.jpg)
គណបក្ស Hezbollah របស់ពួកអ៊ិស្លាមនិយម Shia ដែលគាំទ្រដោយអ៊ីរ៉ង់ និងបក្សសម្ព័ន្ធមិត្តផ្សេងទៀត បានបាត់បង់សំឡេងភាគច្រើននៅក្នុងសភាលីបង់ បន្ទាប់ពីលទ្ធផលបោះឆ្នោតទូទៅរបស់ប្រទេសត្រូវបានប្រកាស។
យោងតាមលទ្ធផលបោះឆ្នោត ដែលចេញផ្សាយដោយក្រសួងមហាផ្ទៃ កាលពីថ្ងៃអង្គារ សម្ព័ន្ធមិត្តរបស់គណបក្ស Hezbollah បានបាត់បង់អាសនៈនៅទូទាំងប្រទេស។ ប្លុកគាំទ្រ Hezbollah ទទួលបានអាសនៈប្រហែល ៦១ ដែលតិចជាង ៦៥ អាសនៈ ដែលត្រូវការ ដើម្បីទទួលបានសំឡេងភាគច្រើននៃចំនួនអាសនៈសរុប ១២៨ ហើយធ្លាក់ចុះពី ៧១ អាសនៈ នៅក្នុងការបោះឆ្នោតសភា កាលពីលើកមុន។
គណបក្សចលនាស្នេហាជាតិសេរី ដែលជាសម្ព័ន្ធមិត្តរបស់ Hezbollah លែងជាប្លុកសភាគ្រិស្តសាសនាដ៏ធំបំផុតរបស់ប្រទេសនេះទៀតហើយ ដោយទទួលបានត្រឹមតែ ១៨ អាសនៈប៉ុណ្ណេះ ក្នុងការបោះឆ្នោត កាលពីថ្ងៃអាទិត្យ ខណៈគូរប្រជែង គឺបក្សកងកម្លាំងលីបង់ ដែលគាំទ្រដោយសហរដ្ឋអាមេរិក និងអារ៉ាប៊ី សាអ៊ូឌីត ទទួលបាន ២០ អាសនៈ។
សម្ព័ន្ធមិត្ត Hezbollah សំខាន់ៗផ្សេងទៀត ដូចជានៅក្រុង Aley និងក្រុងទ្រីប៉ូលី ក៏បាត់បង់កៅអីរបស់ខ្លួនទៅឱ្យបេក្ខជនកំណែទម្រង់និយមផងដែរ។ ជាសរុប បេក្ខជនកំណែទម្រង់និយម ដែលជាអ្នកនយោបាយឯករាជ្យឈរឈ្មោះដើម្បីបំបែកសំឡេងពួកឥស្សរជនកាន់អំណាចចំនួន ១៦ រូប បានចូលសភា ដែលកើនឡើង ១៥ អាសនៈ បើធៀបនឹងការបោះឆ្នោតឆ្នាំ ២០១៨។
លីបង់ ជាប្រទេសដែលមានប្រជាជនជិត ៧ លាននាក់ ជាជម្រកនៃសហគមន៍សាសនាចំនួន ១៨ ផ្សេងគ្នា។ ដោយសារតែនេះ រដ្ឋាភិបាលពឹងផ្អែកលើរចនាសម្ព័ន្ធចែកអំណាច ដែលនាយករដ្ឋមន្ត្រីប្រធានាធិបតី និងប្រធានសភា ត្រូវតែមកពីក្រុមអ្នកកាន់សាសនាធំៗ ៣ របស់ប្រទេស រួមមានអ៊ិស្លាមនិកាយស៊ុននីម៉ារ៉ុននីតគ្រិស្ទាន និងអ៊ិស្លាមនិកាយស៊ីអ៊ីត។
សភាថ្មីរបស់ប្រទេសនេះ នឹងត្រូវតែងតាំងនាយករដ្ឋមន្ត្រី និងបង្កើតរដ្ឋាភិបាលថ្មី ដើម្បីបន្តការចរចារបស់មូលនិធិរូបិយវត្ថុអន្តរជាតិ (IMF) និងអនុម័តកំណែទម្រង់សេដ្ឋកិច្ច និងរចនាសម្ព័ន្ធ ដើម្បីជួយសេដ្ឋកិច្ចលីបង់ឱ្យងើបឡើងវិញ បន្ទាប់ពីភាពចលាចលជាច្រើនឆ្នាំ។
យោងតាមតួលេខរបស់ក្រសួងមហាផ្ទៃ អត្រានៃអ្នកទៅបោះឆ្នោតមានកម្រិតទាប ៤១ ភាគរយ បើធៀបនឹងឆ្នាំ ២០១៨ ដែលមានជិតដល់ទៅ ៥០ ភាគរយ។ ទីក្រុងទ្រីប៉ូលី ដែលជាទីក្រុងក្រីក្របំផុតមួយរបស់ប្រទេសលីបង់ មានអ្នកទៅបោះឆ្នោតប្រហែលជា ៣០ ភាគរយ។ ការឡើងថ្លៃប្រេងឥន្ធនៈ និងការអស់សង្ឃឹម ចំពោះប្រព័ន្ធនយោបាយអាចជាការធ្វើឱ្យកម្រិតនៃសន្លឹកឆ្នោតទាបនេះ៕
ហួន ឌីណា
