លោក សាវកាត មឺហ្ស៊ីយ៉ូយ៉េវ (Shavkat Mirziyoyev) ប្រធានាធិបតីនៃប្រទេសអ៊ូសបេគីស្ថានដែលស្ថិតនៅតំបន់អាស៊ីកណ្តាល និងដែលជាប្រទេសក្នុងអតីតសហភាពសូវៀត បានលុបចោលផែនការធ្វើវិសោធនកម្មលើរដ្ឋធម្មនុញ្ញ ដែលកំណត់វាសនារបស់តំបន់ស្វយ័តការ៉ាកាល់ប៉ាកស្ថាន (Karakalpakstan) បន្ទាប់ពីមានការតវ៉ា និងប្រកាសដាក់តំបន់នោះស្ថិតក្នុងគ្រាអាសន្នរយៈពេល ១ ខែ ចាប់ពីយប់ថ្ងៃទី ២ ខែកក្កដា ដល់ថ្ងៃទី ២ ខែសីហា។
ការដាក់តំបន់នោះ ក្នុងគ្រាអាសន្ន ត្រូវបានណែនាំដោយប្រធានាធិបតី លោកមឺហ្ស៊ីយ៉ូយ៉េវ នៅក្រុង Karakalpakstan ដែលជាតំបន់ស្វយ័តនៅក្នុងប្រទេសអ៊ូសបេគីស្ថាន បន្ទាប់ពីមានការតវ៉ាប្រឆាំងនឹងការធ្វើវិសោធនកម្មរដ្ឋធម្មនុញ្ញ ដែលនឹងមិនកំណត់ តំបន់ Karakalpakstan ជាតំបន់អធិបតេយ្យ និងស្វយ័តតទៅទៀតនោះទេ។
នៅក្រោមរដ្ឋធម្មនុញ្ញរបស់ប្រទេសអ៊ូសបេគីស្ថាន បច្ចុប្បន្នតំបន់ Karakalpakstan ត្រូវបានចាត់ទុកថា ជាសាធារណរដ្ឋអធិបតេយ្យមួយ នៅក្នុងប្រទេសអ៊ូសបេគីស្ថាន និងមានសិទ្ធិបំបែកខ្លួន ដោយធ្វើប្រជាមតិ។ នេះបើយោងតាមការផ្សាយរបស់ Al Jazeera។
ការិយាល័យប្រធានាធិបតី បាននិយាយនៅក្នុងសេចក្តីថ្លែងការណ៍មួយថា លោក ប្រធានាធិបតី បានសម្រេចប្រតិកម្មយ៉ាងរហ័ស ដើម្បីឆ្លើយតប ចំពោះការតវ៉ា ក្នុងអំឡុងពេលដំណើរទស្សនកិច្ចទៅកាន់តំបន់ Karakalpakstan ថា ការធ្វើវិសោធនកម្មលើស្ថានភាពតំបន់នោះ ត្រូវតែបានដកចេញពីកំណែទម្រង់ ដែលបានស្នើឡើង។
យោងតាមទីភ្នាក់ងារព័ត៌មានរុស្ស៊ី TASS ប្រភព ១ នៅក្នុងទីក្រុង Nukus នៃតំបន់ស្វយ័ត Karakalpakstan បាននិយាយថា៖ «ចរាចរណ៍ម៉ូតូសាធារណៈ និងឯកជន បានបញ្ចប់ទាំងស្រុង ហើយនៅក្នុងទីក្រុង Nukus [រដ្ឋធានី Karakalpakstan] ជិតពាក់កណ្តាលអធ្រាត្រ កន្លែងកម្សាន្ត ដែលដំណើរពេញ ១យប់ និងកន្លែងលក់ ២៤ ម៉ោង ត្រូវបានបិទ»។
ក្រុមមន្ត្រីក្នុងតំបន់ Karakalpakstan និងរដ្ឋាភិបាល បាននិយាយថា ប៉ូលីសបានបំបែកក្រុមបាតុករ បន្ទាប់ពីអ្នកខ្លះ បានព្យាយាមវាយលុកអគាររដ្ឋាភិបាល ក្នុងតំបន់នៃរដ្ឋធានី Nukus បន្ទាប់ពីការហែក្បួន និងការប្រមូលផ្តុំ នៅផ្សារកណ្តាលរបស់ទីក្រុង។
រដ្ឋាភិបាលតំបន់ Karakalpakstan បាននិយាយនៅក្នុងសេចក្តីថ្លែងការណ៍មួយ កាលពីព្រឹកថ្ងៃសៅរ៍ថា ប៉ូលីសបានឃុំខ្លួនមេដឹកនាំនៃការតវ៉ា កាលពីថ្ងៃសុក្រ និងបាតុករជាច្រើននាក់ផ្សេងទៀត ដែលបានតវ៉ា។
យោងតាមការផ្សាយរបស់ Al Jazeera ការផ្លាស់ប្តូរទាក់ទងនឹង Karakalpakstan គឺជាផ្នែកនៃកំណែទម្រង់រដ្ឋធម្មនុញ្ញដ៏ទូលំទូលាយ ដែលស្នើឡើងដោយប្រធានាធិបតី លោកមឺហ្ស៊ីយ៉ូយ៉េវ ដែលរួមបញ្ចូលផងដែរនូវការពង្រឹងសិទ្ធិស៊ីវិល និងការបន្តអាណត្តិប្រធានាធិបតី ពី ៥ ឆ្នាំ ដល់ ៧ ឆ្នាំ។
ប្រសិនបើការកែប្រែរដ្ឋធម្មនុញ្ញ ត្រូវបានអនុម័ត នៅក្នុងប្រជាមតិ ដែលបានគ្រោងទុក វានឹងកំណត់ឡើងវិញនូវចំនួនអាណត្តិរបស់លោកមឺហ្ស៊ីយ៉ូយ៉េវ និងអនុញ្ញាតឱ្យគាត់ឈរឈ្មោះ សម្រាប់អាណត្តិទី ២ ទៀត៕