កាលពីថ្ងៃអង្គារ ទី ១៩ តុលា ក្រសួងការបរទេសរុស្ស៊ីបាននិយាយថា ប្រទេសចិន ប៉ាគីស្ថាន និងរុស្ស៊ី មានឆន្ទៈផ្ដល់ជំនួយដល់ប្រទេសអាហ្វហ្គានីស្ថាន ប៉ុន្តែក្រុងម៉ូស្គូនៅមិនទាន់ត្រៀមខ្លួនទទួលស្គាល់រដ្ឋាភិបាលតាលីបង់ជាផ្លូវការទេ។
ការសន្យាផ្ដល់ជំនួយមនុស្សធម៌ និងការគាំទ្រផ្នែកសេដ្ឋកិច្ច ត្រូវបានធ្វើឡើង បន្ទាប់ពីកិច្ចពិភាក្សារវាងមន្ត្រីរុស្ស៊ី ចិន និងប៉ាគីស្ថាននៅក្រុងម៉ូស្គូ ដែលចូលរួមដោយតំណាងក្រុមតាលីបង់កាលពីថ្ងៃពុធ។
ប៉ុន្តែរដ្ឋមន្ត្រីការបរទេសរុស្ស៊ីលោក សឺហ្គី ឡាវរ៉ូវ បាននិយាយថា រុស្ស៊ីកំពុងផ្អាកការទទួលស្គាល់ក្រុមតាលីបង់ជាផ្លូវការ រហូតដល់ពេលដែលពួកគេអាចបំពេញការសន្យានៅពេលដែលពួកគេដណ្ដើមបានការគ្រប់គ្រងប្រទេសអាហ្វហ្គានីស្ថាន ដូចជាការសន្យាថា នឹងបង្កើតរដ្ឋាភិបាលដែលរួមបញ្ចូលគ្រប់ភាគី និងគ្រប់ជនជាតិ។
«ការទទួលស្គាល់ក្រុមតាលីបង់ជាផ្លូវការ គឺមិនស្ថិតក្រោមការពិភាក្សាទេ» លោក ឡាវរ៉ូវ ប្រាប់អ្នកយកព័ត៌មានបែបនេះ ហើយបានបន្តទៀតថា៖ «ដូចប្រទេសដែលមានឥទ្ធិពលដទៃទៀតនៅក្នុងតំបន់ដែរ យើងកំពុងទាក់ទងជាមួយពួកគេ យើងកំពុងជំរុញឱ្យពួកគេបំពេញនូវការសន្យាដែលពួកគេបានធ្វើនៅពេលពួកគេឡើងកាន់អំណាច»។
អ្នករិះគន់ជាច្រើនបាននិយាយថាអតីតក្រុមឧទ្ទាមនេះ គឺកំពុងក្បត់ការសន្យាជាច្រើនរបស់ពួកគេជុំវិញបញ្ហាសិទ្ធិមនុស្ស សិទ្ធិស្ត្រី សិទ្ធិជនជាតិភាគតិច និងការបង្ក្រាបទៅលើអតីតសត្រូវ៕