លោកប្រធានាធិបតីចិន ស៊ី ជីនភីង។ AFP
.jpg)
ប្រធានាធិបតីលោកចិន ស៊ី ជីនភីង បានប្រាប់មេដឹកនាំកូរ៉េខាងជើង លោក គីម ជុងអ៊ុនថា ទីក្រុងប៉េកាំងមានឆន្ទៈ ក្នុងការធ្វើការជាមួយទីក្រុងព្យុងយ៉ាង ដើម្បីសន្តិភាពពិភពលោក។ នេះបើយោងតាមការចុះផ្សាយពីប្រព័ន្ធផ្សព្វផ្សាយរដ្ឋកូរ៉េខាងជើង KCNA កាលពីថ្ងៃសៅរ៍។
សារពីលោក ស៊ី នេះ កើតឡើងប៉ុន្មានថ្ងៃបន្ទាប់ពីប្រទេសកូរ៉េខាងជើង បានបាញ់មីស៊ីលផ្លោងអន្តរទ្វីប (ICBM) នៅក្នុងចំណោមការសាកល្បងដ៏ធំបំផុតមួយរបស់ខ្លួន មកទល់ពេលនេះ ដោយប្រកាសថា វានឹងឆ្លើយតបទៅនឹងការគំរាមកំហែងនុយក្លេអ៊ែររបស់សហរដ្ឋអាមេរិកជាមួយនឹងនុយក្លេអ៊ែររបស់ខ្លួន។
ក្នុងរយៈពេលប៉ុន្មានសប្តាហ៍ថ្មីៗនេះ កូរ៉េខាងជើងបានធ្វើការបាញ់បង្ហោះកាំជ្រួចបំបែកឯតទគ្គកម្ម ហើយការព្រួយបារម្ភ បានកើនឡើងយ៉ាងខ្លាំងថា វានឹងមានការសាងសង់រហូតដល់មានការសាកល្បងនុយក្លេអ៊ែរជាលើកទី ៧ ដែលជាលើកទី ១ គិតចាប់តាំងពីឆ្នាំ ២០១៧ មក។
នៅក្នុងសារទៅកាន់លោក គីម លោក ស៊ី បានថ្លែងថា ទីក្រុងប៉េកាំង បានត្រៀមខ្លួនរួចជាស្រេច ក្នុងការធ្វើកិច្ចសហប្រតិបត្តិការជាមួយកូរ៉េខាងជើង ដើម្បី «សន្តិភាព ស្ថិរភាព ការអភិវឌ្ឍ និងវិបុលភាព ក្នុងតំបន់ និងពិភពលោក»។ នេះបើតាមទីភ្នាក់ព័ត៌មានរបស់ក្រុងព្យុងយ៉ាង KCNA។
លោក ស៊ី បានប្រាប់ថា លោកមានឆន្ទៈក្នុងការសហការជាមួយទីក្រុងព្យុងយ៉ាង ខណៈដែលការផ្លាស់ប្តូរ នៅក្នុងពិភពលោក ពេលវេលា និងប្រវត្តិសាស្ត្រ កំពុងកើតឡើងតាមរបៀប ដែលមិនធ្លាប់មានពីមុនមក។ នេះបើតាមទីភ្នាក់ងារព័ត៌មាន KCNA ដែលដកស្រង់សម្ដីពីសារអបអរសាទររបស់លោក គីម បន្ទាប់ពីសមាជបក្សកុម្មុយនីស្តចិន កាលពីខែមុន បានប្រគល់អំណាចអាណត្តិទី៣ ដល់លោក ស៊ី។
ប៉ុន្មានថ្ងៃមុនការបាញ់បង្ហោះ ICBM របស់កូរ៉េខាងជើង លោក ស៊ី បានជួប នៅក្រៅកិច្ចប្រជុំកំពូលក្រុមប្រទេសមានសេដ្ឋកិច្ចលូតលាស់ទាំង២០ (G20) នៅកោះបាលីជាមួយប្រធានាធិបតីអាមេរិក លោក ចូ បៃដិន ដែលបានសម្តែងការជឿជាក់ថា ទីក្រុងប៉េកាំងមិនចង់ឃើញការកើនឡើងបន្ថែមទៀតនូវទង្វើបែបនេះ ពីទីក្រុងព្យុងយ៉ាងនោះទេ។
ទីក្រុងវ៉ាស៊ីនតោន បានឱ្យដឹងថា ខ្លួនចង់ឱ្យប្រទេសចិន ដែលជាសម្ព័ន្ធមិត្តដ៏សំខាន់បំផុត និងជាអ្នកផ្តល់ផលប្រយោជន៍សេដ្ឋកិច្ចរបស់ទីក្រុងព្យុងយ៉ាង ប្រើប្រាស់ឥទ្ធិពលរបស់ខ្លួន ដើម្បីជួយទប់ស្កាត់កូរ៉េខាងជើង ហើយការបាញ់បង្ហោះ កាលពីថ្ងៃទី ១៨ ខែវិច្ឆិកា ទំនងជាមីស៊ីល ICBM ថ្មីបំផុតរបស់ទីក្រុងព្យុងយ៉ាង ដែលអាចបាញ់ ក្នុងរយៈចម្ងាយដល់ដីគោករបស់សហរដ្ឋអាមេរិក។
ពាក់ព័ន្ធនឹងបញ្ហានេះ ក្រុមប្រឹក្សាសន្តិសុខអង្គការសហប្រជាជាតិ បានកោះប្រជុំបើកចំហមួយ ដោយមានសហរដ្ឋអាមេរិក អង់គ្លេស បារាំង និងឥណ្ឌា ស្ថិតក្នុងចំណោមប្រទេសចំនួន ១៤ ដែលធ្វើការថ្កោលទោសយ៉ាងខ្លាំងក្លាចំ ពោះសកម្មភាពរបស់ទីក្រុងព្យុងយ៉ាងនេះ។ ប៉ុន្តែអ្នកការទូតលោកខាងលិចម្នាក់ បានប្រាប់ AFP ថា ប្រទេសចិន និងរុស្ស៊ី បានជ្រើសរើសមិនដាក់ឈ្មោះរបស់ពួកគេទៅក្នុងសេចក្តីថ្លែងការណ៍ កាលពីថ្ងៃចន្ទឡើយ។
កាលពីដើមខែនេះ សហរដ្ឋអាមេរិក បានចោទប្រកាន់ទីក្រុងប៉េកាំង និងទីក្រុងម៉ូស្គូ ក្នុងការការពារទីក្រុងព្យុងយ៉ាងឱ្យរួចពីការដាក់ទោសបន្ថែមទៀត ដោយកាលពីខែឧសភា ចិន និងរុស្ស៊ីបានវេតូ ចំពោះកិច្ចខិតខំប្រឹងប្រែង ដែលដឹកនាំដោយសហរដ្ឋអាមេរិក ដើម្បីដាក់ទណ្ឌកម្មលើកូរ៉េខាងជើងកាន់តែខ្លាំងបន្ថែមទៀត ដើម្បីជាការឆ្លើយតបទៅនឹងការបាញ់សាកល្បងមីស៊ីល៕
