ស្រីស្រស់ ភឹម ស្រីនោ កំពុងត្រៀមប្រកួតកញ្ញាឯកដ៏-អស្ចារ្យនៃកម្ពុជាឆ្នាំ ២០២១។ កញ្ញា ភឹម ស្រីនោ វ័យ ២៣ ឆ្នាំ កំពុងតែហ្វឹកហាត់ត្រៀមប្រកួត Miss Grand Cambodia 2021។ សហការី
.jpg)
ភ្នំពេញ៖ ស្រីស្រស់ រាងតូចច្រឡឹងមានវ័យ ២៣ ឆ្នាំ ដែលធ្លាប់មានមុខក្នុងការសម្តែង MV ចម្រៀងបទ «កង់បី» របស់កំពូលតារាចម្រៀងប្រុស ព្រាប សុវត្ថិ នៅផលិតកម្មហ្គាឡាក់ស៊ី កញ្ញា ភឹម ស្រីនោ នឹងប្រើប្រាស់នូវបទពិសោធខ្លួនបានចូលប្រកួតកាលពី ៣ ឆ្នាំមុនម្តង និងការត្រៀមខ្លួនរយៈពេលច្រើនឆ្នាំនេះ ដើម្បីការប្រកួតប្រជែងយកតំណែងកញ្ញាឯកដ៏អស្ចារ្យនៃកម្ពុជាឆ្នាំ ២០២១។
ស្រីស្អាត ដែលជាកូនចៅអ្នកស្រុកស្រីសន្ធរ ខេត្តកំពង់ចាម ចេះភាសាថៃស្ទាត់ជំនាញ ដោយសារធ្លាប់បានទៅរស់នៅប្រទេសថៃ និងរៀនភាសា កាលពីនៅវ័យជំទង់ ភឹម ស្រីនោ បង្ហើបប្រាប់ ភ្នំពេញ ប៉ុស្តិ៍ ពីមូលហេតុនៃការវិលចូលមកប្រកួតកម្មវិធីកញ្ញាឯកដ៏អស្ចារ្យកម្ពុជាឆ្នាំ ២០២១ (Miss Grand Cambodia 2021) ក្រោយពីធ្លាប់ចូលរួមប្រកួតម្តងកាល នៅឆ្នាំ ២០១៨ មកនោះ។
កញ្ញា ស្រីនោ បានបញ្ជាក់ថា៖ «មូលហេតុដែលនាងខ្ញុំដាក់ពាក្យប្រកួត គឺនាងខ្ញុំ ចង់ក្លាយជាបវរកញ្ញារយៈពេលជាយូរមកហើយ។ វាជារឿងធម្មតាទេ ដែលមនុស្សស្រីជាច្រើនរូបប្រាថ្នាចង់ស្លៀកសម្លៀកបំពាក់ស្អាតៗ ចង់តុបតែងខ្លួនឱ្យស្អាត ចង់ពាក់ស្បែកជើងកែងខ្ពស់ដើរ ហើយក៏ចង់ឃើញពេលមួយ ដែលមានទស្សនិកជនញញឹម និងទះដៃសាទរ»។
ស្រីស្រស់ ដែលចេះភាសាថៃស្ទាត់រូបនេះ ក៏បង្ហាញពីក្តីសង្ឃឹមក្នុងការប្រកួត Miss Grand Cambodia 2021 ថា៖ «ការរំពឹងរបស់នាងខ្ញុំ គឺខ្ពស់គួរសម ព្រោះនាងខ្ញុំបានត្រៀមខ្លួនរួចរាល់សម្រាប់ការប្រកួតដូចជាការហាត់ប្រាណ ដើម្បីឱ្យមានរាងស្អាត និងរៀនដើរម៉ូដជាដើម។ ប៉ុន្តែនាងខ្ញុំ ក៏នៅមានអារម្មណ៍ បែបរាងភ័យបន្តិចបន្តួចផងដែរ។ នាងខ្ញុំនឹងនាំយកបទពិសោធពីមុន មកប្រើលើវិស័យនេះម្ដងទៀត ហើយនឹងខិតខំប្រឹងប្រែងធ្វើឱ្យល្អជាងមុន»។
គួរបញ្ជាក់ដែរថា កម្មវិធីប្រកួតប្រជែងកញ្ញាឯកដ៏អស្ចារ្យនៃកម្ពុជា ឆ្នាំ ២០២១ កំពុងតែទទួលបេក្ខនារីចូលរួមប្រកួតបណ្តើរៗ ដោយលក្ខខណ្ឌជ្រើសរើសចាប់ពី ១៧ ឆ្នាំ រហូតដល់ ២៧ ឆ្នាំ មានកម្រិតវប្បធម៌ចប់បាក់ឌុប ឬថ្នាក់ទី១២ មានចំណេះដឹងភាសាបរទេស ឬអង់គ្លេសអាចប្រើការបាន មានអត្តចរិតស្លូតបូត សុភាពរាបសា។ ការទទួលពាក្យបេក្ខភាព គឺចាប់ពីថ្ងៃទី ១ ខែកក្កដា ដល់ថ្ងៃទី ៣១ ខែ សីហា ឆ្នាំ ២០២១៕
