វេស្ប៉ា ដែលជានិមិត្តសញ្ញាដ៏ប្រណីត និងល្បីល្បាញរបស់ប្រទេសអ៊ីតាលីបានប្រារព្ធខួប ១០ ឆ្នាំនៃការវិលត្រឡប់មកព្រះរាជាណាចក្រវិញកាលពីថ្ងៃទី ១៧ ខែមិថុនាជាមួយនឹងការបើកសម្ពោធមជ្ឈមណ្ឌលលក់ និងតាំងបង្ហាញម៉ូតូវ៉េស្ប៉ាថ្មីរបស់ខ្លួន នៅក្នុងរាជធានីភ្នំពេញ។ ពិធីនេះទទួលបានការអញ្ជើញជាអធិបតីភាពដ៏ខ្ពង់ខ្ពស់របស់ឯកឧត្តម បណ្ឌិត ស៊ាង ប៊ុនលាង រដ្ឋលេខាធិការក្រសួងមហាផ្ទៃ និងជាទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវ អគ្គមហាឧបាសិកា ហ៊ុន ប៊ុនធឿន ទីប្រឹក្សាក្រសួងការបរទេស និងសហប្រតិបត្តិការអន្តរជាតិ និងជាទីប្រឹក្សាគណៈសង្ឃនាយកគណៈមហានិកាយនៃព្រះរាជាណាចក្រកម្ពុជា ព្រមទាំងភ្ញៀវកិត្តិយសជាតិ និងអន្តរជាតិជាច្រើនរូបទៀត។ លោក Simone Niccolai អគ្គនាយក និងជានាយកប្រតិបត្តិក្រុមហ៊ុន Vespa/Piaggio ប្រចាំតំបន់អាស៊ីប៉ាស៊ីហ្វិកបានមានប្រសាសន៍ថា៖ «ជាមួយនឹងមជ្ឈមណ្ឌលលក់ និងតាំងបង្ហាញម៉ូតូវ៉េស្ប៉ាដ៏ទំនើបនេះ អតិថិជនរបស់វ៉េស្ប៉ា និង Piaggio ទាំងអស់នៅកម្ពុជា និងទទួលបាននូវម៉ូតូដ៏ស្រស់ស្អាតក៏ដូចជាទទួលបានព័ត៌មានថ្មីៗអំពីម៉ាកផលិតផលរបស់យើង តាមរយៈបុគ្គលិកដែលបានទទួលការបណ្តុះបណ្តាលយ៉ាងពេញលេញ ហើយអ្វីដែលកាន់តែពិសេសទៀតនោះគឺសេវាកម្មជួសជុលក្រោយការលក់។ អ្វីៗទាំងអស់នេះ ឥឡូវនេះគឺមាននៅក្រោមដំបូលតែមួយ ដើម្បីផ្តល់នូវបទពិសោធដ៏អស្ចារ្យសម្រាប់អ្នកប្រើប្រាស់»៕ រូបថត លៀប ទេពិទូ