លោកនាយករដ្ឋមន្ត្រី ហ៊ុន សែន (ស្តាំ) ថ្លែងជាមួយលោករដ្ឋមន្រ្តីការបរទេសអ៊ុយក្រែន Dmytro Kuleba ក្នុងជំនួបនៅវិមានសន្តិភាពកាលពីថ្ងៃទី ៩ ខែវិច្ឆិកា ឆ្នាំ២០២២។ AFP
.jpg)
រុស្ស៊ី ដែលកំពុងជាប់ដៃក្នុងសង្គ្រាម នៅប្រទេសអ៊ុយក្រែន ក្នុងរយៈពេល ៩ ខែកន្លងមកនេះ មិនបានទោមនស្សនឹងព្រះរាជាណាចក្រកម្ពុជា ដែលកំពុងបង្កើនទំនាក់ទំនងជាមួយអ៊ុយក្រែន រហូតស្នើឱ្យមានបើកតំណាងស្ថានទូតផ្ទាល់រវាងប្រទេសទាំង ២ ទៀតផង។
ក្នុងសំណេរឆ្លើយតបចំពោះសំណួររបស់តំណាងកាសែត ភ្នំពេញ ប៉ុស្តិ៍ ក្នុងព្រឹត្តិការណ៍សង្ខេបព័ត៌មានប្រចាំខែរបស់ស្ថានទូតរុស្ស៊ី ប្រចាំក្រុងភ្នំពេញ កាលពីថ្ងៃទី ១៨ ខែវិច្ឆិកានេះ រុស្ស៊ីហាក់មិនភ្ញាក់ផ្អើលចំពោះទំនាក់ទំនាក់កើនឡើងរវាងព្រះរាជាណាចក្រកម្ពុជា និងប្រទេសអ៊ុយក្រែន ដែលកំពុងប្រយុទ្ធប្រឆាំងនឹងការឈ្លានពានរបស់រុស្ស៊ីនោះទេ។
ខ្លឹមសារចម្លើយដែលផ្ញើមកកាន់តំណាងកាសែតភ្នំពេញប៉ុស្តិ៍ ដោយលោក Rafael Iangareev មន្រ្តីទទួលបន្ទុកព័ត៌មានរបស់ស្ថានទូតរុស្ស៊ីប្រចាំនៅភ្នំពេញ បានសរសេរថា៖ «កម្ពុជាជាប្រទេសឯករាជ្យ និងអធិបតេយ្យភាព ហើយមានសេរីភាពក្នុងការអភិវឌ្ឍទំនាក់ទំនងរបស់ខ្លួនជាមួយសមាជិកផ្សេងៗទៀតនៃសហគមន៍អន្តរជាតិ។រុស្ស៊ីវាយតម្លៃខ្ពស់ចំពោះភាពជាដៃគូប្រពៃណីរបស់ខ្លួនជាមួយព្រះរាជាណាចក្រកម្ពុជា ហើយគ្មានវិធីជ្រៀតជ្រែកចូលកិច្ចការផ្ទៃក្នុងឡើយ»។
ស្ថានទូតរុស្ស៊ីបានបន្ថែមថា៖ «ទន្ទឹមនឹងនេះ យើងដឹងអំពីជំហរកម្ពុជាចំពោះវិបត្តិអ៊ុយក្រែន។ វិបត្តិនេះកំពុងវិវឌ្ឍក្នុងប្រទេសជិតខាង ហើយកំពុងប៉ះពាល់យ៉ាងធ្ងន់ធ្ងរដល់តំបន់រុស្ស៊ីមួយចំនួន ដែលជាប់ព្រំដែនជាមួយអ៊ុយក្រែន និងចំនួនប្រជាជនរបស់ពួកគេ។ ក្នុងបរិបទនេះ យើងក៏តាមដានយ៉ាងដិតដល់នូវគោលជំហររបស់ព្រះរាជាណាចក្រលើបញ្ហានេះ»។
នៅមុនកិច្ចប្រជុំកំពូលអាស៊ានឈានមកដល់ដែលកម្ពុជា ធ្វើជាម្ចាស់ផ្ទះរៀបចំកិច្ចប្រជុំប្តូរវេន លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោក វ៉ូឡូឌីមៀរ ហ្សេឡេនស្គី ប្រធានាធិបតីអ៊ុយក្រែន បានជួបពិភាក្សាតាមទូរស័ព្ទដំបូងបំផុតមិនធ្លាប់មាន ដោយភាគីទាំង២ យល់ព្រមតែងតាំង និងផ្លាស់ប្ដូរឯកអគ្គរាជទូត និងឯកអគ្គរដ្ឋទូតទៅវិញទៅមកក្នុងពេលខាងមុខ។
ក្នុងក្របខ័ណ្ឌប្រទេសកម្ពុជា លោកនាយករដ្ឋមន្ត្រី ហ៊ុន សែន ក៏បានសន្យាបញ្ជូនមន្ត្រីជំនាញបច្ចេកទេសបោសសម្អាតមីន ទៅបណ្តុះបណ្តាលអ្នកដោះមីននៅប្រទេសអ៊ុយក្រែននៅដើមខែធ្នូខាងមុខ។
តាមរយៈក្រសួងការបរទេសកម្ពុជា អង្គភាពស៊ីម៉ាក់ (CMAC) កំពុងពិភាក្សាជាមួយភាគីជប៉ុន និងមានគម្រោងបញ្ជូនក្រុមទី១ ចេញទៅប្រទេសអ៊ុយក្រែន នៅដើមខែធ្នូ ឆ្នាំ ២០២២ និងក្រុមទី២នៅក្នុងត្រីមាសទី១ ឆ្នាំ ២០២៣។
លោកនាយករដ្ឋមន្ត្រី ហ៊ុន សែន ក្នុងថ្ងៃទិវាឯករាជ្យជាតិរបស់ខ្លួន ក៏បានទទួលជួបរដ្ឋមន្ត្រីការបរទេសអ៊ុយក្រែន លោក ដឹមីត្រូ គូលេបា (Dmytro Kuleba) ដោយបានបញ្ជាក់ជូនភាគីអ៊ុយក្រែនថា ជំហរកម្ពុជានៅតែប្រឆាំងចំពោះការឈ្លានពានមកលើអធិបតេយ្យ និងបូរណភាពដែនដីរបស់រដ្ឋឯករាជ្យ ហើយក៏មិនគាំទ្រដល់ការបំបែករដ្ឋ ឬការទន្ទ្រានឈ្លានពានយកទឹកដីពីប្រទេសដទៃឡើយ។ លោកនាយករដ្ឋមន្រ្តីក៏បានជួបរដ្ឋមន្ត្រីការបរទេសរុស្ស៊ីផងដែរ៕
វីដេអូ៖
