លោកប្រធានាធិបតី ស៊ី ជីនភីង (ឆ្វេង) និងលោក ចូ បៃដិន។ AFP
.jpg)
កាលពីថ្ងៃអង្គារ ទី ២១ កញ្ញា ប្រធានាធិបតីចិនលោក ស៊ី ជីនភីង បាននិយាយនៅក្នុងការថ្លែងសុន្ទរកថាចំពោះមហាសន្និបាតអង្គការសហប្រជាជាតិថា ប្រទេសចិន នឹងមិនសាងសង់គម្រោងថាមពលដើរដោយធ្យូងថ្មបន្ថែមទៀតនៅបរទេស ដែលនេះជាការបន្ថែមលើការប្ដេជ្ញារបស់ចិនក្នុងការដោះស្រាយបញ្ហាប្រែប្រួលអាកាសធាតុ។
លោក ស៊ី មិនបានផ្ដល់ព័ត៌មានលម្អិតទេ ប៉ុន្តែប្រកាសនេះអាចមានន័យថា ចិនអាចនឹងកាត់បន្ថយហិរញ្ញប្បទានរោងចក្រអគ្គិសនីដើរដោយធ្យូងថ្មនៅប្រទេសកំពុងអភិវឌ្ឍន៍។
ប្រទេសចិន បានស្ថិតនៅក្រោមសម្ពាធការទូតយ៉ាងខ្លាំង ដើម្បីបញ្ចប់ការផ្តល់ហិរញ្ញប្បទានធ្យូងថ្មរបស់ខ្លួននៅក្រៅប្រទេស ព្រោះវាអាចធ្វើឱ្យពិភពលោកមានភាពងាយស្រួលក្នុងការបន្តដំណើរតាមគន្លងទៅកាន់គោលដៅនៃកិច្ចព្រមព្រៀងអាកាសធាតុទីក្រុងប៉ារីស ដើម្បីកាត់បន្ថយការបញ្ចេញឧស្ម័នផ្ទះកញ្ចក់។
ការប្រកាសរបស់លោក ស៊ី ធ្វើឡើងបន្ទាប់ពីអគ្គលេខាធិការអង្គការសហប្រជាជាតិលោក អង់តូនីញ៉ូ ហ្គុយតឺរេស បានជំរុញឱ្យប្រទេសចិន ធ្វើការប្ដេជ្ញានេះ តាមអ្វីដែលសមភាគីនៅទ្វីបអាស៊ីកូរ៉េខាងត្បូង និងជប៉ុន បានធ្វើកាលពីដើមឆ្នាំនេះ។
លោក ស៊ី បាននិយាយនៅក្នុងសុន្ទរកថាវីដេអូដែលថតទុកមុនថា៖ «ប្រទេសចិន នឹងបង្កើនការគាំទ្រដល់ប្រទេសកំពុងអភិវឌ្ឍន៍ដទៃទៀតក្នុងការអភិវឌ្ឍថាមពលបៃតង និងថាមពលកាបូនទាបហើយនឹងមិនបង្កើតគម្រោងថាមពលដើរដោយធ្យូងថ្មថ្មីនៅបរទេសឡើយ»។
លោក ស៊ី បានធ្វើការសន្យាម្ដងទៀតថា ប្រទេសចិន នឹងសម្រេចបាននូវកម្រិតកាបូនខ្ពស់បំផុតមុនឆ្នាំ ២០៣០ ហើយអព្យាក្រឹតភាពកាបូនមុនឆ្នាំ ២០៦០។ អ្នកជំនាញខ្លះ បានរិះគន់ថាគោលដៅនេះ មិនមានមហិច្ឆតាគ្រប់គ្រាន់ទេ ប៉ុន្តែអនុញ្ញាតឱ្យចិនទាមទារមូលដ្ឋានសីលធម៌លើបញ្ហានេះ ខណៈពេលដែលអតីតប្រធានាធិបតីអាមេរិកលោក ដូណាល់ ត្រាំ បាននិយាយថា ការប្រែប្រួលអាកាសធាតុគឺជារឿងក្លែងក្លាយ ហើយបានដកអាមេរិកចេញពីកិច្ចព្រមព្រៀងក្រុងប៉ារីស។
ប្រទេសចិន ដែលជាអ្នកបញ្ចេញឧស្ម័នផ្ទះកញ្ចក់ធំជាងគេបំផុតនៅលើពិភពលោក នៅតែពឹងផ្អែកយ៉ាងខ្លាំងលើធ្យូងថ្មសម្រាប់តម្រូវការថាមពលក្នុងស្រុករបស់ខ្លួន៕
