នាយករដ្ឋមន្ត្រីអង់គ្លេស លោក បូរីស ចនសុន។ រូបថត AFP
.jpg)
ក្រុងឡុងដ៍: នាយករដ្ឋមន្ត្រីអង់គ្លេស លោក បូរីស ចនសុន (Boris Johnson) និយាយកាលពីថ្ងៃពុធថា លោកនឹងលុបចោលការរឹតបន្តឹងដែលទាក់ទងនឹងកូវីដស្ទើរតែទាំងអស់ក្នុងប្រទេសក្នុងក្ដីសង្ឃឹមដែលថា នឹងរារាំងការបាត់បង់សំឡេងគាំទ្រក្នុងជីវិតនយោបាយរបស់លោក បន្ទាប់ពីមានការចោទប្រកាន់ថា លោកកុហកអំពីការធ្វើពិធីជប់លៀងក្នុងអំឡុងពេលបិទខ្ទប់។
កាសែតញូវយ៉កថែមស៍ចុះផ្សាយថា វាហាក់ដូចជាកិច្ចខិតខំប្រឹងប្រែងមួយមិនត្រឹមតែដើម្បីផ្លាស់ប្តូរប្រធានបទប៉ុណ្ណោះទេ ប៉ុន្តែថែមទាំងដើម្បីឈ្នះលើសមាជិកសភាអភិរក្សនិយមជិត ១០០ នាក់ ដែលប្រឆាំងនឹងលោក ពេលលោកចេញវិធានការរឹតត្បិតកាលពីខែមុន។
ខណៈដែលនាយករដ្ឋមន្ត្រីរូបនេះប្រឈមមុខនឹងការអំពាវនាវឱ្យចុះចេញពីតំណែង ហើយបន្ទាប់ពីមានព័ត៌មានថា សមាជិកសភាអភិរក្សនិយម ១ រូប ចុះចូលគណបក្សការងារដែលជាគណបក្សប្រឆាំងនោះ សេចក្តីប្រកាសថ្មីនេះមិនជាធ្វើអ្វីច្រើនឱ្យគណបក្សអភិរក្សនិយមលោករំសាយកំហឹងនោះដែរ។
ការលាតត្រដាងអំពីការប្រមូលផ្តុំសង្គមអំឡុងពេលបិទខ្ទប់ខុសច្បាប់បានលេបត្របាក់រដ្ឋាភិបាលរបស់លោក ចនសុន និងជំរុញឱ្យសមាជិកសភាដែលមានភាពច្របូកច្របល់ធ្វើការបោះឆ្នោតដកទំនុកចិត្តដែលអាចផ្តួលរំលំឱ្យមេដឹកនាំរូបនេះ ចេញពីតំណែងបាន។
ចំពោះការបន្ធូរបន្ថយការរឹតបន្តឹងកូវីដ ១ សប្តាហ៍មុនផុតកំណត់ លោក បូរីស ចនសុន និយាយថា លោកកំពុងព្យាយាមស្តារ «សេរីភាពពីដើម» របស់អង់គ្លេសដែលជាការយោងទៅលើប្រពៃណីចាក់ឫសយ៉ាងជ្រៅនៃសេរីភាពបុគ្គលរបស់ប្រទេសនេះ។ លោកបានបង្ហាញថា វា [ការបន្ធូរបន្ថយ] ជាភ័ស្តុតាងដែលថាចក្រភពអង់គ្លេសអស់ការព្រួយបារម្ភពីរលកនៃវ៉ារ្យ៉ង់អូមីក្រុងដោយករណីឆ្លងថ្មី និងអត្រាចូលមន្ទីរពេទ្យចាប់ផ្តើមធ្លាក់ចុះ ទោះបីជាវានៅតែស្ថិតក្នុងកម្រិតខ្ពស់ក៏ដោយក្ដី។
លោក ចនសុន និយាយថា រដ្ឋាភិបាលនៅថ្ងៃខាងមុខនឹងទម្លាក់ចោលការណែនាំរបស់ខ្លួនលើការពាក់ម៉ាស់ពេលធ្វើដំណើរក្នុងទីសាធារណៈ និងក្នុងថ្នាក់រៀន លើកទឹកចិត្តកម្មករឱ្យត្រឡប់ទៅការិយាល័យរបស់ពួកគេ និងបញ្ចប់ការទាមទារឱ្យមនុស្សបង្ហាញបណ្ណវ៉ាក់សាំង ឬភ័ស្តុតាងជាសះស្បើយពីវីរុសពេលចូលរួមព្រឹត្តិការណ៍សាធារណៈធំៗជាដើម។
នាយករដ្ឋមន្ត្រីដដែលបន្ថែមថា «ទិន្នន័យកំពុងបង្ហាញម្តងហើយម្តងទៀតថា រដ្ឋាភិបាលមានការសម្រេចចិត្តដ៏តឹងតែងបំផុត» ដោយសម្គាល់ថា បណ្តាប្រទេសនៅអឺរ៉ុបផ្សេងទៀតបានដាក់កម្រិតការបិទខ្ទប់ឡើងវិញ ដោយសារតែរលកនៃការឆ្លងវ៉ារ្យ៉ង់ថ្មី។
