ទីភ្នាក់ងារព័ត៌មានមជ្ឈិមកូរ៉េ (KCNA) រាយការណ៍កាលពីថ្ងៃព្រហស្បតិ៍ថា កូរ៉េខាងជើងនឹងពង្រឹងការការពាររបស់ខ្លួនប្រឆាំងនឹងសហរដ្ឋអាមេរិក ហើយពិចារណាចាប់ផ្តើមឡើងវិញនូវ«សកម្មភាពដែលត្រូវបានផ្អាកជាបណ្តោះអាសន្ន»ដែលរួមមានការសាកល្បងអាវុធនុយក្លេអ៊ែរ និងមីស៊ីលរយៈចម្ងាយឆ្ងាយរបស់ខ្លួន។
ទីភ្នាក់ងារព័ត៌មាន KCNA និយាយថា មេដឹកនាំកូរ៉េខាងជើងលោក គីម ជុងអ៊ុន (Kim Jong Un)កោះប្រជុំការិយាល័យនយោបាយដ៏មានឥទ្ធិពលនៃគណបក្សកម្មករដែលកំពុងកាន់អំណាចកាលពីថ្ងៃពុធ ដើម្បីពិភាក្សាអំពី «បញ្ហាគោលនយោបាយសំខាន់ៗ» រួមទាំងវិធានការប្រឆាំងនឹងគោលនយោបាយបង្កអរិភាពរបស់សហរដ្ឋអាមេរិក។
ទីភ្នាក់ KCNA បន្តថា ការិយាល័យនយោបាយបានបញ្ជាឱ្យពិចារណាឡើងវិញនូវវិធានការកសាងទំនុកចិត្ត និង «ពិនិត្យមើលភ្លាមៗអំពីបញ្ហានៃការចាប់ផ្តើមឡើងវិញនូវរាល់សកម្មភាពដែលត្រូវបានផ្អាកជាបណ្តោះអាសន្ន» ខណៈពេលដែលអំពាវនាវឱ្យពង្រឹងមធ្យោបាយរូបវន្តដ៏មានឥទ្ធិពលជាបន្ទាន់។
ការរាយការណ៍ដដែលរៀបរាប់ថា ភាពអរិភាព និងការគំរាមកំហែងរបស់ទីក្រុងវ៉ាស៊ីនតោនបានឈានដល់បន្ទាត់គ្រោះថ្នាក់ ដោយលើកឡើងពីសមយុទ្ធយោធារួមគ្នារវាងសហរដ្ឋអាមេរិក និងកូរ៉េខាងត្បូង ការដាក់ពង្រាយអាវុធយុទ្ធសាស្ត្រដ៏ទំនើបរបស់សហរដ្ឋអាមេរិកនៅក្នុងតំបន់ និងការអនុវត្តទណ្ឌកម្មអង្គការសហប្រជាជាតិជាដើម។
ការព្រមានរបស់កូរ៉េខាងជើងកើតឡើងប៉ុន្មានម៉ោងមុនពេលក្រុមប្រឹក្សាសន្តិសុខអង្គការសហប្រជាជាតិប្រជុំបិទទ្វារនៅថ្ងៃព្រហស្បត្តិ៍ដើម្បីពិភាក្សាអំពីការសាកល្បងមីស៊ីលនាពេលថ្មីៗនេះ តាមសំណើរបស់សហរដ្ឋអាមេរិក និងប្រទេសមួយចំនួនទៀត។
លោកប្រធានាធិបតី Joe Biden មិនបាននិយាយអ្វីអំពីប្រទេសកូរ៉េខាងជើងទេ ក្នុងអំឡុងសន្និសីទសារព័ត៌មានជិត ២ ម៉ោងកាលពីថ្ងៃពុធ ដែលធ្វើឡើងដើម្បីប្រារព្ធខួប ១ ឆ្នាំដំបូងរបស់លោកក្នុងការកាន់តំណែង។ ប៉ុន្តែក្រសួងការពារជាតិកូរ៉េខាងត្បូងនិយាយថា ខ្លួនកំពុងតាមដានសមយុទ្ធរដូវរងារបស់កូរ៉េខាងជើង ខណៈពេលដែលរក្សាជំហរត្រៀមខ្លួន ដោយហៅការសាកល្បងមីស៊ីលនាពេលថ្មីៗនេះថា ជា «ការគំរាមកំហែងធ្ងន់ធ្ងរ»។
ភាពតានតឹងកំពុងកើនឡើងជុំវិញការធ្វើតេស្តមីស៊ីលជាបន្តបន្ទាប់របស់កូរ៉េខាងជើង។ ការជំរុញរបស់សហរដ្ឋអាមេរិកសម្រាប់ការដាក់ទណ្ឌកម្មថ្មី រងនូវប្រតិកម្មដ៏ក្តៅគគុកពីទីក្រុងព្យុងយ៉ាង៕
ហួន ឌីណា
វីដេអូ៖