លោក ត្រាំ និយាយទៅកាន់អ្នកសារព័ត៌មាន នៅឯ Mar-a-Lago ក្នុងរដ្ឋហ្វ្លរីដា កាលពីថ្ងៃទី ៣១ ខែ ធ្នូ ឆ្នាំ ២០១៩។
.jpg)
អតីតប្រធានាធិបតីអាមេរិក លោក ដូណាល់ ត្រាំ និយាយកាលពីថ្ងៃចន្ទថា ការិយាល័យស៊ើបអង្កេតសហព័ន្ធ (FBI) បានចូលឆែកឆេរផ្ទះរបស់លោកនៅឆ្នេរ Palm Beach ក្នុងរដ្ឋហ្វ្លរីដា ដោយបង្ហាញភាពតានតឹងនៃការស៊ើបអង្កេតឧក្រិដ្ឋកម្ម ដែលធ្វើឡើងដោយក្រសួងយុត្តិធម៌លើកិច្ចការ កាលពីលោកនៅកាន់តំណែង។
លោក ត្រាំ និយាយក្នុងសេចក្ដីថ្លែងការណ៍នៅល្ងាចថ្ងៃចន្ទថា៖ «ផ្ទះ Mar-A-Lago ដ៏ស្រស់ស្អាតរបស់ខ្ញុំនៅ Palm Beach រដ្ឋហ្វ្លរីដា កំពុងស្ថិតនៅក្រោមការឡោមព័ទ្ធ វាយឆ្មក់ និងកាន់កាប់ ដោយភ្នាក់ងារFBI មួយក្រុមធំ»។
អំឡុងពេលនៃការឆែកឆេរនោះ លោក ត្រាំ មិនបាននៅផ្ទះនោះទេ ហើយពេលដែលលោកចេញសេចក្តីថ្លែងការណ៍ ការឆែកឆេររបស់ FBI ក៏បញ្ចប់ហើយដែរ។
កាសែតញូវយ៉កថែមស៍ ស្រង់សម្ដីពីប្រភពមិនបញ្ចេញឈ្មោះផ្សេងៗគ្នា ដែលបានដឹងពីសំណុំរឿងនៃការស៊ើបអង្កេតនោះថា កងកម្លាំង FBI បានផ្តោតលើសម្ភារឯកសារសម្ងាត់ ដែលលោក ត្រាំនាំយកទៅជាមួយ ដោយខុសច្បាប់ ទៅកាន់រីស៉ត Mar-a-Lago ដែលជាក្លិបឯកជន និងជាលំនៅឋានរបស់លោក ពេលលោកចេញពីសេតវិមាន។
សកម្មភាពឆែកឆេរនៅ Mar-a-Lago ជាប់ទាក់ទងនឹងការដកប្រអប់កំណត់ត្រាប្រធានាធិបតីចំនួន ១៥ សេតវិមាន រួមទាំងឯកសារសម្ងាត់ និងរសើប ចំពោះសន្តិសុខជាតិ ក៏ដូចជាការបំផ្លិចបំផ្លាញសម្ភារឯកសារផ្សេងទៀត។
ការស៊ើបអង្កេតដ៏ធំនេះ ធ្វើឡើងបន្ទាប់ពីលោក ត្រាំ ពន្យារពេលការប្រគល់របស់ទាំងនោះ តាមការស្នើរបស់មន្ត្រីរដ្ឋបាលបណ្ណសារ និងកំណត់ត្រាជាតិ (Nara) អស់រយៈពេលជាច្រើនខែ ហើយសំណុំរឿង ត្រូវបញ្ជូនទៅក្រសួងយុត្តិធម៌ កាលពីដើមឆ្នាំ។
ក្នុងសេចក្ដីថ្លែងការណ៍ កាលពីថ្ងៃចន្ទដដែល លោក ត្រាំ និយាយថា លោកបានសហការជាមួយភ្នាក់ងាររដ្ឋាភិបាលពាក់ព័ន្ធទាំងអស់ ហើយដូច្នេះ «ការវាយឆ្មក់ដោយមិនបានប្រកាសមកលើផ្ទះរបស់ខ្ញុំ គឺមិនចាំបាច់ និងមិនសមរម្យទាល់តែសោះ»។
