ក្រុមចម្រុះយោធាដឹកនាំដោយអារ៉ាប៊ី សាអ៊ូឌីត ដែលប្រយុទ្ធជាមួយក្រុមឧទ្ទាមហ៊ូធី បានបន្តការវាយប្រហារផ្លូវអាកាសទៅរដ្ឋធានីសាណា បន្ទាប់ពីការវាយ្រដូននិងមីស៊ីលទៅលើដៃគូ អេមីរ៉ាតអារ៉ាប់រួម (UAE) កាលពីដើមសប្តាហ៍នេះ។
ការវាយប្រហាររបស់ក្រុមហ៊ូធី បានយករោងចក្រប្រេងនៅក្នុងទីក្រុងអាប៊ុយដាប៊ី ជាគោលដៅដោយបានបណ្តាលឱ្យមនុស្ស ៣ នាក់ស្លាប់ និងបានវាយប្រហារដាច់ដោយឡែកមួយទៀតទៅលើព្រលានយន្តហោះអន្តរជាតិរដ្ឋធានី UAE។
UAE បានប្តេជ្ញាឆ្លើយតបយ៉ាងតឹងតែង ហើយកាលពីថ្ងៃអង្គារ ប្រព័ន្ធផ្សព្វផ្សាយតំបន់ និងអ្នករស់នៅទីក្រុងសាណាបាននិយាយថា មនុស្សយ៉ាងតិច ២០ នាក់ ក្នុងនោះមានក្មេងដែរ បានស្លាប់នៅក្នុងការវាយប្រហារពេលយប់របស់ក្រុមចម្រុះ ដែលនេះគឺជាការវាយប្រហារខ្លាំងក្លាបំផុតនៅក្នុងរយៈពេលជាច្រើនឆ្នាំ។
ទីភ្នាក់ងារសារព័ត៌មាន Saba របស់ ក្រុមហ៊ូធី បានរាយការណ៍ថា ប្រមុខបណ្ឌិតសភាអាកាសចរណ៍របស់ក្រុមនេះ គឺលោក Qassim al-Junaid ត្រូវបានគេសម្លាប់រួមជាមួយប្រពន្ធរបស់លោក កូនប្រុសអាយុ ២៥ ឆ្នាំម្នាក់ សមាជិកក្រុមគ្រួសារ និងប្រជាជនដទៃមិនត្រូវបានគេស្គាល់អត្តសញ្ញាណឡើយ។
នៅល្ងាចថ្ងៃអង្គារ ក្រុមចម្រុះបានធ្វើការវាយប្រហារពីអាកាសបន្ថែមទៀតទៅលើទីក្រុងសាណា ដោយបាននិយាយថា ខ្លួនបានយកឃ្លាំងធំៗរបស់ក្រុមហ៊ូធីជាគោលដៅ និងបានបំផ្លាញប្រព័ន្ធទូរគមនាគមន៍មួយសម្រាប់ដ្រូន។
ការវាយប្រហារនោះ បានកើតឡើងខណៈស្ថានបេសកកម្មរបស់ UAE នៅអង្គការសហប្រជាជាតិបានស្នើសុំឱ្យមានជំនួបរបស់ក្រុមប្រឹក្សាសន្តិសុខ ដើម្បីពិភាក្សាអំពីការវាយប្រហារភេរវកម្មនេះ។
ឯកអគ្គរដ្ឋទូត UAE ប្រចាំនៅ UNl លោក Lana Nusseibeh បាននិយាយនៅលើធ្វីធើរថា៖ «UAE អំពាវនាវដល់ក្រុមប្រឹក្សាសន្តិសុខ UN និយាយជាមួយសំឡេង និងចូលរួមថ្កោលទោសយ៉ាងម៊ឺងម៉ាត់ និងច្បាស់លាស់ចំពោះការវាយប្រហារភេរវកម្មដែលត្រូវធ្វើឡើង ជាការផ្គើននឹងច្បាប់អន្តរជាតិ។
