ប្រទេសកូរ៉េខាងត្បូង និងកូរ៉េខាងជើង កំពុងតែពិភាក្សាគ្នា ដើម្បីរៀបចំឱ្យមានជំនួបរវាងលោកប្រធានា ធិបតីកូរ៉េខាងត្បូង Moon Jae-in និងមេដឹកនាំកូរ៉េខាងជើង Kim Jung Un។ នេះបើតាមការរាយការណ៍របស់សារព័ត៌មាន Reuters ផ្អែកលើប្រភពចំនួន ៣ ផ្សេងគ្នាពីរដ្ឋាភិបាលរដ្ឋធានីសេអ៊ូល។
ប្រភពខាងលើក៏បានឱ្យដឹងថា កូរ៉េទាំង ២ គ្រោងនឹងស្ថាបនាអគារទំនាក់ទំនងគ្នាឡើងវិញ ក្រោយពីអគារនេះត្រូវបានបំផ្ទុះកម្ទេចចោលដោយកូរ៉េខាងជើងកាលពីខែមិថុនា ឆ្នាំ ២០២០ កន្លងទៅ។
ទាក់ទិននឹងកិច្ចប្រជុំមេដឹកនាំនៃកូរ៉េទាំងទ្វេនេះ ប្រភពបានឱ្យដឹងថា នៅពេលនេះភាគីទាំង ២ ព្រមព្រៀងឱ្យមានជំនួបរវាងមេដឹកនាំទាំង២ហើយ តែមិនទាន់អាចកំណត់ពេលវេលាបានច្បាស់លាស់ ដោយសារតែស្ថានភាពជំងឺកូវីដ ១៩។ ប្រភពខាងលើបានបន្ថែមថា ជំនួបទល់មុខគ្នា ជាជម្រើសដ៏ល្អមួយ តែខាងកូរ៉េខាងត្បូងក៏ស្វាគមន៍ឱ្យមានជំនួបតាមប្រព័ន្ធវីដេអូពីចម្ងាយ ប្រសិនបើកូរ៉េខាងជើងមិនចង់ជួបទល់មុខគ្នា។
ការរាយការណ៍ធ្វើឡើងក្រោយពេលដែលកូរ៉េទាំង ២ បានព្រមព្រៀងឱ្យភ្ជាប់ប្រព័ន្ធទូរស័ព្ទទាក់ទងទាក់ទងគ្នាឡើងវិញ។ អ្វីដែលគួរឱ្យកត់សម្គាល់មួយទៀតនោះគឺ កូរ៉េទាំងសងខាងបានផ្លាស់ប្ដូរសារលិខិតឆ្លើយឆ្លងមិនតិចជាង ១០ ដងទេ ចាប់តាំងពីខែមេសាមក៕
ហ៊ីម រដ្ឋា