កងទ័ព​រុស្ស៊ី​ដកចេញ​ពី​កា​ហ្សា​ក់​ស្ថាន ​ស្រប​ពេល​ស្ថានភាព​គ្រាអាសន្ន​ត្រូវបាន​បញ្ចប់​

Content image - Phnom Penh Post
លោក Kassym-Jomart Tokayev (កណ្តាល) ប្រ​ជុំ​ជាមួយក្រុមប្រឆាំង​ភេរវកម្ម។ AFP

​ក្រុម​យោធា​ដឹកនាំ​ដោយ​រុស្ស៊ី បាន​ដក​ចេញពី​ប្រទេស​កា​ហ្សា​ក់​ស្ថាន ខណៈ​ប្រទេស​នេះ បាន​ដក​ស្ថានភាព​គ្រាអាសន្ន​កាលពី​ថ្ងៃ​ពុធ ក្រោយពី​ភាពចលាចល​មិន​ធ្លាប់មាន​នៅក្នុង​ប្រទេស​អា​ស៊ី​កណ្តាល​មួយ​នេះ​។

​ក្រសួងការពារជាតិ​រុស្ស៊ីបាននិយាយថា យន្តហោះ​យោធា​ ៤ ​គ្រឿង ​ដែល​ដឹក​ទាហាន​សល់​ចុងក្រោយ បាន​ចាក​ចេញពី​ទីក្រុង ​Nur Sultan និង​ទីក្រុង​ធំ​បំផុត​របស់​កា​ហ្សា​ក់​ស្ថាន​គឺ ទីក្រុង​អាល់​ម៉ា​ទី​។​

​ក្រសួង​នេះបាន​និយាយថា​៖ «​កង​រក្សា​សន្តិសុខ​ចុងក្រោយ​និង​ទីបញ្ជាការនៃ​ក្រុម​រក្សា​សន្តិសុខ​រុស្ស៊ី​ដឹកនាំ ដោយ​លោក​ឧ​ត្ត​ម​សេនីយ៍​ Andrei Serdyukov នឹង​វិលត្រឡប់​ទៅ​ប្រទេស​វិញ ​ដោយ​យន្តហោះ​ទាំង​​នេះ​។ នេះ​បើ​យោងទៅតាម​ការ​ឱ្យដឹងពី​បណ្តា​ទីភ្នាក់ងារ​ព័ត៌មាន​រុស្ស៊ី​។​

​រូបថត​ជាច្រើន​ដែល​ត្រូវបាន​ចេញផ្សាយ​ដោយ​ក្រសួងការពារជាតិបានបង្ហាញ​ឱ្យឃើញ​យន្ត​ហោះ​យោធា​ជាច្រើន​គ្រឿង​ ដែល​ចុះចត​នៅ​ព្រលានយន្តហោះ ​១ ​នៅ​ទីក្រុង ​Ulyanovsk​ នៃ​ប្រទេស​រុស្ស៊ី​ភាគខាងត្បូង ជាទី​ដែល​ពិធី​មួយត្រូវ​រៀបចំ​ ដើម្បី​ទទួល​ទាហាន​ដែល​វិលត្រឡប់​មកវិញ​។

​កា​ហ្សា​ក់​ស្ថាន​អតីត​សូ​វៀត ត្រូវបាន​ញាំញី​ដោយ​ការប៉ះទង្គិច ដែល​បាន​កើតឡើង​បន្ទាប់ពី​ការតវ៉ា​ដោយ​សន្តិវិធី​ជុំវិញ​ការដំឡើងថ្លៃ​ប្រេង​ក្នុង​ឆ្នាំ​ថ្មី​នេះ ហើយ​ការប៉ះទង្គិច​នោះ បាន​បណ្តាលឱ្យ​មនុស្ស​យ៉ាងតិច​ ២២៥​ នាក់ ស្លាប់​ក្នុងនោះ​អ្នកស្លាប់​មាន​ទាហាន​ ១៩ ​នាក់​។

​ទាហាន​មកពី​ប្លុក​នេះ​ ដែល​រួមមានប្រទេស​អតីត​សូ​វៀត គឺ​ប្រទេស​អា​មេ​នី បេឡា​រុស តា​ហ្ស៊ី​គី​ស្ថាន កៀ​ហ្សុី​ស៊ី​ស្ថាន កា​ហ្សា​ក់​ស្ថាន និង​រុស្ស៊ី បានចាប់ផ្តើម​មកដល់​កាលពី​ថ្ងៃទី​ ៦ មករា បន្ទាប់ពី​មាន​សំណើ​ពី​លោក​ប្រធានាធិបតី​ Kassym Jomart Tokayev​។ ការដក​ត្រឡប់​ទៅវិញ បានចាប់ផ្តើម​កាលពី​ថ្ងៃ​ព្រហស្បតិ៍​។

​លោក Serdyukov បានបញ្ជាក់​ពី​ការបញ្ចប់​បេសកកម្ម នៅក្រោម​ការ​​គាំទ្រ​ពី​អង្គការ​សន្ធិសញ្ញា​សន្តិសុខ​រួម ​(CSTO) ជា​ប្លុក​យោធា មាន​សមា​ជិ​ក ​៦ ប្រទេស​ដែល​ដឹកនាំ​ដោយ​ទីក្រុង​ម៉ូស្គូ​។

