អាជ្ញាធរអ៊ុយក្រែន បានអះអាងពីកិច្ចសហប្រតិបត្តិការពេញលេញពីប្រទេសតួកគី បន្ទាប់ពីអាជ្ញាធរប្រទេសនេះ បានឃាត់ទុកកប៉ាល់ដឹកគ្រាប់ធញ្ញជាតិប្រមាណ ៤ ៥០០តោន នៅកំពង់ផែ Karasu នៃប្រទេសតួកគី កាលពីថ្ងៃអាទិត្យ។
អាជ្ញាធរអ៊ុយក្រែន បានចោទប្រកាន់រុស្ស៊ីថា បានលួចគ្រាប់ធញ្ញជាតិរបស់ខ្លួន ដោយដឹកចេញពីតំបន់កំពង់ផែ Berdyansk នៃប្រទេសអ៊ុយក្រែន ដែលរុស្ស៊ីវាយដណ្តើមកាន់កាប់ និងកំពុងគ្រប់គ្រង។
យោងតាមទីភ្នាក់ងារព័ត៌មានរ៉យទ័រ ឯកអគ្គរដ្ឋទូតអ៊ុយក្រែន ប្រចាំនៅតួកគី បានថ្លៃង កាលពីថ្ងៃអាទិត្យទី ៣ ខែកក្កដាថា អាជ្ញាធរគយតួកគី បានឃាត់កប៉ាល់ដឹកទំនិញរុស្ស៊ី ដែលមានផ្ទុកគ្រាប់ធញ្ញជាតិនិងដែលអ៊ុយក្រែន បានចោទថា រុស្ស៊ីបានលួច ដឹកតាមកប៉ាល់ Zhibek Zholy ដែលមានដោតទង់ជាតិរុស្ស៊ី។
អ្នកយកព័ត៌មានរបស់ទីភ្នាក់ងាររ៉យទ័រ បានឃើញកប៉ាល់ Zhibek Zholy បោះយុថ្កាចតស្ងៀម នៅចម្ងាយប្រហែល ១ គីឡូម៉ែត្រពីច្រាំងសមុទ្រ និងនៅខាងក្រៅកំពង់ផែ Karasu របស់ប្រទេសតួកគី កាលពីថ្ងៃអាទិត្យ ដោយមិនមានសញ្ញាច្បាស់លាស់នៃការរំកិលតួកប៉ាល់ ឬដោយនាវាផ្សេងទៀតនៅក្បែរនោះទេ។
លោក Vasyl Bodnar ឯកអគ្គរដ្ឋទូតអ៊ុយក្រែន បាននិយាយនៅលើកញ្ចក់ទូរទស្សន៍ជាតិអ៊ុយក្រែន ដែលដកស្រង់ដោយរ៉យទ័រថា៖ «យើងមានកិច្ចសហប្រតិបត្តិការពេញលេញ។ កប៉ាល់កំពុងចតនៅច្រកចូលកំពង់ផែ បន្ទាប់ពីវាត្រូវបានឃាត់ដោយអាជ្ញាធរគយនៃប្រទេសតួកគី»។
លោក Bodnar បាននិយាយថា អនាគតវាសនារបស់កប៉ាល់នោះ នឹងត្រូវបានសម្រេចដោយកិច្ចប្រជុំរបស់អ្នកស៊ើបអង្កេត នៅថ្ងៃចន្ទ ហើយថា អ៊ុយក្រែនកំពុងសង្ឃឹម សម្រាប់ការរឹបអូសគ្រាប់ធញ្ញជាតិមកវិញ។
អ៊ុយក្រែន បានចោទប្រកាន់រុស្ស៊ីថា បានលួចគ្រាប់ធញ្ញជាតិពីទឹកដី ដែលកងកម្លាំងរុស្ស៊ី បានកាន់កាប់ ចាប់តាំងពីការឈ្លានពានរបស់ក្រុងម៉ូស្គូ បានចាប់ផ្តើម កាលពីចុងខែកុម្ភៈ ប៉ុន្តែវិមានក្រឹមឡាំងធ្លាប់បានបដិសេធថា រុស្ស៊ីមិនបានលួចគ្រាប់ធញ្ញជាតិអ៊ុយក្រែនទេ។
មន្ត្រីក្រសួងការបរទេសអ៊ុយក្រែន ដោយដកស្រង់ព័ត៌មានពីរដ្ឋបាលដែនសមុទ្រអ៊ុយក្រែន បានប្រាប់ រ៉យទ័រ នៅថ្ងៃសុក្រថា កប៉ាល់ Zhibek Zholy បានផ្ទុកទម្ងន់ធ្ងន់ចំនួន ៧ ១៤៦ តោន (dwt) បានផ្ទុកគ្រាប់ធញ្ញជាតិដំបូងរបស់អ៊ុយក្រែនប្រហែល ៤ ៥០០ តោន ពី Berdyansk ដែលជាកំពង់ផែកាន់កាប់ដោយរុស្ស៊ី នៅភាគខាងត្បូងអ៊ុយក្រែន។
របាយការណ៍វីដេអូអំពីការចាកចេញរបស់កប៉ាល់ ក៏ត្រូវបានចែករំលែក នៅលើបណ្តាញ សង្គម Telegram ដែលគាំទ្រវិមានក្រឹមឡាំងជាច្រើន ដែលបង្ហាញកប៉ាល់នេះ រួមជាមួយនាវាកងទ័ពជើងទឹករុស្ស៊ី នៅក្នុងកំពង់ផែ ១ ដែលត្រូវបានគេកំណត់ថា ជា Berdyansk ដោយអ្នកយកព័ត៌មាន។
យោងការផ្សាយរបស់ BBC ម្ចាស់ចុះបញ្ជីកប៉ាល់ Zhibek Zholy ដែលជាក្រុមហ៊ុនមានមូលដ្ឋាននៅប្រទេសកាហ្សាក់ស្ថាន គឺក្រុមហ៊ុនមានឈ្មោះថា KTZ Express ហើយអះអាងថា កប៉ាល់នេះ ត្រូវបានជួលដោយក្រុមហ៊ុនរុស្ស៊ី។ ក្រុមហ៊ុនបានបន្ថែមថា ខ្លួនកំពុងពិគ្រោះជាមួយភាគីពាក់ព័ន្ធ ហើយនឹងគោរពតាមការដាក់ទណ្ឌកម្ម និងការរឹតបន្តឹងទាំងអស់៕