ប្រធានាធិបតីប៉ាឡេស្ទីន លោក Mahmoud Abbas បាននិយាយថា ខ្លួនទុកពេល ១ ឆ្នាំដល់អ៊ីស្រាអែល ដើម្បីដកខ្លួនចេញពីទឹកដី ដែលខ្លួនបានកាន់កាប់ហើយ និងគំរាមដកការទទួលស្គាល់អ៊ីស្រាអែល ប្រសិនបើមិនធ្វើតាមសំណើនេះ។ នេះបើតាមឱ្យដឹងពីសារព៏ត៌មាន Al Jazeera។
នៅក្នុងសុន្ទរកថាតាមប្រព័ន្ធអនឡាញមួយទៅកាន់មហាសន្និបាតអង្គការសហប្រជាជាតិ (UNGA) កាលពីថ្ងៃ សុក្រ លោក Abbas បាននិយាយថា លោកនឹងលែងទទួលស្គាល់អ៊ីស្រាអែល ដោយផ្អែកលើព្រំដែនមុនឆ្នាំ ១៩៦៧ ដែលជាមូលដ្ឋានគ្រឹះនៃកិច្ចប្រឹងប្រែងសន្តិភាព ៣ ទសវត្សរ៍ទៀតហើយ ប្រសិនបើប្រជាជនប្រទេសនេះ មិនព្រមដកខ្លួនចេញពីទឹកដីរដ្ឋ ដែលប៉ាឡេស្ទីនកាន់កាប់បានទាន់ពេលនោះ។
លោក Abbas បាននិយាយថា៖«យើងសូមបញ្ជាក់ថា អ៊ីស្រាអែលមានពេល ១ ឆ្នាំ ដើម្បីដកខ្លួនចេញពីទឹកដីប៉ាឡេស្ទីន ដែលខ្លួនកាន់កាប់នៅឆ្នាំ ១៩៦៧ រួមទាំងហ្ស៊េរុយសាឡិមខាងកើត។ ប្រសិនបើរឿងនេះ មិនអាចសម្រេចបាន មានរឿងអីយើងត្រូវទទួលស្គាល់អ៊ីស្រាអែល ដោយផ្អែកលើព្រំដែនឆ្នាំ ១៩៦៧?»
មេដឹកនាំប៉ាឡេស្ទីន ក៏បានអំពាវនាវដល់អគ្គលេខាធិការអង្គការសហប្រជាជាតិលោក Antonio Guterres ឱ្យកោះប្រជុំសន្និសីទអន្តរជាតិ និងបានបង្ហាញពីឆន្ទៈរបស់ខ្លួនធ្វើការពេញ ១ ឆ្នាំលើការដោះស្រាយស្ថានភាពចុងក្រោយរបស់រដ្ឋអ៊ីស្រាអែល និងប៉ាឡេស្ទីន ស្របតាមដំណោះស្រាយរបស់អង្គការសហប្រជាជាតិផងដែរ៕