លោក Nusseibeh បាននិយាយថា ការវាយប្រហារគួរឱ្យភ័យខ្លាច និងខុសច្បាប់កាលពីថ្ងៃចន្ទ គឺជាជំហានមួយទៀតក្នុងកិច្ចខិតខំប្រឹងប្រែងរបស់ក្រុមហ៊ូធី ដើម្បីធ្វើភេរវកម្មរាលដាលកាន់តែធំឡើង និងចលាចលនៅក្នុងតំបន់របស់យើង»។
ក្រុមអ្នកការទូតបានប្រាប់ទីភ្នាក់ងារព័ត៌មាន Reuters ថា ក្រុមប្រឹក្សាសន្តិសុខ ទំនងជានឹងជួបប្រជុំបិទទ្វារនៅពេលក្រោយក្នុងសប្តាហ៍នេះ។
នៅក្នុងការបង្ហោះនៅលើធ្វីធើរ ប្រធានមហាសន្និបាត UN លោកបានសម្តែងសាមគ្គីភាពជាមួយ [UAE] ក្នុងការប្រឈមជាមួយនឹងសកម្មភាពភេរវកម្មបែបនេះ ដែលប្រឆាំងនឹងបទដ្ឋានជឿនលឿន។
ក្រសួងការបរទេសអាមេរិកបាននិយាយកាលពីថ្ងៃពុធថា ប្រេសិតពិសេសអាមេរិកប្រចាំនៅយេម៉ែន នឹងទៅទស្សនកិច្ចបណ្តារដ្ឋធានីនៅឈូងសមុទ្រក្នុងសប្តាហ៍នេះ ដើម្បីពង្រឹងដំណើរការសន្តិភាពឡើងវិញ។
ក្រសួងនេះ បាននិយាយក្នុងសេចក្តីថ្លែងការណ៍មួយថា លោកប្រេសិតពិសេស Tim Lenderking នឹងជំរុញឱ្យភាគីទាំងអស់បន្ថយកំហឹងផ្នែកយោធា និងយកឆ្នាំនេះ ដើម្បីចូលរួមឱ្យបានពេញលេញក្នុងដំណើរការសន្តិភាពដឹកនាំដោយ UN។ លោក Lenderking ក៏នឹងផ្តោតលើតម្រូវការបន្ទាន់ ដើម្បីដោះស្រាយវិបត្តិមនុស្សធម៌ និងសេដ្ឋកិច្ចដែលប្រជាជនយេម៉ែនកំពុងប្រឈមនាពេលបច្ចុប្បន្ន។
ស្របពេលជាមួយគ្នានោះដែរ ក្រុមចម្រុះដឹកនាំដោយអារ៉ាប៊ី សាអ៊ូឌីត បានទទួលរងការរិះគន់យ៉ាងធ្ងន់ៗពីលោកអគ្គលេខាធិការ UN អង់តូនីញ៉ូ ហ្គុយតឺរេស ជុំវិញការសងសឹកបណ្តាលឱ្យមនុស្សស្លាប់នេះ។
អ្នកនាំពាក្យរបស់គាត់ គឺលោក Stephane Dujarric បាននិយាយកាលពីថ្ងៃអង្គារថា លោកអគ្គលេខាធិការ UN «បានសម្តែងកង្វល់និងសេចក្តីសោកស្តាយថា ការវាយប្រហារផ្លូវអាកាសរបស់ក្រុមចម្រុះដែលបានបណ្តាលឱ្យស្លាប់ជនស៊ីវិលយ៉ាងច្រើន»។ «លោកបានធ្វើការ អំពាវនាវជាថ្មីដល់គ្រប់ភាគីពាក់ព័ន្ធទាំងអស់ឱ្យអត់ធ្មត់ជាអតិបរមា និងទប់ស្កាត់មិនឱ្យជម្លោះកើនឡើងតទៅទៀតឡើយ»៕