ប្រធានាធិបតីបារាំង លោក អេម៉ានុយអែល ម៉ាក្រុង និងនាយករដ្ឋមន្ត្រីឥណ្ឌា ណារិនដ្រា ម៉ូឌី នៅថ្ងៃអង្គារ បានប្តេជ្ញា «ធ្វើសកម្មភាពរួមគ្នា» នៅក្នុងតំបន់ឥណ្ឌូ-ប៉ាស៊ីហ្វិកដោយសារជម្លោះកាន់តែខ្លាំងឡើងជាមួយអូស្ត្រាលី និងអាមេរិក ជុំវិញកិច្ចសន្យាទិញនាវាមុជទឹកនាពេលថ្មីៗនេះ។
ការពិភាក្សាតាមទូរស័ព្ទរវាងលោកម៉ាក្រុងជាមួយលោក ម៉ូឌី បានកើតឡើងចំពេលវេលាមួយយ៉ាងច្បាស់គឺ ខណៈដែលកំហឹងរបស់បារាំងហាក់ដូចជាមិនថយចុះសោះ បន្ទាប់ពីអូស្ត្រាលីដកខ្លួនចេញពីកិច្ចសន្យានាវាមុជទឹកជាមួយខ្លួន ហើយបែរទៅគាំទ្រដល់នាវាមុជទឹកអាមេរិកដែលជាផ្នែកមួយនៃសម្ព័ន្ធភាពជាមួយវ៉ាស៊ីនតោន និងចក្រភពអង់គ្លេស។
មន្ត្រីអាមេរិកបាននិយាយថា ប្រធានាធិបតីអាមេរិកលោក ចូ បៃដិន កំពុងស្វែងរកការហៅ ទូរស័ព្ទជាមួយលោក ម៉ាក្រុង នៅប៉ុន្មានថ្ងៃខាងមុខនេះ ដើម្បីបន្ធូរបន្ថយភាពតានតឹងប៉ុន្តែនេះមិនទាន់ បានសម្រេចទេដោយលោកម៉ាក្រុង បានចាត់វិធានការដែលមិនធ្លាប់មានពីមុនមកក្នុងការហៅ ឯកអគ្គរដ្ឋទូតបារាំងប្រចាំប្រទេសអូស្ត្រាលី និងសហរដ្ឋអាមេរិកឱ្យត្រឡប់ចូលប្រទេសបារាំងវិញ។
លោក ម៉ាក្រុង បានធានាដល់លោក ម៉ូឌី អំពីការបន្តប្តេជ្ញាចិត្ត របស់បារាំងចំពោះការពង្រឹងស្វ័យភាពយុទ្ធសាស្ត្ររបស់ឥណ្ឌា រួមទាំងមូលដ្ឋានឧស្សាហកម្ម និងបច្ចេកវិទ្យារបស់ខ្លួនដែលជាផ្នែកមួយនៃទំនាក់ទំនងជិតស្និទ្ធ ដោយផ្អែកលើការជឿទុកចិត្ត និងការគោរពគ្នាទៅវិញទៅមក។
សេចក្តីថ្លែងការណ៍ពីការិយាល័យរបស់លោក ម៉ាក្រុង បាននិយាយថា គោលដៅរួមរបស់ប្រទេសបារាំង និងឥណ្ឌា នឹងមានគោលបំណងលើកកម្ពស់ «ស្ថិរភាពក្នុងតំបន់ និងនីតិរដ្ឋស្របពេលដែលមិនប្រកាន់យកនូវរបបអនុត្តរភាពណាមួយ»។
សម្ព័ន្ធភាពយុទ្ធសាស្ត្រថ្មីគឺ AUKUS ត្រូវបានគេមើលឃើញថា កំពុងព្យាយាមប្រឆាំងនឹងការកើនឡើងនៃអំណាចរបស់ចិននៅក្នុងតំបន់។ ទីក្រុងប៉ារីសក្នុងរយៈពេលចុងក្រោយនេះ បានព្យាយាមរឹតចំណងមិត្តភាពជាមួយឥណ្ឌា៖ នៅឆ្នាំ ២០១៦ ភាគីទាំង ២ បានចុះហត្ថលេខាលើកិច្ចព្រមព្រៀងមួយដែលតម្លៃរាប់ពាន់លានដុល្លារសម្រាប់យន្តហោះចម្បាំង Rafale របស់បារាំងចំនួន ៣៦ គ្រឿង សម្រាប់ទីក្រុងញូវដេលី។
បណ្តាញសារព័ត៌មានឥណ្ឌានាពេលថ្មីៗនេះ បានប៉ាន់ស្មានថា ការលុបចោលកិច្ចព្រមព្រៀងនាវាមុជទឹករបស់អូស្ត្រាលីអាចបង្កឱ្យមានការពិភាក្សារវាងបារាំង និងឥណ្ឌា អំពីកិច្ចព្រមព្រៀងនាវាមុជទឹកដែលអាចពាក់ព័ន្ធនឹងការផ្ទេរបច្ចេកវិទ្យាមកឥណ្ឌា។
ក្នុងអំឡុងដំណើរទស្សនកិច្ចនៅទីក្រុងញូវដេលី នៅខែកញ្ញាឆ្នាំ ២០២០ រដ្ឋមន្ត្រីការពារជាតិបារាំងអ្នកស្រី Florence Parly បានពិភាក្សាអំពីគំនិត និងភាពដែលអាចទៅរួចដែលថាកិច្ចព្រមព្រៀង Rafale អាចនាំឱ្យមានការលក់សព្វាវុធផ្សេងទៀតរួមទាំងនាវាមុជទឹក នេះបើយោងតាមប្រភពក្រសួងការពារជាតិបារាំង៕
មឹង ច័ន្ទសុម៉ានីតា