ស្រីស្រស់ ពេជ្រ វត្តីសារ៉ាវឌ្ឍី អតីតកញ្ញាឯករងទី១ Miss Cambodia 2020។ តារាសម្តែង និងម៉ូដែលស្រីកញ្ញា ពេជ្រវត្តីសារ៉ាវឌ្ឍី។ រូបថត សហការី
.jpg)
ភ្នំពេញ៖ ខណៈកម្មវិធីប្រកួតកញ្ញាឯកកម្ពុជានានាប្រចាំឆ្នាំ ២០២១ កំពុងតែទទួលបេក្ខភាពឱ្យចូលរួមបណ្តើរៗនោះ ស្រាប់តែអ្នកគាំទ្រតារាស្រីស្អាត សាច់សខ្ចី រាងស្រលូន ខ្ពស់ស្រឡះ ពេជ្រ វត្តីសារ៉ាវឌ្ឍី ជំរុញឱ្យដាក់ពាក្យចូលប្រកួតកម្មវិធីបវរកញ្ញាចំនួន ២ ដែលស័ក្តិសមនឹងកញ្ញា។
សព្វថ្ងៃនេះ កញ្ញា ពេជ្រ វត្តីសារ៉ាវឌ្ឍី មានវ័យ ២១ ឆ្នាំ កម្ពស់ ១,៧៧ ម៉ែត្រ មានស្រុកកំណើតនៅខេត្តព្រះសីហនុ ជាតារាសម្តែង និងម៉ូដែល បានបញ្ចប់ការសិក្សាផ្នែកទេសចរណ៍។ កញ្ញាធ្លាប់ត្រូវគេស្គាល់ថា ជាតារាសម្តែងស្រី និងតារាបង្ហាញម៉ូដដ៏មានទេពកោសល្យម្នាក់ ដោយធ្លាប់បានសម្តែងភាពយន្តភាគ ភាពយន្តខ្លី និងភាពយន្តអប់រំមួយចំនួនក្នុងតំណែងជាតួឯកផងដែរ រួមមានដូចជារឿង «ប្តីគេ» និងរឿង «ខ្មោចខ្លឹមត្រាច» ជាដើម។
មិនតែប៉ុណ្ណោះ កញ្ញា ពេជ្រ វត្តីសារ៉ាវឌ្ឍី ក៏ជាបេក្ខនារីពាក់ស្លាកលេខ ៩ ធ្លាប់បានធ្វើឱ្យគេភ្ញាក់ផ្អើលខ្លាំងនឹងរូបសម្រស់អម ដោយសមត្ថភាពលេចធ្លោក្នុងការប្រកួតកម្មវិធីកញ្ញាឯក Miss Cambodia 2020 ផងដែរ។ សម្រាប់លទ្ធផលចុងក្រោយកញ្ញាបានជាប់ជាកញ្ញាឯករងទី១ (1st Runner-up ) នៃកម្មវិធី Miss Cambodia 2020។
ដោយឡែកក្នុងឆ្នាំ ២០២១ នេះ កញ្ញា ពេជ្រ វត្តីសារ៉ាវឌ្ឍី ស្រាប់តែត្រូវក្រុមអ្នកគាំទ្រជាច្រើន លើកទឹកចិត្តជំរុញឱ្យកញ្ញាដាក់ពាក្យចូលរួមប្រកួតក្នុងកម្មវិធីប្រកួតបវរកញ្ញាចំនួន ២ ក្របខ័ណ្ឌផ្សេងគ្នា គឺការប្រកួតកញ្ញាឯកចក្កវាឡកម្ពុជាឆ្នាំ ២០២១ និងការប្រកួតកញ្ញាឯកដ៏អស្ចារ្យនៃកម្ពុជាឆ្នាំ ២០២១។
ស្រីស្រស់ដែលមានទម្រង់មុខញញឹមស្រស់ មានកម្ពស់សមសួននឹងរូបរាងអមដោយចំណេះដឹងគួរឱ្យសរសើរបានបញ្ចប់ការសិក្សាផ្នែកទេសចរណ៍ប្រាប់ ភ្នំពេញ ប៉ុស្តិ៍ថា៖ «តាមពិតទៅនាងខ្ញុំក៏ចង់ចូលរួមប្រកួតដែរ។ តែសម្រាប់ឆ្នាំនេះ ដោយសារខ្ញុំនៅជាប់កុងត្រាជាមួយក្រុមហ៊ុន ខណៈពេលខ្ញុំចូលរួមកម្មវិធីកញ្ញាឯក Miss Cambodia 2020 នៅឡើយ។ សម្រាប់ឆ្នាំ ២០២១ នេះ នាងខ្ញុំមិនអាចប្រកួតបានឡើយ»។
តារាសម្តែង និងតារាម៉ូដែលស្រីសាច់សខ្ចី រាងស្រលូន ដែលមានស្រុកកំណើតរស់នៅខេត្តព្រះសីហនុ កញ្ញា ពេជ្រ វត្តីសារ៉ាវឌ្ឍី ក៏បង្ហើបពីគោលដៅខ្លួនឆ្នាំក្រោយផងដែរថា៖ «ដូច្នេះឆ្នាំ ២០២១ នេះ អាចជាវេលាទុកឱ្យនាងខ្ញុំដើម្បីត្រៀមខ្លួនទុកសម្រាប់ការប្រកួតនានានៅឆ្នាំ ២០២២។ ជាពិសេសខ្ញុំអាចមានពេលរៀនភាសាអង់គ្លេសបន្ថែមទៀត និងដើម្បីបង្គ្រប់នូវអ្វីដែលខ្លួនខ្វះចន្លោះកាលពីពេលប្រកួតកម្មវិធីកញ្ញាឯក Miss Cambodia 2020 ផងដែរ»៕
