ភ្នំពេញ៖ ខណៈបេក្ខនារីដ៏ស្រស់ស្អាត ដែលជាប់វគ្គជម្រុះ ២៥ រូប (Top25) ជាកញ្ញាឯកតំណាងឱ្យតាមខេត្តទាំង ២៥ កំពុងសន្សំពិន្ទុពីការបោះឆ្នោតតាមអនឡាញពីក្រុមអ្នកគាំទ្រនោះ ស្រាប់តែលេចព័ត៌មានប្រកាសឈ្មោះអតីតជាម្ចាស់មកុដកញ្ញាឯកដ៏អស្ចារ្យនៃកម្ពុជាប្រចាំឆ្នាំ ២០១៧ កញ្ញា ខ្លឹម ស្រីគា ធ្វើជាគណៈកម្មការផ្តល់ពិន្ទុកម្មវិធី Miss Grand Cambodia 2021។
នេះបើតាមគេហទំព័រផ្លូវការ Miss Grand Cambodia បានប្រកាសថា៖ «សូមជម្រាបជូនថា ក្នុងការប្រកួត Miss Grand Cambodia 2021 ឆ្នាំនេះ Miss Grand Cambodia 2017 នឹងជាគណៈមេប្រយោគក្នុងការដាក់ពិន្ទុដល់បេក្ខនារីទាំង ២៥ នាក់! តើនៅចាំឈ្មោះគាត់បានទេ?»។
បើទោះបីជាមិនអាចទទួលបានការបរិយាយបញ្ជាក់ពីអារម្មណ៍ផ្ទាល់ខ្លួនបែបណាពីស្រីស្រស់ ដែលបានអភិវឌ្ឍខ្លួនយ៉ាងរហ័សចេញពីពិភពម៉ូដែលក្លាយជាតារាសម្តែងស្រី ពិធីការិនី និងតារាចម្រៀងឯករាជ្យកញ្ញា ខ្លឹម ស្រីគា យ៉ាងណាក្តី តែនេះ ជារឿងល្អសម្រាប់កញ្ញាមានឱកាសបង្ហាញសមត្ថភាពសាជាថ្មីនៅលើពិភពបវរកញ្ញាម្តងទៀត ក្រោយពីខ្លួនបានបញ្ចប់ភារកិច្ចនេះតាំងពីឆ្នាំ ២០១៧ មកនោះ។
បន្ទាប់ពីផុតតួនាទីជាកញ្ញាឯកតំណាងឱ្យប្រទេសកម្ពុជា អតីតកញ្ញាឯកកម្ពុជា Miss Grand Cambodia ប្រចាំឆ្នាំ ២០១៧ សង្កេតឃើញថា កញ្ញា ខ្លឹម ស្រីគា ហាក់មានភាពកាក់កបទៅនឹងការសម្តែងខ្សែភាពយន្តទាំងកុនដុំ និងកុនភាគ ក្រោយពីបានអភិវឌ្ឍខ្លួន មកជាតារាសម្តែង តារាចម្រៀង និងពិធីការិនី ហើយក៏អាចសម្របខ្លួនសម្តែងបានតាមកាលៈទេសៈបានយ៉ាងសមសួនទៀតផងនាប៉ុន្មានឆ្នាំចុងក្រោយនេះ។
តែតារាស្រីស្រស់ សម្បូរសាច់កញ្ញា ខ្លឹម ស្រីគា ក៏រអ៊ូរទាំដែររឿងជួបការលំបាក នាគ្រាមានវិបត្តិដោយសារកូវីដ គឺកញ្ញាបង្ហើរសាររអ៊ូនៅតាមបណ្តាញសង្គមហ្វេសប៊ុកថា៖ «សម័យនេះ អ្នកណាក៏ពិបាកគ្រប់តែគ្នា បន្ទុកមានគ្រប់គ្នា បញ្ហាមិនចប់ តើឱ្យខ្ញុំត្រូវធ្វើម៉េចទៅ?» ហាក់ចង់បាននូវអ្វីជាចំណាប់អារម្មណ៍ពីប្រិយមិត្តឱ្យជួយផ្តល់ឱ្យបានជាមតិយោបល់។
មិនតែប៉ុណ្ណោះកញ្ញា ខ្លឹម ស្រីគា កញ្ញាឯក Miss Grand Cambodia 2017 រូបនេះ ក៏បានបន្លឺជាសារ ១ ឃ្លាទៀតដែរថា៖ «១ ថ្ងៃទៅ ១ ថ្ងៃ ពេលវេលាកាន់តែដើរទៅមុខ តែមនុស្សដឹងទៅមុខដឹងទៅក្រោយទេ ដកដង្ហើមចោលរាល់ថ្ងៃចំណូលតិចជាងចំណាយ មិនយូរទេ ស្រីគា នឹងទៅបួសលើភ្នំឥឡូវហើយ បើនៅតែយ៉ាងនេះ»៕