិនទាន់ខកចិត្តដែរ។ ការប្រគុំតន្ត្រី បន្ទាប់ពីបង្ហាញពានរង្វាន់បានបើកស្វាគមន៍សាធារណជនទូទៅ ជាមួយនឹងការសម្តែងពី DJ និងសិល្បករសិល្បការិនីក្នុងស្រុកល្បីៗដូចជា លោក ឡាយ ប៊ុនឡេង និងកញ្ញា Mina ជាដើម។
ដំណើរទេសចរណ៍ជុំវិញពិភពលោកនៃ FIFA World Cup Trophy Tour ដែលរៀបចំដោយក្រុមហ៊ុនភេសជ្ជៈកូកា-កូឡា នឹងធ្វើដំណើរទេសចរទៅកាន់ប្រទេសនិងដែនដីចំនួន ៥១ ហើយនេះក៏ជាលើកដំបូងមិនធ្លាប់មាន ដែលពានរង្វាន់បាល់ទាត់ពិភពលោក នឹងធ្វើដំណើរទេសចរណ៍ទៅប្រទេសដែលប្រកួតក្នុងវគ្គជម្រុះ World Cup ទាំង ៣២ នឹងនាំឱ្យអាចសម្រេចបាននូវគោលបំណងថា នឹងត្រូវទស្សនកិច្ចឱ្យបានគ្រប់សមាជិកទាំង ២១១ នៅឆ្នាំ ២០៣០។
នេះគឺជាលើកទី៥ ហើយសម្រាប់ការរៀបចំព្រឹត្តិការណ៍ដំណើរគោចរជុំវិញពិភពលោក នៃពានរង្វាន់បាល់ទាត់ពិភពលោក FIFA World Cup Trophy Tour រៀបចំដោយក្រុមហ៊ុនភេសជ្ជៈកូកា-កូឡា៕
