លោកប្រធានាធិបតីបារាំង អេម៉ានុយអែល ម៉ាក្រុង។ AFP
.jpg)
អត្រាកំណើតនៅប្រទេសបារាំងឆ្នាំ២០២១ មានលក្ខណៈល្អប្រសើរបន្តិចវិញ បន្ទាប់ពីអាត្រាកំណើត ធ្លាក់ចុះចំនួន៦ឆ្នាំជាប់ៗគ្នា មិនធ្លាប់មានតាំងពីឆ្នាំ១៩៧៥មក។ បើតាមរបាយការណ៍ថ្មីរបស់វិទ្យាស្ថានជាតិស្ថិតិ និងសិក្សាសេដ្ឋកិច្ចបារាំង មានអាត្រាកំណើតឆ្នាំ២០២១ កើនឡើងចំនួន ០,៩ភាគរយធៀបនឹងឆ្នាំមុន។
រយៈពេល៦ឆ្នាំមកហើយ ដែលបារាំងប្រឈមនឹងអាត្រាកំណើតដ៏ទាបខ្លាំង គឺអាត្រាកំណើតបារាំងបានដើរ ត្រឡប់ទៅរក៤៥ឆ្នាំមុនឯណោះ។ របាយការណ៍ថ្មីប្រចាំឆ្នាំ២០២២របស់វិទ្យាស្ថានជាតិស្ថិតិ និងសិក្សាសេដ្ឋកិច្ចបារាំង បង្ហាញថា អាត្រាកំណើតសរុបឆ្នាំ២០២១បារាំងបានបង្កើតទារក ៧៤២ ១០០នាក់។ ជាអត្រាស្ទុះងើបឡើង វិញល្អប្រសើរចំនួន ០,៩ភាគរយ ឬ ស្មើនឹងកើនអត្រាកំណើតទារក ៦ ៩០០នាក់ធៀបទៅនឹងឆ្នាំ២០២០។
សូមបញ្ជាក់ថា តាមវិទ្យាស្ថានជាតិស្ថិតិ និងសិក្សាសេដ្ឋកិច្ចបារាំង អត្រាកំណើតបារាំងឆ្នាំ២០២១ ភាគច្រើនជាម្តាយដែលមានវ័យលើស៣០ឆ្នាំ ពិសេសស្ត្រីវ័យលើស៤០ឆ្នាំ ដែលបានផ្តល់កំណើតដល់ទៅ៥,៣ភាគរយច្រើនជាងឆ្នាំមុន ខណៈម្តាយវ័យក្រោម៣០ឆ្នាំ មានការធ្លាក់ចុះអត្រាផ្តល់កំណើត(-៨ភាគរយ)។
ជាមួយនឹងក្តីសង្ឃឹមថ្មី វិទ្យាស្ថានជាតិស្ថិតិនិងសិក្សាសេដ្ឋកិច្ចបារាំង ចាត់ទុកស្ថិតិអត្រាកំណើតថ្មីលើកនេះថា ជាការបញ្ចប់ការធ្លាក់ចុះអាត្រាកំណើតជាតិក្នុងរយៈពេល៦ឆ្នាំចាប់ពីឆ្នាំ២០១៥-២០២០។
ទោះយ៉ាងណា អាជ្ញាធរបារាំង បន្តអំពាវនាវឱ្យប្រជាជនគិតគូរពីការបង្កើនអត្រាយកកូននៅក្នុងគ្រួសារវិញ ដើម្បីជាការសង្គ្រោះសង្គមក្នុងកតិកាសញ្ញាជាតិ។ តាមវិទ្យាស្ថានជាតិស្ថិតិ និងសិក្សាសេដ្ឋកិច្ចបារាំង ចំនួនទារកកើតនៅត្រីមាសទី១ ក្នុងខែមករា ឆ្នាំ២០២២នេះ នៅតែធ្លាក់ចុះចំនួន ២,៩ភាគរយ ក្នុងរយៈពេល៩ខែក្រោយពេលបិទ ខ្ទប់កូវីដលើកទី៣កាលពីខែមេសាឆ្នាំ២០២១មក។ តែយ៉ាងណា ស្ថិតិខាងលើនេះ នៅតែទាបជាងឆ្នាំ២០២០។ ពោល គឺមានទារកចាប់កំណើតច្រើននៅឆមាសទី១ ឆ្នាំ២០២២មែន ធៀបនឹងឆ្នាំ២០២១ ប៉ុន្តែជាស្ថិតិទាបជាងឆ្នាំ ២០២០។
គួរជ្រាបថា ដោយហេតុតែជំងឺរាតត្បាតសកលកូវីដ មានគូស្វាមីភរិយាជាច្រើនលុបចោល ឬលើកគម្រោងយកកូន ដោយសារការបារម្ភពីវិបត្តិសុខភាពផង និងបារម្ភពីសេដ្ឋកិច្ចគ្រួសារផង។ តាមរបាយការណ៍របស់បារាំង អត្រាកំណើតខែធ្នូឆ្នាំ២០២០បានធ្លាក់ចុះ៧ភាគរយ ធៀបនឹងខែធ្នូ ឆ្នាំ២០១៨។ ចំណែក នៅខែមករា ឆ្នាំ ២០២១ ធ្លាក់ចុះដល់ទៅ ១៣,២ភាគរយ ធៀបនឹងខែមករា ឆ្នាំ២០២០៕
