លោក Ayatollah Ali Khamenei ថ្លែងទៅកាន់ក្រុមអ្នកស្ម័គ្រចិត្ត Basij ដែលស្មោះត្រង់នឹងសាធារណរដ្ឋអ៊ិស្លាម ក្នុងទីក្រុងតេអេរ៉ង់ នៅថ្ងៃទី ២៦ ខែវិច្ឆិកា ឆ្នាំ ២០២២ ។ AFP
.jpg)
មេដឹកនាំកំពូលរបស់ប្រទេសអ៊ីរ៉ង់ លោក Ayatollah AliKhamenei បាននិយាយកាលពីថ្ងៃសៅរ៍ថា ការចរចាជាមួយ អាមេរិក នឹងមិនបញ្ចប់បញ្ហាដែលបានធ្វើឱ្យសាធារណរដ្ឋអ៊ិស្លាមរង្គោះរង្គើ ក្នុងរយៈពេល ២ ខែកន្លងទៅនេះ។
ប្រទេសអ៊ីរ៉ង់ បានឃើញបាតុកម្មជាច្រើនសប្តាហ៍ ដែលបង្កឡើងដោយការស្លាប់កាលពីថ្ងៃទី ១៦ ខែកញ្ញារបស់ស្ត្រីជន ជាតិអ៊ីរ៉ង់ដើមកំណើតឃើដ នាង Mahsa Amini អាយុ ២២ ឆ្នាំ ក្នុងការឃុំឃាំង។ នាងត្រូវបានចាប់ខ្លួនដោយចោទប្រកាន់ថាបានបំពានច្បាប់សំលៀកបំពាក់ដ៏តឹងរ៉ឹងរបស់ប្រទេសសម្រាប់ស្ត្រី។
មន្ត្រីរដ្ឋាភិបាល បានស្តីបន្ទោសកុបកម្ម ទៅលើសត្រូវបរទេសនៅលោកខាងលិច ដែលពួកគេ បានចោទប្រកាន់ពីបទញុះញង់ឱ្យប្រព្រឹត្តល្មើសច្បាប់។
លោក Khamenei បានថ្លែងថា៖ «អ្នកខ្លះប្រាប់យើងតាមកាសែត ឬតាមអ៊ីនធឺណិតថា ដើម្បីបញ្ចប់បញ្ហាដែលបានចាប់ផ្តើមកាលពីប៉ុន្មានសប្តាហ៍មុន អ្វីដែលចាំបាច់ គឺត្រូវដោះស្រាយបញ្ហារបស់អ្នកជាមួយអាមេរិក និងស្តាប់សំឡេងរបស់ប្រទេសនេះ»។
លោកបានថ្លែងក្នុងការអត្ថាធិប្បាយដែលផ្សាយតាមទូរទស្សន៍រដ្ឋថា៖ «ការចរចា នឹងមិនបានដោះស្រាយអ្វីមួយនោះទេ»។
«បញ្ហារបស់យើងជាមួយអាមេរិក អាចត្រូវបានដោះស្រាយតាមរយៈការអនុញ្ញាតឱ្យប្រទេសនោះ ចាប់យើងទាមទារប្រាក់ លោះ»។
លោក Khamenei បានលើកឡើងថា ដើម្បីបញ្ចប់អរិភាព អាមេរិកចង់ឱ្យអ៊ីរ៉ង់បោះបង់កម្មវិធីនុយក្លេអ៊ែររបស់ខ្លួន កែប្រែ រដ្ឋធម្មនុញ្ញ រឹតត្បិតឥទ្ធិពលក្នុងព្រំដែនរបស់ខ្លួន និងបិទឧស្សាហកកម្មការពារជាតិរបស់ខ្លួនទាំងអស់។
លោកបានបន្តថា៖ «គ្មានជនជាតិអ៊ីរ៉ង់ណាម្នាក់ អាចទទួលយកលក្ខខណ្ឌបែបនេះទេ។
លោក Khamenei ក៏បាននិយាយសំដៅសំឡេងដ៏ធំសម្បើមរបស់ប្រជាជាតិដែលបន្លឺឡើង កាលពីដើមខែនេះ ក្នុងអំឡុងបាតុកម្មគាំទ្ររដ្ឋាភិបាល និងពិធីបុណ្យសពរបស់មេបញ្ជាការអ៊ីរ៉ង់ Qasem Soleimani ដែលអាមេរិក បានធ្វើឃាតក្នុងការ វាយប្រហារដោយយន្តហោះគ្មានមនុស្សបើក នៅឆ្នាំ ២០២០ ក្នុងទីក្រុងបាកដាដ។
លោក បាននិយាយថា៖ «ហ្វូងមនុស្សដ៏ច្រើននេះ គឺជាសំឡេងរបស់ប្រទេសអ៊ីរ៉ង់»។
លោក Khamenei បានធ្វើការអត្ថាធិប្បាយទៅកាន់ក្រុមទាហានប៉ារ៉ា ដែលបានមកសួរសុខទុក្ខលោក ជាផ្នែកមួយនៃការប្រារព្ធពិធីសម្រាប់សប្តាហ៍ Basij ។
Basij គឺជាកងជីវពលស្ម័គ្រចិត្តដែលត្រូវបានជ្រើសរើស ក្រោមការឧបត្ថម្ភរបស់កងការពារបដិវត្តន៍អ៊ីស្លាម។
លោក Khamenei បានថ្លែងប្រាប់ការជួបជុំដ៏ធំមួយថា៖ «បញ្ហាមិនមែនមានកុបករប៉ុន្មាននាក់នៅតាមដងផ្លូវនោះទេ សូម្បីតែកុបករម្នាក់ៗ ភេរវករម្នាក់ៗ ក៏ត្រូវតែទទួលទោសដែរ»។
លោកបានបន្ថែមថា៖ «សមរភូមិកាន់តែទូលំទូលាយ។ សត្រូវចម្បង គឺភាពក្រអឺតក្រទមជាសកល» ដោយប្រើប្រាស់ពាក្យរួមរបស់អ៊ីរ៉ង់សម្រាប់អាមេរិក និងសម្ព័ន្ធមិត្តក្នុងនោះមានអ៊ីស្រាអែល។
ទីភ្នាក់ងារសារព័ត៌មាន Tasnim បានរាយការណ៍ថា លោកប្រធានាធិបតី អ៊ីប្រាហ៊ីម រ៉ៃស៊ី កាលពីថ្ងៃសៅរ៍ បានទៅទស្សនកិច្ចអង្គភាព Basij ក្នុងទីក្រុងតេអេរ៉ង់ ហើយបានថ្លែងប្រាប់ពួកគេថា អ្នកទាំងអស់បានប្រឹងប្រែងយ៉ាងអង់អាច ក្នុងការប្រយុទ្ធប្រឆាំងនឹងកុបករ៕
វីដេអូ៖
