កាលពីថ្ងៃអង្គារ ទី ១៨ មករា ប៉ុស្តិ៍ទូរទស្សន៍រដ្ឋឥណ្ឌា Doordarshan បានចាក់ផ្សាយកិច្ចសម្ភាសន៍ជាមួយនាយករដ្ឋមន្ត្រី ស្លូវើនៀ លោក ចាណេស ចាណ្សា ដែលក្នុងនោះលោកបានរិះគន់ការដាក់សម្ពាធពីប្រទេសចិន ហើយបានបង្ហាញថា រដ្ឋាភិបាលរបស់លោកមានផែនការធ្វើតាមប្រទេសលីទុយអានី ក្នុងការពង្រឹងទំនាក់ទំនងជាមួយកោះតៃវ៉ាន់។
«យើងគាំទ្រការសម្រេចចិត្តអធិបតេយ្យរបស់ប្រជាជនតៃវ៉ាន់។ ប្រសិនបើពួកគេចង់ចូលរួមជាមួយប្រទេសចិន ប្រសិនបើវាជាឆន្ទៈសេរីរបស់ពួកគេ ដោយគ្មានសម្ពាធ ដោយគ្មានអន្តរាគមន៍យោធា ដោយគ្មានការជំរិត ដោយគ្មានការបោកប្រាស់ជាយុទ្ធសាស្ត្រ ដូចដែលកំពុងកើតឡើងនៅហុងកុងនាពេលបច្ចុប្បន្ន នោះយើងនឹងគាំទ្រវា»។ លោកចាណ្សាបាននិយាយបែបនេះ ហើយបន្តទៀតថា៖ «ប៉ុន្តែប្រសិនបើប្រជាជនតៃវ៉ាន់ចង់រស់នៅដោយឯករាជ្យ យើងនៅទីនេះ ដើម្បីគាំទ្រជំហរនេះផងដែរ»។
លោកចាណ្សាបង្ហាញថា រដ្ឋាភិបាលរបស់លោក និងកោះតៃវ៉ាន់គឺកំពុងរៀបចំផែនការបញ្ជូនមន្ត្រីការទូតទៅរដ្ឋធានីរៀងៗខ្លួន ប៉ុន្តែមិនដល់កម្រិតស្មើនឹងស្ថានទូតទេ។
លោកចាវ លីជៀន អ្នកនាំពាក្យក្រសួងការបរទេសចិន បាននិយាយក្នុងសន្និសីទសារព័ត៌មានមួយថាក្រុងប៉េកាំងគឺ «មានការភ្ញាក់ផ្អើល និងប្រឆាំងដាច់ខាត» ចំពោះការលើកឡើងរបស់លោកចាណ្សា។ លោកនិយាយថា ការលើកឡើងរបស់លោកចាណ្សាគឺជា «សេចក្ដីថ្លែងការណ៍ដ៏គ្រោះថ្នាក់មួយក្នុងការគាំទ្រ ឯករាជភាពរបស់តៃវ៉ាន់»។
ប្រទេសចិន បានចាត់ទុកកោះតៃវ៉ាន់ជាដែនដីរបស់ខ្លួន ហើយនៅថ្ងៃណាមួយនឹងត្រូវរួបរួមគ្នាវិញ។ ចិនដីគោកដាច់ខាតប្រឆាំងការកសាងទំនាក់ទំនងការទូតជាមួយតៃវ៉ាន់ ហើយកោះនេះមិនមានទំនាក់ទំនងការទូតផ្លូវការជាមួយសមាជិកសហភាពអឺរ៉ុបណាមួយ ឬសូម្បីតែសម្ព័ន្ធមិត្តជិតស្និទ្ធ អាមេរិក៕