ក្រុងប៉ារីស៖ អាជ្ញាធរបានឱ្យដឹងកាលពីថ្ងៃចន្ទថា ព្រះវិហារប្រូតេស្ដង់ក្នុងប្រទេសបារាំង បានប្រារឰអាពាហ៍ពិពាហ៍ភេទដូចគ្នាលើកដំបូងចំពោះគង្វាល រយៈពេល ៦ ឆ្នាំក្រោយបព្វជិតខ្ទើយបានទទួលសិទ្ធិរៀបការជាលើកដំបូង។
អាជ្ញាធរបានបន្ដថា អ្នកស្រី អេមេលីន ដោស និងអេណេស កោហ្វមេន បានរៀបអាពាហ៍ពិពាហ៍នៅភាគខាងត្បូងទីក្រុងម៉ុងភេលីយ័រ កាលពីថ្ងៃសៅរ៍។
អ្នកស្រីអេណេស កោហ្វមេន ដែលមិនខុសពីភរិយារបស់អ្នកស្រី កំពុងស្ថិតក្នុងវេលាសាកល្បងជាគង្វាល តម្រូវដោយព្រះវិហារប្រូតេស្ដង់រួបរួមបារាំង (EPUdF) បានប្រាប់ AFP ថា៖ «វាជាជំហានទៅមុខរបស់ព្រះវិហារ»។
អ្នកស្រី ដោស បានបន្ថែមថា៖ «ក្រុម LGBT ចង់ឃើញអ្នកក្នុងក្រុមដែលមានការតាំងចិត្ដខ្ពស់ រួមទាំង បព្វជិតសាសនាផងដែរ»។
ខណៈអាពាហ៍ពិពាហ៍ស្រីប្រុស បានក្លាយជាបទដ្ឋានទូទៅសម្រាប់គង្វាលប្រូតេស្ដង់ ការសម្រេចព្រះវិហារក្នុងអង្គប្រជុំរបស់ព្រះវិហារក្នុងឆ្នាំ២០១៥ ដែលបានអនុញ្ញាតឱ្យមានអាពាហ៍ពិពាហ៍សហជីពភេទដូចគ្នាក្នុងចំណោមបព្វជិតនៅតែមានភាពចម្រូងចម្រាស និងធ្វើឱ្យក្រុមមន្ដ្រីស្ទាក់ស្ទើរក្នុងការអនុវត្ដច្បាប់។
ជាទូទៅ លទ្ធិប្រូតេស្ដង់ មិនចាត់ទុកអាពាហ៍ពិពាហ៍ជាពិធីប្រសិទ្ធិនោះទេ តែព្រះវិហារអាចធ្វើពិធីប្រោះព្រំតាមបែបស៊ីវិលទាំងប្ដីប្រពន្ធប្រុសស្រី និងភេទដូចគ្នា។
អ្នកគង្វាល ជេន ហ្វ្រង់ស័រ ប្រេន ដែលធ្វើជាប្រធានកិត្ដិយសនៃពិធីមង្គលនោះ បាននិយាយថា៖ «យើងនឹងសម្រេចគោលដៅបន្ដិចម្ដងៗ។ វាជានិមិត្ដរូបដ៏ធំសម្បើម»។
យោងតាម Cassou បានឱ្យដឹងថា ព្រះវិហារប្រូតេស្ដង់ប្រមាណ ៣០ ជុំវិញពិភពលោកបានអនុញ្ញាតឱ្យបព្វជិតរៀបការចំពោះភេទដូចគ្នា៕ AFP/HR