អ្នកគាំលោក ត្រាំ ឈរនៅខាងក្រៅគេហដ្ឋានរបស់លោក នៅឯ Mar-A-Lago រដ្ឋហ្វ្លរីដា កាលពីថ្ងៃទី ៨ ខែសីហា។
អតីតប្រធានាធិបតីដដែល បាននិយាយថា៖ «ការវាយប្រហារបែបនេះអាចកើតឡើងបានតែក្នុងប្រទេសកំពុងអភិវឌ្ឍន៍ប៉ុណ្ណោះ»។ លោកបន្តថា វាស្មើនឹង«ការប្រព្រឹត្តខុសរបស់រដ្ឋអាជ្ញា» និង«អាវុធនៃប្រព័ន្ធយុត្តិធម៌» ដើម្បីមិនឱ្យលោកឈរឈ្មោះសម្រាប់តំណែងប្រធានាធិបតីម្ដងទៀត។
ការចុះឆែកឆេររបស់ FBI ធ្វើឡើង ខណៈដែលលោក ត្រាំកំពុងស្វះស្វែងរកការគាំទ្រ ក្នុងការឈរឈ្មោះ សម្រាប់តំណែងប្រធានាធិបតីម្ដងទៀត ក្នុងឆ្នាំ២០២៤ ទន្ទឹមនឹងសវនាការជាសាធារណៈជាបន្តបន្ទាប់ដែលបង្ហាញពីតួនាទីរបស់លោក និងសម្ព័ន្ធមិត្ត នៅក្នុងព្រឹត្តិការណ៍ ដែលនាំឱ្យមានការវាយប្រហារ នៅវិមានកាពីតូល កាលពីឆ្នាំមុន។
កន្លងមក លោក ត្រាំ ស្ថិតនៅក្រោមការត្រួតពិនិត្យ សម្រាប់ការរំលោភជាក់ស្តែងរបស់លោក នៃច្បាប់កំណត់ត្រាប្រធានាធិបតី ឆ្នាំ ១៩៧៨ ដែលតម្រូវឱ្យរក្សាឯកសារសេតវិមាន ប៉ុន្តែការឆែកឆេរជាលើកដំបូងនេះ ហាក់ដូចជាបង្ហាញពីហានិភ័យផ្នែកច្បាប់ ដែលអាចកើតមានសម្រាប់ លោក ត្រាំ ចំពោះការអនុវត្តច្បាប់កំណត់ត្រារបស់លោក។
តាមលក្ខន្តិក ដែលគ្រប់គ្រងការដក ឬការបំផ្លាញកំណត់ត្រាប្រធានាធិបតី ដោយចេតនា និងខុសច្បាប់ ទោះបីជាកម្រនឹងត្រូវបានអនុវត្តក្ដី ក៏ការដាក់ទោសធ្ងន់់ៗ នឹងធ្វើឡើង រួមមានការផាកពិន័យ ការដាក់ពន្ធនាគារ និងជាពិសេស គឺការដកសិទ្ធិ ក្នុងការកាន់តំណែងបច្ចុប្បន្ន ឬអនាគត។
ព័ត៌មានចុងក្រោយនេះ កំពុងបញ្ឆេះកំហឹងពីអ្នកគាំទ្រ លោក ត្រាំនិងបន្ថែមកម្ដៅលើការអះអាងរបស់គណបក្សសាធារណរដ្ឋ ដែលថា អតីតប្រធានាធិបតីរូបនេះ កំពុងត្រូវបានគេកំណត់គោលដៅដោយអយុត្តិធម៌។ FBI ក៏ដូចជាក្រសួងយុត្តិធម៌ មិនទាន់ធ្វើការអត្ថាធិប្បាយយ៉ាងណានៅឡើយទេ ខណៈលោក Christopher A. Wray ដែលជាប្រធានFBI ត្រូវបានតែងតាំងដោយលោក ត្រាំ៕
ហួន ឌីណា
វីដេអូ៖
