អ្នកតវ៉ាប៉ាឡេស្ទីន គប់ដុំថ្ម និងដុតកង់ឡានខណៈពួកគេប្រឈមមុខដាក់គ្នាជាមួយកងសន្តិសុខអ៊ីស្រាអែលនៅតំបន់វេសបែងកាលពីថ្ងៃទី២៤ កញ្ញា។ AFP
.jpg)
ជនជាតិប៉ាឡេស្ទីនចំនួន ៥ នាក់ បានបាត់បង់ជីវិត ដោយប្រតិបត្តិការយោធាអ៊ីស្រាអែលកាលពីថ្ងៃអាទិត្យកន្លងទៅនៅតំបន់West Bank។នេះបើតាមការចុះផ្សាយរបស់សារព័ត៌មាន Al Jazeera។
យោងតាមការឱ្យដឹងរបស់ក្រសួងសុខាភិបាលប៉ាឡេស្ទីនមនុស្សចំនួន២នាក់ ត្រូវបានសម្លាប់នៅទីប្រជុំជន Burqin ដែលនៅក្បែរទីក្រុង Jenin ហើយ៣នាក់ទៀត ត្រូវបានសម្លាប់នៅទីប្រជុំជន Biddu ដែលនៅជិតទីក្រុងហ្ស៊េរុយសាឡិម។
សារព័ត៌មានក្នុងស្រុកប៉ាឡេស្ទីន បានចុះផ្សាយថា ហេតុការណ៍នេះ កើតឡើងបន្ទាប់ពីខាងអ៊ីស្រា អែលចូលឆែកឆេរនៅតាមផ្ទះក្នុងភូមិប៉ាឡេស្ទីនមួយចំនួនដែលបណ្ដាលឱ្យមានការប៉ះទង្គិចគ្នា។
ចំណែកឯសារព័ត៌មានអ៊ីស្រាអែលវិញបានហៅប្រតិបត្តិការយោធានេះថាជាប្រតិបត្តិការប្រឆាំងនឹងក្រុមសកម្មប្រយុទ្ធHamasដែលជាចលនាតស៊ូអ៊ិស្លាមរបស់ប៉ាឡេស្ទីន។ខាងអ៊ីស្រាអែលបានបន្ថែមថា ទាហានរបស់ខ្លួនចំនួន២នាក់បានរបួសធ្ងន់ធ្ងរក្នុងប្រតិបត្តិការនេះ។
ប៉ាឡេស្ទីនជាគោលការណ៍មានសិទ្ធិជារដ្ឋគ្រប់គ្រងមួយចំនួននៅតំបន់ West Bank (ភាគកណ្ដាលអ៊ីស្រាអែល) និងតំបន់ Gaza (ជាប់សមុទ្រមេឌីទែរ៉ាណេ)។ យ៉ាងណាមិញ ក្នុង២តំបន់នេះ ក៏មានអាជ្ញាធរគ្រប់គ្រងផ្សេងគ្នាផងដែរ ដោយតំបន់ West Bank គ្រប់គ្រងដោយអាជ្ញាធរប៉ាឡេស្ទីន (PA) និងតំបន់ Gaza គ្រប់គ្រងដោយក្រុម Hamas៕
ហ៊ីម រដ្ឋា
