លោក វ្ល៉ាឌីមៀរ ពូទីន ប្រធានាធិបតីរុស្ស៊ីអះអាងពីការប្រយុទ្ធនៅប្រទេសអ៊ុយក្រែន នឹងត្រូវធ្វើឡើងដោយគ្មានកំណត់ពេលវេលាដែលត្រូវបញ្ចប់ ខណៈពីដំបូងឡើយ រុស្ស៊ីគ្រោងបើកប្រតិបត្តិការត្រឹមតែយ៉ាងយូរ ៧២ ម៉ោងប៉ុណ្ណោះ ប៉ុន្តែសង្គ្រាមនេះបានអូសបន្លាយ ៤ ខែទៅហើយ។
យោងតាមទីភ្នាក់ងារព័ត៌មានរុស្ស៊ី TASS ដែលចេញផ្សាយនៅថ្ងៃទី ៣០ ខែមិថុនា លោក ពូទីន បានអះអាងថា គោលដៅនៃប្រតិបត្តិការយោធាពិសេសគឺរំដោះ តំបន់ Donbass ដើម្បីការពារប្រជាជនដែលរស់នៅទីនោះ និង «បង្កើតលក្ខខណ្ឌដែលនឹងធានាសន្តិសុខរបស់រុស្ស៊ីខ្លួនឯង»។
លោក ជូកូ វីដូដូ (Joko Widodo) ប្រធានាធិបតីឥណ្ឌូនេស៊ីដែលបច្ចុប្បន្ន គឺជាប្រធាននៃវេទិកាអន្តររដ្ឋាភិបាលនៃក្រុមប្រទេសចំនួន ២០ (G20) កំពុងធ្វើទស្សនកិច្ចនៅប្រទេសអ៊ុយក្រែននិងរុស្ស៊ី ក្នុងគោលបំណងស្វែងរកសន្តិភាពសម្រាប់អ៊ុយក្រែន និងរុស្ស៊ី ដោយបង្កើតឱ្យបាននូវបទឈប់បាញ់។ នេះបើយោងតាមសារព័ត៌មានរ៉យទ័រ។
យោងតាមទីភ្នាក់ងារព័ត៌មានរុស្ស៊ី TASS ក្រោយបញ្ចប់ដំណើរទស្សនកិច្ចរបស់លោកទៅកាន់ទីក្រុង Ashgabat លោកប្រធានាធិបតី ពូទីន បាននិយាយថា ប្រតិបត្តិការយោធាពិសេសរបស់រុស្ស៊ីនៅអ៊ុយក្រែនកំពុងដំណើរការទៅតាមផែនការ ហើយមិនចាំបាច់បំពេញតាមកាលកំណត់ណាមួយដើម្បីបញ្ចប់វានោះទេ។
លោក ពូទីន បានសង្កត់ធ្ងន់ថា៖ «ការងារកំពុងដំណើរការក្នុងរបៀបស្ងប់ស្ងាត់ និងជាប្រចាំ។ កងទ័ពកំពុងឈានទៅមុខ និងឈានដល់ចំណុចបញ្ចប់ទាំងនោះ ដែលត្រូវបានចាត់តាំងជាកិច្ចការនៅដំណាក់កាលជាក់លាក់មួយនៃការងារប្រយុទ្ធនេះ។ អ្វីៗដំណើរការទៅតាមផែនការ»។
នៅពេលត្រូវបានសួរអំពីថ្ងៃផុតកំណត់ដែលអាចធ្វើទៅបានសម្រាប់ការបញ្ចប់ប្រតិបត្តិការ លោកប្រធានាធិបតីរុស្ស៊ីបានឆ្លើយថា៖ «មិនចាំបាច់និយាយអំពីពេលវេលាកំណត់ណាមួយទេ។ ខ្ញុំមិនដែលនិយាយអំពីវាទេ ព្រោះនេះគឺជាជីវិត ហើយទាំងនេះគឺជារឿងពិត។ វាមិនត្រឹមត្រូវទេក្នុងការដាក់ពេលកំណត់ណាមួយនោះ»។
«វា (កាលកំណត់) ត្រូវបានផ្សារភ្ជាប់ទៅនឹងកម្លាំងនៃប្រតិបត្តិការប្រយុទ្ធដែលត្រូវបានភ្ជាប់ដោយផ្ទាល់ទៅនឹងចំនួនអ្នករបួស និងស្លាប់ដែលអាចកើតមានហើយយើងត្រូវតែគិតលើសពីអ្វីៗទាំងអស់ ដើម្បីការពារអាយុជីវិតមនុស្សរបស់យើង»។ លោក ពូទីន បញ្ជាក់បន្ថែម៕
វីដេអូ៖