​លោក Serdyukov បាន​និយាយថា កិច្ចប្រតិបត្តិការ​រក្សា​សន្តិភាព​...​នៅលើ​ទឹកដី​នៃ​សាធារណ​រដ្ឋកា​​ហ្សា​ក់​ស្ថាន ត្រូវបាន​បញ្ចប់​។

​ការដក​កងទ័ព​ចេញ​នោះ បានកើត​ឡើង​នៅ​ថ្ងៃ​តែមួយ​ដែល​ប្រទេស​កា​ហ្សា​ក់​ស្ថាន ​សម្បូរ​ដោយ​ប្រេង បានបញ្ចប់​ស្ថានភាព​គ្រាអាសន្ន​នៅ​ទូទាំងប្រទេស​ត្រូវបាន​ដាក់​ក្រោយ ពី​អំពើហិង្សា បាន​ផ្ទុះឡើង​ដែល​អាជ្ញាធរ​បាន​ស្តីបន្ទោស​ទៅលើ​ក្រុម​​ចោរព្រៃ និង​ក្រុម​ភេរ​វករ​។

​ដោយបាន​បញ្ជាក់​ពី​ការ​ចប់​ស្ថាន​ភាព​គ្រាអាសន្ន​នៅ​ពាក់កណ្តាល​អ្រ​ធា​ត្រ​អ្នកនាំពាក្យ​របស់លោក Tokayev គឺ​លោក BerikUali បាន​និយាយថា សាមគ្គីភាព និង​ភាព​សុចរិត​របស់​ប្រជាជន ទីភ្នាក់ងារ​អនុវត្ត​ច្បាប់​និង​យោធា បាន​ធានា​ដល់​ការស្តារ​សណ្តាប់ធ្នាប់ និង​សន្តិភាព​នៅ​ប្រទេស​កា​ហ្សា​ក់​ស្ថាន​។

​លោក Uali បាន​សរសេរ​នៅលើ​ហ្វេ​ស​ប៊ុ​កថា​៖ «​អាចមាន​សន្តិភាព​និង​ភាពល្អប្រសើរ​នៅក្នុង​ប្រទេស​យើង​ជា​រៀងរហូត​»​។

​ទោះបីជា​យ៉ាងណាក៏ដោយ ស្ថាន​ការណ៍នៅតែ​តានតឹង​នៅក្នុង​ទីក្រុង​អាល់​ម៉ា​ទី ជាទី​ដែល​ក្រុម​អ្នកឆ្លើយ​​ឆ្លង​សារព័ត៌មាន AFP បាន​សង្កេតមើល​ប៉ូលិស​រាំងខ្ទប់​មិនឱ្យ​ចូលទៅ​ផ្លូវ​ជាច្រើន​នៅ​កណ្តាល​ទីក្រុង ក្រោយពី​ក្រុមប្រឆាំង​បាន​អំពាវនាវ​ឱ្យមាន​ការតវ៉ា​។

​អំពើហិង្សា​ដែល​បាន​កើតឡើង​នៅក្នុង​ប្រទេស​កា​ហ្សា​ក់​ស្ថាន នៅតែ​ស្ថិតនៅក្នុង​ភាពអាថ៌កំបាំង ដោយមាន​ភ័ស្តុតាង​នៃ​ការតស៊ូ​អំណាច ដែល​ធ្វើ​​ឱ្យ​រដ្ឋាភិបាល​ពិបាក​ក្នុង​ពន្យល់​ទាក់ទង​នឹង​ការទាក់ទិន​របស់​ក្រុម​ភេរ​វករ​ជាមួយ​បណ្តាញ​អន្តរជាតិ​។

​កាលពី​ថ្ងៃ​អង្គារ អតីត​ប្រធានាធិបតី​ លោក Nursultan Nazarbayev មាន​វ័យ ​៨១ ឆ្នាំ បានបង្ហាញ​ខ្លួនដោយ​ថ្លែង​ជា​លើកដំបូង​ចាប់តាំងពី​វិបត្តិ​នេះ​បានចាប់ផ្តើម ដើម្បី​បដិសេធថា លោក​មិនមាន​ជម្លោះ​ជាមួយ​បុរស​ដែល​គាត់​បានជ្រើសរើស​ឱ្យ​ជំនួស​គាត់​ជា​ប្រមុខរដ្ឋ​នៅក្នុង​ឆ្នាំ ​២០១៩ ​នោះទេ​។

​លោក Nazarbayev បាន​និយាយ​នៅក្នុង​សុន្ទរកថា​៖ «​លោក​ប្រ​ធានា​ធិបតី Kassym-Jomart Tokayev មានអំណាច​ពេញដៃ ដោយបាន​បន្ថែមថា មិនមាន​ជម្លោះ ឬការ​ប្រឈម​មុខ​ដាក់គ្នា​រវាង​ក្រុម​វរជន​ទេ​។

​ដោយបាន​ហៅ​អំពើហិង្សា​នោះ​ថា ​ជា​មេរៀន​សម្រាប់​យើងទាំងអស់គ្នា លោក Nazarbayev បាន​បន្ថែម​វា​ពិតជា​សំខាន់​ណាស់​ក្នុង​ការរក​ឱ្យឃើញថា តើន​រណា​រៀបចំ​ផែនការ​និង​អំពើ​ឃាតកម្ម​ទាំងនេះ​?»៕

ព័ត៌មានថ្មីៗ