ប្រធានាធិបតីអាមេរិកលោក ចូ បៃដិន និងប្រធានាធិបតីរុស្ស៊ី លោក វ្ល៉ាឌីមៀរ ពូទីន គ្រោងធ្វើខលតាមរយៈវីដេអូមួយនៅថ្ងៃអង្គារ ទី ៧ ធ្នូខាងមុខនេះ ដោយមេដឹកនាំទាំង ២ នឹងពិភាក្សាអំពីស្ថានភាពដ៏តានតឹងនៅប្រទេសអ៊ុយក្រែន។
អ្នកនាំពាក្យសេតវិមានលោកស្រី ជេន សាគី បាននិយាយក្នុងសេចក្ដីថ្លែងការណ៍មួយថា៖ «លោក បៃដិន នឹងគូសបញ្ជាក់អំពីការព្រួយបារម្ភរបស់សហរដ្ឋអាមេរិកចំពោះសកម្មភាពយោធារុស្ស៊ីនៅតាមព្រំដែនជាមួយអ៊ុយក្រែន និងបញ្ជាក់ឡើងវិញនូវការគាំទ្ររបស់សហរដ្ឋអាមេរិកចំពោះអធិបតេយ្យ និងបូរណភាពទឹកដីរបស់អ៊ុយក្រែន»។ លោកស្រីនិយាយថាប្រធានបទផ្សេងទៀតនឹងរួមបញ្ចូល «ស្ថិរភាពយុទ្ធសាស្ត្រ បញ្ហាសន្តិសុខអ៊ីនធឺណិត និងតំបន់»។
អ្នកនាំពាក្យវិមានក្រឹមឡាំងលោកឌីមីទ្រី ប៉េស្កូវ បាននិយាយកាលពីថ្ងៃសៅរ៍ថា ប្រធានាធិបតីទាំង២ក៏នឹងនិយាយអំពីទំនាក់ទំនងទ្វេភាគី និងការអនុវត្តកិច្ចព្រមព្រៀង ដែលពួកគេបានព្រមព្រៀងនៅឯកិច្ចប្រជុំកំពូលនៅទីក្រុងហ្សឺណែវក្នុងខែមិថុនា។
រូបភាពផ្កាយរណបបានបង្ហាញថាទាហានរុស្ស៊ីយ៉ាងហោចណាស់ ៩០ ០០០នាក់ បានប្រមូលផ្ដុំនៅតាមបណ្ដោយព្រំដែនប្រទេសអ៊ុយក្រែន។ សហរដ្ឋអាមេរិក អង្គការណាតូ និងប្រទេសអ៊ុយក្រែន បានចោទប្រកាន់ការប្រមូលផ្ដុំនេះថាជាការត្រៀមធ្វើការឈ្លានពានចូលប្រទេសអ៊ុយក្រែន។
ប្រទេសរុស្ស៊ី បានច្រានចោលការចោទប្រកាន់នេះ ហើយបានចោទប្រកាន់អ៊ុយក្រែន ណាតូ និងអាមេរិកថាកំពុងធ្វើការប្រមូលផ្ដុំកម្លាំងនៅក្នុងតំបន់នេះ ដែលរួមមានការបំពាក់អាវុធទំនើបៗរបស់លោកខាងលិចឱ្យប្រទេសអ៊ុយក្រែន។
ទំនាក់ទំនងអាមេរិក-រុស្ស៊ី បានធ្លាក់ចុះយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ ជាពិសេសបន្ទាប់ការកាត់យកឧបទ្វីបគ្រីមា ដោយរុស្ស៊ីកាលពីឆ្នាំ ២០១៤ ការអន្តរាគមន៍ក្នុងសង្គ្រាមស៊ីវិលស៊ីរីកាលពីឆ្នាំ ២០១៥ និងការចោទប្រកាន់ថាបានជ្រៀតជ្រែកក្នុងការបោះឆ្នោតប្រធានាធិបតីអាមេរិកឆ្នាំ ២០១៦៕