ស្ទើរតែជិតកន្លះខែទៅហើយ ចាប់តាំងពីមេដឹកនាំអូទ្រីសវ័យ ៣៥ ឆ្នាំ លោក Sebastian Kurz បានបញ្ចប់តំណែងជាអធិការបតីដែលលោកបានកាន់កាប់អស់រយៈពេល ៤ ឆ្នាំមកហើយ ក្រោយរឿងអាស្រូវនយោបាយពាក់ព័ន្ធនឹងអំពើពុករលួយផ្ទុះឡើង។
ទោះបីជាលោកមិនទាន់ត្រូវបានគេចោទប្រកាន់ឬយ៉ាងណាក្ដី ប៉ុន្តែរឿងអាស្រូវនៅតែផ្ទុះខ្លាំងឡើង ដោយលោក និងសម្ព័ន្ធមិត្តជិតស្និទ្ធត្រូវបានគេសង្ស័យថា បានប្រើប្រាស់ប្រាក់របស់អ្នកបង់ពន្ធដោយខុសច្បាប់ ដើម្បីសូកប៉ាន់អង្គភាពប្រព័ន្ធផ្សព្វផ្សាយនានាឱ្យផ្សាយពីរឿងវិជ្ជមានរបស់លោក រហូតជួយឱ្យលោកអាចចូលកាន់អំណាចនៅខែធ្នូ ឆ្នាំ ២០១៧។
ដោយមិនគិតពីករណីផ្លូវច្បាប់ណាមួយដែលអាចចោទប្រកាន់បានពីបទសូកប៉ាន់ ឬក្លែងបន្លំ ព្រះរាជអាជ្ញារឿងឧក្រិដ្ឋកម្មកណ្តាលទាំង ២ កំពុងស៊ើបអង្កេតដោយបង្ហាញពីផ្នែកអាក្រក់មួយចំពោះរចនាប័ទ្មរដ្ឋាភិបាលរបស់លោក Kurz ដោយរាប់ចាប់តាំងពីសំណុំនៃការបង្ហាញព័ត៌មានដែលគួរឱ្យភ្ញាក់ផ្អើល រហូតដល់ភាពអាម៉ាស់នៃការប្រកាសពីភាពស្មោះត្រង់ពេលឡើងកាន់អំណាច។
លោក Herbert Kickl ប្រធានគណបក្សស្តាំនិយម «សេរីភាព» បាននិយាយក្នុងសម័យប្រជុំសភា បន្ទាន់មួយកាលពីថ្ងៃអង្គារសប្តាហ៍មុនថា៖ «ឥឡូវនេះ ប្រទេសអូទ្រីស បានដឹងច្បាស់នូវរឿងមួយគឺថា ការរំលោភអំណាច អំពើពុករលួយជាប្រព័ន្ធ ការកេងប្រវ័ញ្ចប្រជាជន ការក្លែងបន្លំ និងការលាក់ពុត គឺជាអ្វីដែលធ្វើឱ្យគណបក្សប្រជាជនរួមគ្នាជាស្នូល»។
ក្នុងការបោះឆ្នោតចុងក្រោយនៅខែកញ្ញា ឆ្នាំ ២០១៩ លោក Kurz បានផ្តល់ឱ្យគណបក្សប្រជាជនរបស់លោក នូវការបោះឆ្នោតមួយក្នុងចំណោមអាណត្តិធំបំផុតដែលមិនធ្លាប់មានរហូតដល់
៣៧,៥ ភាគរយនៃការបោះឆ្នោត។ សូម្បីតែបន្ទាប់ពីការលាលែងពីតំណែងអធិការបតីរួចហើយ ក៏លោក Kurz នៅតែជាមេដឹកនាំគណបក្សហើយនឹងដឹកនាំការប្រជុំសភាដែលផ្តល់ឱ្យលោកដោយស្វ័យប្រវត្តិនូវកៅអីនៅឯតុគណៈរដ្ឋមន្ត្រី។
រដ្ឋាភិបាលបច្ចុប្បន្នដែលដឹកនាំដោយលោក Alexander Schallenberg ជាអ្នកស្មោះត្រង់នឹង លោក Kurz បានរួចផុតពីការបោះឆ្នោតដកសេចក្ដីទុកចិត្ត។ យ៉ាងណាមិញ កំហឹងនៅតែមានក្នុងចំណោមអ្នកតំណាងរាស្ត្រដោយពួកគេ បានរិះគន់នូវអ្វីដែលពួកគេហៅថា «ប្រព័ន្ធឃើហ្ស» ជាបណ្តាញមានការឧបត្ថម្ភគាំទ្រពីអតីតអធិការបតីរូបនេះនៅទូទាំងទិដ្ឋភាពនយោបាយសេដ្ឋកិច្ច និងប្រព័ន្ធផ្សព្វផ្សាយអូទ្រីស។
លោកស្រី Stephanie Krisper សមាជិកសភាមកពីបក្សវេទិកាសេរីនិងអូទ្រីសថ្មី (NEOS) និងជាអ្នករិះគន់មិនសំចៃមាត់ចំពោះអំពើពុករលួយរបស់រដ្ឋាភិបាលបាននិយាយថា៖ «អ្វីដែលប្លែកគឺរបៀបដែល លោក Sebastian Kurz និងគណបក្សប្រជាជនថ្មីរបស់លោកធ្វើសកម្មភាពមិនត្រឹមត្រូវ និងអ្វីដែលប្រព័ន្ធរបស់បក្សនេះមានឆន្ទៈធ្វើ ដើម្បីការពារខ្លួន ដោយចាប់តាំងពីថ្ងៃដំបូងពួកគេបានវាយប្រហារប្រព័ន្ធយុត្តិធម៌ និងការស៊ើបអង្កេតប្រឆាំងពួកគេ»។