ការរឹតបន្តឹងត្រូវបានដាក់ចេញកាលពីខែធ្នូ ដើម្បីពន្យឺតការរីករាលដាលយ៉ាងឆាប់រហ័សនៃវ៉ារ្យ៉ង់អូមីក្រុង និងចំណេញពេលវេលាសម្រាប់ប្រជាជនក្នុងការចាក់វ៉ាក់សាំងដូសជំរុញរបស់ពួកគេ។
សេចក្ដីប្រកាសថ្មី ត្រូវបានស្វាគមន៍ដោយធុរកិច្ច ជាពិសេសអ្នកដែលពឹងផ្អែកលើកម្មករ ដែលរស់ឡើងវិញនៅកណ្តាលទីក្រុង ក៏ដូចជាបដិសណ្ឋារកិច្ច និងទេសចរណ៍ជាដើម។
យ៉ាងណាមិញ រឿងមួយដែលជាការព្រួយបារម្ភដែរនោះត្រង់ថា ប៉ុន្មាននាទីមុនពេលនាយករដ្ឋមន្ត្រីបង្ហាញខ្លួនក្នុងសភាកាលពីថ្ងៃពុធ សមាជិកសភានៃគណបក្សអភិរក្សនិយមរបស់លោកចនសុន លោក Christian Wakeford ប្រកាសថា លោកនឹងចូលរួមជាមួយគណបក្សការងារ ដោយបង្ហាញពីការរិះគន់យ៉ាងចាស់ដៃលើលោក ចនសុន។
លោក Wakeford សម្តែងការខឹងសម្បាចំពោះរបៀបដែលលោកនាយករដ្ឋមន្ត្រីបានដោះស្រាយការផ្ទុះកំហឹងពីភាគីនានា ហើយបញ្ជាក់ថា លោកបានដាក់លិខិតអំពាវនាវឱ្យមានការបោះឆ្នោតដកសេចក្ដីទុកចិត្ត។
ក្នុងលិខិតមួយផ្ញើជូនលោក ចនសុន លោក Wakeford បាននិយាយថា៖ «ទាំងអ្នក និងគណបក្សអភិរក្សទាំងមូលបង្ហាញខ្លួនឯងថា គ្មានសមត្ថភាពក្នុងការផ្តល់នូវភាពជាអ្នកដឹកនាំ និងរដ្ឋាភិបាលដែលប្រទេសនេះសមនឹងទទួលបាន»។
លោក ចនសុន បានបង្ហាញការប្រយុទ្ធកាន់តែខ្លាំងនៅក្នុងសភាកាលពីថ្ងៃពុធ ហើយបានទទូចម្តងទៀតថា លោកនឹងមិនលាលែងពីតំណែងនោះទេ។ លោក ចនសុន តស៊ូដោយអះអាងថាលោកមិនបានបំភាន់សភា ដោយសារលោកគិតថា វាជាកម្មវិធីការងារមួយ គឺនៅពេលដែលលោកចូលរួមជាមួយសមាជិកបុគ្គលិករាប់សិបនាក់ផឹកស្រានៅវិមានរដ្ឋបាល Downing Streetនៅខែឧសភា ឆ្នាំ ២០២០ ក្នុងអំឡុងពេលមានការរឹតបន្តឹងយ៉ាងតឹងរ៉ឹង។
ខណៈការស្ទង់មតិបង្ហាញថា មានមនុស្សតិចតួចប៉ុណ្ណោះដែលជឿថា លោក ចនសុន និយាយការពិតអំពីជប់លៀងហើយសមាជិកសភាខ្លាចមានប្រតិកម្មពីការបោះឆ្នោត សម្ពាធនៃការបោះឆ្នោតដកសេចក្ដីទុកចិត្តកំពុងកើនឡើង។ ដោយសារដំណើរការនេះមានលក្ខណៈសម្ងាត់ ទើបគេមិនដឹងថា មានសមាជិកសភាប៉ុន្មាននាក់ផ្ញើលិខិតអំពាវនាវឱ្យមានការបោះឆ្នោតបែបនេះ។
រហូតមកដល់ពេលនេះមានសមាជិកសភាចំនួន ៧ រូបប៉ុណ្ណោះ ដែលអះអាងជាសាធារណៈថា ពួកគេអំពាវនាវឱ្យមានការបោះឆ្នោតដកសេចក្ដីទំនុកចិត្ត ហើយម្នាក់ក្នុងចំណោមនោះ គឺលោកWakeford។ ប៉ុន្តែកាលពីថ្ងៃពុធសារព័ត៌មាន BBC រាយការណ៍ថា ក្រុមសមាជិកសភាប្រហែល ១០ នាក់ ដែលឈ្នះអាសនៈក្នុងជ័យជម្នះភ្លូកទឹកភ្លូកដីរបស់លោក Johnson នៅឆ្នាំ ២០១៩ ក៏ចូលរួមជាមួយអ្នកទាំងនោះដែរ៕
ហួន ឌីណា
