ក្រសួងការពារជាតិរុស្ស៊ីនិយាយថា រុស្ស៊ីវាយលុកទីតាំងនានា នៅភាគខាងកើតអ៊ុយក្រែន កាលពីថ្ងៃអាទិត្យ ខណៈព្យាយាមឡោមព័ទ្ធកងកម្លាំងអ៊ុយក្រែន ក្នុងការប្រយុទ្ធដណ្តើមយកតំបន់ដុនបាស និងទប់ទល់នឹងការវាយលុកពីទ័ពអ៊ុយក្រែន នៅក្រុង Izium ដែលខ្លួនគ្រប់គ្រង។
រុស្ស៊ីនិយាយថា ខ្លួនបានធ្វើការវាយប្រហារដោយមីស៊ីល សំដៅទៅលើមជ្ឈមណ្ឌលបញ្ជាការ និងឃ្លាំងអាវុធ ខណៈព្យាយាមឡោមព័ទ្ធអង្គភាពអ៊ុយក្រែន រវាងក្រុង Izium និងក្រុងដុនណេតស្ក៍ (Donets)។
ក្នុងថ្ងៃជាមួយគ្នាបញ្ជាការទ័ពអាកាសអ៊ុយក្រែននិយាយថា កងទ័ពខ្លួនបានវាយលុកការវាយប្រហារចំនួន ១៧លើក កាលពីថ្ងៃអាទិត្យ និងបំផ្លាញសម្ភារៈយោធារុស្ស៊ីចំនួន ១១ គ្រឿង រួមមានឧទ្ធម្ភាគចក្រ ២គ្រឿងមីស៊ីលគ្រូស ២គ្រឿង និងដ្រូនចំនួន ២គ្រឿង។ អង្គភាពដដែលបន្ថែមថា រុស្ស៊ីបានបន្តកំណត់គោលដៅលើតំបន់ជនស៊ីវិល នៅតាមបណ្តោយខ្សែព្រំដែនជួរមុខទាំងមូល នៅក្នុងតំបន់លូហានស្ក៍ និងដុនណេតស្ក៍ដោយបានបាញ់ទៅលើភូមិ និងទីប្រជុំជនចំនួន ២៣។
ក្រុង Izium ដែលមានទន្លេ Donets ហូរកាត់ ស្ថិតនៅចម្ងាយប្រមាណ ១២០គីឡូម៉ែត្រភាគអាគ្នេយ៍ពីទីក្រុងខាកៀវ។ ប្រសិនបើអ៊ុយក្រែនអាចរក្សាសម្ពាធលើក្រុង Izium និងបណ្តាញផ្គត់ផ្គង់របស់រុស្ស៊ី នោះនឹងធ្វើឱ្យទីក្រុងម៉ូស្គូកាន់តែពិបាក ក្នុងការឡោមព័ទ្ធកងទ័ពអ៊ុយក្រែន ដែលរឹងមាំនៅលើសមរភូមិភាគខាងកើតដុនបាស។
អភិបាលក្នុងតំបន់របស់អ៊ុយក្រែន លោក Oleh Sinegubov និយាយថា៖ «ចំណុចក្តៅបំផុតនៅតែជាទិសដៅលើទីក្រុង Izium។ កងកម្លាំងប្រដាប់អាវុធរបស់យើងបានប្តូរទៅការវាយលុកនៅទីនោះ។ សត្រូវកំពុងដកថយនៅផ្នែកខាងមុខខ្លះ»។
កងកម្លាំងប្រដាប់អាវុធអ៊ុយក្រែននិយាយថា នៅក្នុងតំបន់មួយចំនួន អង្គភាពរុស្ស៊ី ឥឡូវនេះ កំពុងប្រតិបត្តិការ ក្នុងកម្រិតកម្លាំងតិចជាង ២០ភាគរយ។ លោក Vadym Denysenko ទីប្រឹក្សាក្រសួងមហាផ្ទៃអ៊ុយក្រែន ប្រាប់ទូរទស្សន៍អ៊ុយក្រែនថា កងកម្លាំងអាចផ្លាស់ទី នៅតាមព្រំដែន ក្នុងរយៈពេលប៉ុន្មានថ្ងៃខាងមុខ ដើម្បីដាក់សម្ពាធលើកងទ័ពរុស្ស៊ី នៅភាគឦសាន នៃទីក្រុងខាកៀវ។
លោក Serhiy Gaidai អភិបាលនៃតំបន់លូហានស៍ និយាយថា ការជម្លៀសជនស៊ីវិល កំពុងតែដំណើរការ ខណៈការប្រយុទ្ធ នៅតែបន្តនៅជុំវិញក្រុង Sievierodonetsk ហើយរុស្ស៊ីហាក់ ដូចជាកំពុងបង្វែរកងកម្លាំងរបស់ខ្លួនទៅកាន់តំបន់នោះ។ លោកនិយាយប្រាប់សារព័ត៌មានមួយថា៖ «គោលបំណង គឺកាត់ផ្ដាច់ផ្លូវ [ហាយវ៉េ] សំខាន់ Bakhmut-Lysychansk និងឡោមព័ទ្ធតំបន់ទាំងមូល»។
បូករួមនឹងការបាត់បង់កងកម្លាំង និងសម្ភារៈយោធាជាច្រើនរុស្ស៊ី ទទួលរងនូវទណ្ឌកម្មសេដ្ឋកិច្ចយ៉ាងខ្លាំង ខណៈបស្ចិមលោកផ្តល់ជំនួយយោធាដល់អ៊ុយក្រែន។ ស្ថានទូតអាមេរិកប្រចាំក្រុងកៀវ និយាយថាអ៊ុយក្រែន បានដាក់ពង្រាយយន្តហោះចម្បាំង M-777 ថ្មីរបស់សហរដ្ឋអាមេរិកជាច្រើន នៅសមរភូមិជួរមុខ។
ចាប់តាំងពីពាក់កណ្តាលខែមេសាមក កងកម្លាំងរុស្ស៊ីផ្តោតលើការវាយប្រហារ នៅតំបន់ដុនបាស បន្ទាប់ពីបរាជ័យក្នុងការដណ្ដើមយកក្រុងកៀវ។ ការវាយតម្លៃដោយចារកម្មយោធាអង់គ្លេស និយាយថា រុស្ស៊ីបានបាត់បង់ប្រហែល ១/៣ នៃកម្លាំងប្រយុទ្ធជើងគោក ដែលដាក់ពង្រាយ ក្នុងខែកុម្ភៈរបស់ខ្លួន។ ការវាយតម្លៃនិយាយថា ការវាយលុកនៅដុនបាសបានធ្លាក់ចុះ ហើយទំនងជាមិនទៅមុខទេនៅរយៈពេល ៣០ ថ្ងៃទៀតនេះ។
អគ្គលេខាធិការអង្គការណាតូ លោក Jens Stoltenberg និយាយថា៖ «សង្រ្គាមរុស្ស៊ីនៅអ៊ុយក្រែន នឹងមិនកើតឡើង ដូចដែលទីក្រុងម៉ូស្គូបានគ្រោងទុកនោះទេ»៕
ហួន ឌីណា