រដ្ឋាភិបាលកូឡុំប៊ី និងកងទ័ពរំដោះជាតិ (ELN) ជាក្រុមឧទ្ទាម ដែលត្រូវបានទទួលស្គាល់ចុងក្រោយ នៅក្នុងប្រទេសនេះ បាននិយាយកាលពីថ្ងៃសុក្រថា ពួកគេនឹងអញ្ជើញ អាមេរិកឱ្យចូលរួមក្នុងដំណើរការសន្តិភាពរបស់ពួកគេ។
កិច្ចចរចានោះ គឺជាគំនិតផ្តួចផ្តើមរបស់លោកប្រធានាធិបតី Gustavo Petro ដែលកាលពីខែសីហា បានក្លាយជាមេដឹកនាំឆ្វេងនិយមដំបូងបង្អស់របស់ប្រទេសកូឡុំប៊ី ហើយបានប្តេជ្ញាថា មានវិធីសាស្ត្រក្នុងការបញ្ចប់អំពើហិង្សា ដែលបង្កឡើងដោយក្រុមប្រដាប់អាវុធ រួមទាំងទ័ពព្រៃឆ្វេងនិយម និងក្រុមជួញដូរគ្រឿងញៀន។
ភាគីទាំង ២ បានបន្តកិច្ចចរចាជាផ្លូវការនៅ ប្រទេសវ៉េណេស៊ុយអេឡា កាលពីថ្ងៃចន្ទ ជាលើកដំបូង ចាប់តាំងពីឆ្នាំ ២០១៩។ ពួកគេបានយល់ព្រមទៅទំនាក់ទំនងសុំការជួយគាំទ្រពីអាមេរិកតាមរយៈបណ្តាញការទូត ដើម្បីស្វែងរកឆន្ទៈរបស់ប្រទេសនេះ (អាមេរិក) ក្នុងការចូលរួមក្នុងដំណើរការនេះ ហើយបានបញ្ជូនបេសកជនពិសេសម្នាក់។ នេះបើយោងតាមសេចក្តីថ្លែងការណ៍ពីប្រទេសន័រវែស ដែលជាអ្នកធានាដល់ការចរចានេះដែរ។ សេចក្តីថ្លែងការណ៍នោះ ឱ្យដឹងថា កិច្ចពិភាក្សាធ្វើឡើងក្នុងបរិយាកាសជំនឿទុកចិត្ត និងសុទិដ្ឋិនិយម។
នៅពេលត្រូវបានសួរដោយសារព័ត៌មាន AFP ក្រសួងការបរទេសអាមេរិក មិនបានបញ្ជាក់ពីការចូលរួមជាយថាហេតុណាមួយ ក្នុងកិច្ចពិភាក្សាដោយអាមេរិកទេ។
អ្នកនាំពាក្យក្រសួងការបរទេស បានប្រាប់ AFP ថា៖ «នៅពេលនេះ យើងបន្តចូលរួមជាមួយរដ្ឋបាលរបស់លោក Petro ដើម្បីយល់កាន់តែច្បាស់ពីផែនការស្វែងរកសន្តិភាពពេញលេញជាមួយ ELN អ្នកប្រឆាំង FARC និងអង្គការឧក្រិដ្ឋជនដទៃទៀត ដោយនិយាយដល់សមាជិកនៃកងកម្លាំងប្រដាប់អាវុធបដិវត្តន៍របស់ក្រុមឧទ្ទាមកូឡុំប៊ី ដែលបានទម្លាក់អាវុធ និងបង្កើតគណបក្សនយោបាយមួយ»។
តែយ៉ាងណាក្ដី ពួកគេបានបន្ថែមថា ELN នៅតែជាអង្គការភេរវករម្មបរទេស ដែលត្រូវបានចាត់តាំង នៅក្រោមច្បាប់របស់សហរដ្ឋអាមេរិក។
ភាគីទាំងអស់ ក៏បានយល់ព្រមអញ្ជើញប្រេស៊ីល ស៊ីលី និងម៉ិកស៊ិក ឱ្យចូលរួមជាមួយន័រវេស គុយបា និងវ៉ណេស៊ុយអេឡា ជាអ្នកធានាដល់ដំណើរការចរចានេះ។ អាល្លឺម៉ង់ ស្វ៊ីស និងអេស្ប៉ាញ ក៏នឹងត្រូវបានអញ្ជើញជា ប្រទេសដែលអមដំណើរដែរ។ ប្រតិភូប្រមាណ ៣០ រូប ចូលរួមកិច្ចពិភាក្សា ដែលរំពឹងថា នឹងមានរយៈពេល ៣ សប្តាហ៍។
កូឡុំប៊ីបានប្រឈមនឹងជម្លោះប្រដាប់អាវុធជាងកន្លះសតវត្សរ៍ រវាងរដ្ឋាភិបាល និងក្រុមផ្សេងៗនៃក្រុមទ័ពព្រៃឆ្វេងនិយម យោធាប៉ារ៉ាស្តាំនិយម និងក្រុមជួញដូរគ្រឿងញៀន។ ELN បានចាប់ផ្តើមជាចលនាមនោគមន៍វិជ្ជាឆ្វេងនិយម នៅឆ្នាំ ១៩៦៤ មុនងាកទៅរកអំពើឧក្រិដ្ឋកម្ម ដោយផ្តោតលើការចាប់ជំរិត ការជំរិតយកឧស្សាហកម្មប្រេង និងការជួញដូរគ្រឿងញៀន នៅកូឡុំប៊ី និងប្រទេសជិតខាង គឺវ៉េណេស៊ុយអេឡា។
ការចរចាជាមួយក្រុមទាំងនេះ បានចាប់ផ្តើមនៅឆ្នាំ ២០១៦ ក្រោមអតីតប្រធានាធិបតី Juan Manuel Santos ដែលបានចុះហត្ថលេខាលើសន្ធិសញ្ញាសន្តិភាពជាមួយកងកម្លាំងបដិវត្តន៍ម៉ាកនិយមនៃក្រុមឧទ្ទាមកូឡុំប៊ី (FARC) ដែលក្រោយមក បានទម្លាក់អាវុធរបស់ខ្លួន ហើយបង្កើតគណបក្សនយោបាយ។ ប៉ុន្តែកិច្ចចរចាជាមួយ ELN ត្រូវបានផ្អាក នៅឆ្នាំ ២០១៩ ដោយអតីតប្រធានាធិបតីអភិរក្សនិយមលោក Ivan Duque បន្ទាប់ពីមានការវាយប្រហារដោយគ្រាប់បែកដាក់ក្នុងរថយន្តបណ្ឌិត្យសភាប៉ូលិស ក្នុងក្រុងបូហ្គោតា ដែលបណ្តាលឱ្យមនុស្ស ២២ នាក់បានស្លាប់៕