ប្រធានាធិបតីសហរដ្ឋអាមេរិកលោក ចូ បៃដិន។ រូបថត AFP
.jpg)
កាលពីថ្ងៃពុធ ប្រធានាធិបតីសហរដ្ឋអាមេរិកលោក ចូ បៃដិន បានព្យាករថា ប្រទេសរុស្ស៊ី នឹងធ្វើសកម្មភាព ហើយនិយាយថា ក្រុងម៉ូស្គូ នឹងប្រឈមមុខនឹងផលប៉ះពាល់យ៉ាងធ្ងន់ធ្ងរប្រសិនបើមានការឈ្លានពេញលេញ ប៉ុន្តែអាចប្រឈមផលប៉ះពាល់តិចជាងនេះប្រសិនបើវាជា «ការលុកលុយតិចតួច»។
ការលើកឡើងរបស់លោក បៃដិន ក្នុងសន្និសីទសារព័ត៌មាននៅសេតវិមាន បានបង្កើតមានភាពមិនច្បាស់លាស់អំពីរបៀបដែលលោកខាងលិចគ្រោងឆ្លើយតបប្រសិនបើរុស្ស៊ីសម្រេចចិត្តឈ្លានពានប្រទេសអ៊ុយក្រែន ហើយក្រោយមកធ្វើឱ្យមន្ត្រីសេតវិមានព្យាយាមបំភ្លឺលើការលើកឡើងនេះ។
ក្នុងសន្និសីទខាងលើលោក បៃដិន បាននិយាយថា លោកគិតថារុស្សីនឹងធ្វើសកម្មភាពលើអ៊ុយក្រែន ប៉ុន្តែការឆ្លើយតបគឺ «អាស្រ័យ» ទៅនឹងអ្វីដែលរុស្សីធ្វើ ហើយប្រសិនបើវាជា «ការលុកលុយតិចតួច» គេនឹងមានជាប់គាំងដោយសារការពិភាក្សាមតិក្នុងចំណោមសម្ព័ន្ធភាពណាតូអំពី «អ្វីដែលត្រូវធ្វើ និងមិនត្រូវធ្វើ»។
ភ្លាមៗបន្ទាប់ពីការបញ្ចប់សន្និសីទរបស់លោក បៃដិន អ្នកនាំពាក្យសេតវិមានលោកស្រីជេន ផ្សាគីបានសង្កត់ធ្ងន់ថារាល់សកម្មភាពយោធារុស្ស៊ី ឆ្លងចូលដែនដីអ៊ុយក្រែន គឺប្រឈមមុខនឹងការឆ្លើយតបយ៉ាងលឿន និងយ៉ាងធ្ងន់ធ្ងរ។
រុស្ស៊ី បានប្រមូលផ្ដុំទាហានជិត ១០០ ០០០ នាក់ នៅតំបន់ជិតព្រំដែនជាមួយប្រទេសអ៊ុយក្រែន ធ្វើឱ្យលោកខាងលិចចោទប្រកាន់ថារុស្ស៊ី គឺកំពុងត្រៀមឈ្លានពានប្រទេសអ៊ុយក្រែន ប៉ុន្តែរុស្ស៊ី បានច្រានចោលការចោទប្រកាន់នេះ។
ការចរចារវាងអនុរដ្ឋមន្ត្រីការបរទេសអាមេរិក និងរុស្ស៊ី ដើម្បីកាត់បន្ថយភាពតានតឹងកាលពីសប្ដាហ៍មុនបានជាប់គាំង ហើយនៅសប្ដាហ៍នេះរដ្ឋមន្ត្រីការបរទេសប្រទេសទាំង ២ បានគ្រោងជួបប្រជុំនៅសប្ដាហ៍នេះ។ លោក បៃដិន និយាយថា កិច្ចប្រជុំរវាងលោកនឹងលោក វ្ល៉ាឌីមៀរ ពូទីន អាចកើតឡើងដើម្បីដោះស្រាយបញ្ហានេះ៕