លោកស្រីបន្តថា៖ «អំណាចពុករលួយ ត្រូវបានគេស្គាល់ច្បាស់ហើយជាការពិតនៅក្នុងប្រទេសអូទ្រីសវាមិនមែនគ្រាន់តែជាអ្វីដែលចាប់ផ្តើមជាមួយប្រព័ន្ធឃើហ្សនោះទេ»។
ក្នុងឆ្នាំ ២០១៧ លោក Kurz ធ្វើជារដ្ឋមន្ត្រីការបរទេសរបស់ប្រទេសអូទ្រីស ទាំងមានមហិច្ឆតាចង់បន្តខ្ពស់ជាងនេះទៀត។ លោកមើលភាពជោគជ័យនៃចលនា អេន ម៉ាឆេ (En Marche) របស់លោក អេម៉ានុយអែល ម៉ាក្រុង (Emmanuel Macron) នៅបារាំង ហើយជឿជាក់ថា វិធីសាស្រ្តស្រដៀងគ្នាត្រូវការធ្វើឡើងនៅអូទ្រីស។
លោក Kurz ស្រមៃមើលចលនាផ្ទាល់ខ្លួនរបស់លោកដែលនឹងបំបែកនយោបាយឯកភាពជាតិដ៏កក់ក្តៅនៃមជ្ឈមណ្ឌលដែលគ្របដណ្តប់លើរដ្ឋាភិបាលអូទ្រីស ហើយរារាំងកំណែទម្រង់ពិតប្រាកដ។ ដើម្បីធ្វើឱ្យរឿងរ៉ាវកើតឡើងមានភាពទាក់ទាញ លោក Kurz បានលាយបញ្ចូលគ្នានូវការអភិរក្សសារពើពន្ធបែបប្រពៃណី ជាមួយនឹងសញ្ញានៃសេរីនិយមសង្គម ហើយលាតត្រដាងពីភាពស្តាំជ្រុលនិយមដោយប្រកាន់យកនូវអាកប្បកិរិយារឹងរូសភាគច្រើនចំពោះអន្តោប្រវេសន៍។
ទន្ទឹមជាមួយគ្នានោះការស៊ើបអង្កេតថ្មីដោយព្រះរាជអាជ្ញា បានបង្ហាញពីរបៀបផ្ដាច់ការដែលលោក Kurz និងអ្នកជិតស្និទ្ធរបស់លោកអាចធ្វើ។ ជាឧទាហរណ៍ លោកបានរារាំងកញ្ចប់កំណែទម្រង់ថែទាំសង្គមឆ្នាំ ២០១៦ ដែលព្រមព្រៀងគ្នារវាងមេដឹកនាំគណបក្សប្រជាជន និងគណបក្សសង្គមប្រជាធិបតេយ្យអូទ្រីស។
ការស៊ើបអង្កេតដែលកំពុងត្រូវបានអនុវត្តដោយព្រះរាជអាជ្ញារដ្ឋកណ្តាលចំពោះឧក្រិដ្ឋកម្មសេដ្ឋកិច្ច និងអំពើពុករលួយ (WKStA) បានធ្វើឱ្យរង្គោះរង្គើដល់ទិដ្ឋភាពនយោបាយអូទ្រីស ប៉ុន្តែវាស្ទើរតែកើតឡើងអស់រយៈពេលជាច្រើនខែមកហើយ។
សម្រាប់លោក Kurz និងអ្នកគាំទ្ររបស់លោក គម្រោងព្រះរាជអាជ្ញា គឺធ្វើឡើងក្រោមហេតុផលនយោបាយទាំងបើកចំហ ដោយចោទប្រកាន់ថា WKStA ស្វែងរកលេសអ្វីដែលខ្លួនអាចធ្វើបានដើម្បីព្យាយាម និងទទួលបានដីកាចាប់ខ្លួនមន្រ្តីគណបក្សប្រជាជនរបស់លោក។
លោក Kurz និងសម្ព័ន្ធមិត្តរបស់លោកក៏រងការចោទប្រកាន់ផងដែរ ពីបទព្យាយាមរារាំងដំណើរស៊ើបអង្កេត។ ជាឧទាហរណ៍ ដ្រាយវ៍រឹងចំនួន ៥ ដែលផ្ទុកព័ត៌មានដែលស្នើសុំដោយការស៊ើបអង្កេតរបស់សភា ត្រូវបានមន្រ្តីអធិការបតីបំផ្លាញកាលពីឆ្នាំមុន។
យ៉ាងណាមិញ អតីតអធិការបតីវ័យក្មេងរូបនេះ បានបដិសេធការធ្វើខុសទាំងអស់នោះហើយលោកចាត់ទុកការចោទប្រកាន់ប្រឆាំងនឹងរូបលោកថា «គ្មានមូលដ្ឋាន» ហើយបង្ហាញថា លោកនឹងលះបង់អភ័យឯកសិទ្ធិសភា ដើម្បីអនុញ្ញាតឱ្យព្រះរាជអាជ្ញាបន្តពិនិត្យមើលការប្រព្រឹត្ដរបស់លោកនៅក្នុងការិយាល័យ៕
ហួន ឌីណា