កងកម្លាំងប្រឆាំងនឹងការគ្រប់គ្រងរបស់រដ្ឋអំណាចយោធាមីយ៉ាន់ម៉ាកាលពីថ្ងៃពុធកន្លងទៅ បាន វាយប្រហារការិយាល័យរដ្ឋបាលស្រុកមួយនៅរដ្ឋកាយ៉ា (Kayah) ដែលស្ថិតនៅភាគខាងកើតនៃប្រទេស។ នេះបើតាមការចុះផ្សាយរបស់សារព័ត៌មានក្នុងស្រុក។
អ្នកនាំពាក្យរណសិរ្សប្រជាធិបតេយ្យជនជាតិការ៉ែន បានប្រាប់សារព័ត៌មាន AFP ថា ក្រុមកងកម្លាំងការពារប្រជាជន (PDF) ដែលរួមមានកងកម្លាំងប្រដាប់អាវុធរបស់រដ្ឋាភិបាលស្រមោល NUG ក៏ដូចជាកម្លាំងប្រដាប់អាវុធតស៊ូនិងជនជាតិភាគតិចផ្សេងៗទៀតបានវាយប្រហារសាលាស្រុកហើយសម្លាប់កងទ័ពរបស់យោធាមីយ៉ាន់ម៉ាដែលគេស្គាល់ថាជា Tatmadaw អស់ចំនួន ១៥ នាក់ ក្នុងការប្រយុទ្ធគ្នារយៈពេល ១ ម៉ោង។
ប្រភពខាងលើបានឱ្យដឹងថា ក្រុមសកម្មប្រយុទ្ធបានប្រើប្រាស់គ្រាប់បែកដៃ និងគ្រាប់រ៉ុក្កែត ហើយអះអាងថាខាងក្រុមតស៊ូមិនមានចំនួនអ្នកស្លាប់នោះទេ។ «យើងជ្រើសរើសសង្គ្រាមទីក្រុងដោយសារតែយើងមិនមានអាវុធធ្ងន់ៗនិងកាំភ្លើងគ្រប់គ្រាន់សម្រាប់ការប្រយុទ្ធប្រឆាំងនឹងយោធាមីយ៉ាន់ម៉ា»។នេះបើតាមការបន្ថែមរបស់អ្នកនាំពាក្យខាងលើ។
សារព័ត៌មានក្នុងស្រុកបានធ្វើការចុះផ្សាយពីព្រឹត្តិការណ៍ប៉ះទង្គិចគ្នានេះតែអ្នកនាំពាក្យរបស់រដ្ឋា ភិបាលយោធាមីយ៉ាន់ម៉ាលោក Zaw Min Tun នៅមិនអាចបញ្ជាក់ពីព័ត៌មានលម្អិតនៃព្រឹត្តិការណ៍នេះបានទេ។យ៉ាងណាក៏ដោយ លោកក៏បានទទួលស្គាល់ដែរថាកងកម្លាំង PDF បានវាយប្រហារគោល ដៅមួយចំនួននៅរដ្ឋកាយ៉ានៅប៉ុន្មានថ្ងៃចុងក្រោយនេះ។
នៅរដ្ឋកាយ៉ាកងកម្លាំងទាំងសងខាងបានវាយប្រហារគ្នារាងញឹកញាប់បន្តិច ចាប់តាំងពីរដ្ឋប្រហារឆ្នាំមុនហើយក្រុមការងារអង្គការសហប្រជាជាតិ បានធ្វើការប៉ាន់ស្មានថា មនុស្សជាង៩ម៉ឺនបានផ្លាស់ចេញពីលំនៅដោយបង្ខំ៕
ហ៊ីម រដ្ឋា
វីដេអូ៖